Te imiraa i te pahonoraa
Te imiraa i te pahonoraa
“E manaˈo iho â to te rahiraa o te taata no nia ia Iesu. E taata faaroo anei tatou aore ra aita, mea feaa aore ra aita, e ui iho â tatou paatoa, ‘O vai teie taata?’”—STAN GUTHRIE.
TE HINAARO ra te taata e ite o vai o Iesu. O te mau buka no nia ia ˈna te mea hoo-rahi-roa ˈˈe-hia. O te mau hohoˈa tavirihia no nia ia ˈna tei mataitai-rahi-aˈe-hia. Te uiui noa ra râ te taata no nia ia Iesu e e manaˈo rau to ratou.
A tau matahiti aˈenei, ua ani e piti papai vea i te taata ia pahono i nia i te Internet i te uiraa “O vai o Iesu?” Teie te tahi mau pahonoraa:
● “E au ra e e rabi (orometua) o ˈna tei riro ei hiˈoraa o te aumihi.”
● “E taata o ˈna mai ia tatou tei fanaˈo i te hoê oraraa faahiahia.”
● “Aita e haapapuraa e ua ora iho â Iesu.”
● “E Tamaiti a te Atua o Iesu tei fanauhia, tei pohe, e tei faatiahia mai mai te pohe mai no te faaora ia tatou i ta tatou mau hara. Te ora nei oia i teie mahana e e hoˈi faahou mai Oia i te fenua.”
● “Te manaˈo nei au e o te tamaiti otahi Iesu Mesia na te Atua, e taata oia e i te hoê â taime e atua.”
● “E aai noa te aamu o Iesu no te mau tamarii.”
Mea papu e e ere teie mau manaˈo taa ê atoa i te mea tano. E buka anei te nehenehe e pahono mai ma te papu e te tano i ta tatou mau uiraa no nia ia Iesu? Te tiaturi nei te feia i pia i teie vea e o te Parau a te Atua te Bibilia e o tera anaˈe buka te faaite mai i te parau mau no nia ia Iesu. *—Timoteo 2, 3:16.
I to muri nei mau tumu parau, e hiˈopoa mai tatou i te pahonoraa a te Bibilia i te mau uiraa tei faaroo-noa-hia no nia ia Iesu. Ua parau hoi o ˈna e o te taata e faatupu i “te faaroo ia ˈna” te ora ˈtu. (Ioane 3:16) Te faaitoitohia nei oe ia hiˈopoa i te mau pahonoraa e ia feruri e mea faufaa anei no oe ia haapii hau atu â no nia ia Iesu e e nafea ia faatupu i te faaroo ia ˈna.
[Nota i raro i te api]
^ No te ite hau atu â, a hiˈo i te pene 2, “Te Bibilia—te hoê buka no ǒ mai i te Atua ra,” o te buka Eaha ta te Bibilia e haapii mau ra? piahia e te mau Ite no Iehova.
[Faaiteraa i te fatu o te hohoˈa i te api 3]
I nia: © Angelo Cavalli/age fotostock; i raro: © Alain Caste/age fotostock