Pamisa Onjongole Yove

“Onjongole yoku siapo oku sipa oyo ocituwa ca velapo ku vana va tela oku siapo oku sipa lonjanga.”—“Elivulu Liwekapo Oku Sipa Cilo!”

NDA o yongola oku siapo oku sipa o sukila oku kuata onjongole yocili yoku ci linga. O pamisa ndati onjongole yove? Kũlĩhĩsa ndomo o ka kala ciwa nda va siapo oku sipa.

O ka tetelela olombongo. Omunu o landa okakasia kamosi kosikalu veteke o pondola oku pesela olohuluwa violondolale vunyamo. Gyanu, Nepal wa popia hati: “Sia limbukile etendelo liolombongo nda enda oku pesela kakaya.”

O ka kuata esanju lialua komuenyo. “Regina wo ko Afrika du Sul wa popia hati: “Nda kuata lika ekalo liwa komuenyo eci nda liwekapo oku sipa kuenje esanju liaco lilivokiya otembo yosi.” Eci omanu va sipa va ci siapo, elemba liavo lioketimba kuenda lioku maha ovikulia vi kala ciwa, va kuata vali ongusu leposo liavo li kala ciwa.

Uhayele wove u ka kala ciwa. Oseketa Yoku Teyuila Ovovei ko Estadus Unidus ya popia hati: “Oku siapo oku sipa ci kuete esilivilo kuhayele walume, lakãi vakuanyamo osi.”

O ka likolela vali calua. “Henning, Denmark wa popia hati: “Nda liwekapo oku sipa momo sia yonguile okuti osikalu oyo yi ndi songuila. Nda yonguile okuti ame muele ndi songuila etimba liange.”

Epata liove lakamba va ka kuatisiwa. “Oseketa Yoku Kũlĩhĩsa Uvei wo Kanser ko Amerika ya popia hati: “Oku sipa . . . ku nyõlavo uhayele womanu va kasi ocipepi. . . . Akonomuiso aco a lekisa okuti olohuluwa viomanu ka va sipi va siata oku fa anyamo osi luvei wo kanser vapuvi kuenda ovovei akuavo utima omo lioku kala ocipepi lava va sipa.

O ka sanjuisa Ululiki Wove. “A vamanji wa soliwi, . . . tu liyelisi kevĩho liosi lio ketimba.” (2 Va Korindo 7:1) ‘Eci atimba ene ndocilumba . . . ci kola, haico ci taviwa la Suku.” —Va Roma 12:1.

Sylvia, wo kofeka yo Espanya wa popia hati: ”Eci nda limbuka okuti Suku wa suvuka ovina vi vĩhisa etimba, nda siapo oku sipa.”

Olonjanja vialua, oku kuata onjongole yoku ci linga ka ci tẽla. Tu sukilavo ekuatiso liomanu vakuavo oku kongelamo vakuepata lakamba. Nye ovo va pondola oku linga?