No e rave rahi mau taata, te ora nei te rahiraa o te mau taata tumu no Marite i roto i te tahi mau puhaparaa i te mataeinaa o te oire. Te ora nei râ hau atu 70 i nia i te hanere o te mau taata tumu no Marite i te mau oire. I New York, te oire rahi roa ˈˈe no Marite, e faatupuhia te tahi oroa e tupuraa, parauhia powwow, no te mau taata tumu no Marite mai te 5 e tae atu i te 7 no Tiunu 2015. a Oioi te mau Ite no Iehova i te opua ia haere i tera tupuraa. No te aha?

Te huri nei te mau Ite no Iehova i te mau papai Bibilia na roto e hanere reo. Oia atoa te reo o te mau taata tumu no Marite, mai te mau Pied-Noir, Dakota, Hopi, Mohawk, Navajo, Odawé e te mau Cri des Plaines. Ua tuu ïa te mau Ite no Iehova i te tahi mau iri e vairaa papai i te tupuraa no te mau taata tumu no Marite no te faaite atu vetahi mau papai mai te api parau iti “Vous pouvez faire confiance au Créateur!”

I nia i ta matou reni natirara, te vai ra te mau haruharuraa e video na roto i te rahiraa o te mau reo tei faahitihia. Ta te mau Ite no Iehova ïa i pata i te tupuraa no te mau taata tumu no Marite. Ua tapao te feia mataitai e mea na roto noa i te reo Beretane aore ra reo Paniora te rahiraa o te tahi atu mau faaiteiteraa, hohoˈa aore ra faataaraa i tera tupuraa.

Ua maere roa e rave rahi taata eiaha noa no te mau tutavaraa ta te mau Ite no Iehova i rave no te huri na roto e rave rahi reo tumu no Marite, no ta ratou ohipa atoa ravehia no te haapii i te Bibilia ia vetahi ê i te mau oire e i te mau puhaparaa. I to ˈna iteraa i ta ratou ohipa, ua ani mai te hoê taata o tei apiti i roto i te faanahoraa o teie tupuraa i te hoê haapiiraa Bibilia ma te parau e: “Te tiai ru nei au ia hoˈi mai outou e farerei ia ˈu no te haapii mai i te Bibilia!”

Ua haere mai te hoê tane e ta ˈna vahine faaipoipo i ta te mau Ite no Iehova iri e vairaa papai afaifai. E mau taata tumu no Marite raua e e mea tariˈa turi atoa. Aita ïa te mau Ite no Iehova i ite e nafea ia tauaparau e o raua. Ua tae mai râ te hoê Ite no Iehova tei haapii i te reo apǎraa rima. Ua aparau oia e 30 minuti ia raua ra e ua tauturu atu oia ia ite ihea e tupu ai te tairururaa e toru mahana a te mau Ite no Iehova na roto i te reo apǎraa rima i to raua fenua.

Ua apiti mai hau atu 50 Ite no Iehova i tera tupuraa no te tauturu i te taata ia haapii i te Bibilia. Ua farii te feia mataitai hau atu 150 papai i tera tupuraa e toru mahana.