Ua matau-maitai-hia te mau Ite no Iehova no ta ratou ohipa huriraa. I Novema 2014, i huri na matou i te Bibilia na roto 125 reo e te mau papai Bibilia na roto e 742 reo. E huri atoa matou i te mau video. I Tenuare 2015, i hurihia na te video Eaha te ravehia i te Piha a te Basileia? na roto e 398 reo, e te video No te aha e haapii ai i te Bibilia? na roto e 569 reo. No te aha i ravehia ˈi teie ohipa, e mea nafea?

I Mati 2014, ua faaitoito te Tino aratai a te mau Ite no Iehova i te mau amaa na te ao nei ia faaineine i te tahi mau papai haruharuhia o te tavirihia ei video na roto e rave rahi roa reo no te faaitoito i te taata ia haapii i te Bibilia.

E ere i te ohipa nainai ia huri i te hoê video. Na mua, e huri te pǔpǔ huriraa i te papai o te video na roto i to ratou reo. I muri iho, e maitihia te tahi mau taata o te paraparau i tera reo no te taio i te papai o te video. Ia oti, e haruharu te mau pǔpǔ haapao i te haruharuraa e te video i te paraparau a te feia taio, e amui ratou i tei haruharuhia, te mau maniania, te mau hohoˈa e te tahi mau nota papaihia i nia i te paruai. I te pae hopea, e amuihia te mau reo, te papai e te hohoˈa o te horoa mai i te hoê video e tuuhia ˈtu i nia i ta matou reni natirara.

Na mua ˈˈe, i te tahi noa mau amaa te vai ra ta ratou piha haruharuraa e rave ohipa haapiihia no te haapao i taua tuhaa ra. Te vai atoa ra râ te huriraa na roto i te tahi atu mau reo i te mau vahi atea i te amaa. Mea nafea ïa no taua mau reo ra?

I te ao nei, i faaohipa na te tahi mau taata ite i te ohipa haruharuraa i ta ratou mau ravea haruharuraa afaifai. I rave na ratou i te hoê taoˈa haruharu reo e te hoê matini roro uira e porotarama haruharuraa to roto. I haamau na ratou i te hoê piha haruharuraa i roto i te hoê piha ohiparaa, te hoê Piha a te Basileia, aore ra te hoê fare. O te feia o te paraparau i te reo o te fenua tei maitihia no te taio, no te tiaau, e no te hiˈopoa i te haruharuraa. Ua oti anaˈe te haruharuraa e ua fariihia anaˈe, i rave na te taata haruharu i ta ˈna mau taihaa, a taui atu ai i te vahi.

Maoti teie ravea i haruharuhia ˈi te mau video na roto e rave rahi reo e toru taime hau i to na mua ˈˈe.

Ua au-roa-hia taua mau video ra. No te taata e rave rahi, o ta matou mau video te mau video matamua ta ratou i mataitai na roto i to ratou reo.

Ua haruharu-atoa-hia te mau video na roto i te reo Pitjantjatjara paraparauhia e hau atu i te 2 500 taata i Auteralia. I te oire Alice Springs i te Tuhaa fenua Apatoerau i haruharuhia ˈi te video na roto i taua reo ra. “Ua au roa te taata i te mau video,” ta Callan Thomas ïa tei apiti atoa i te haruharuraa i parau. “Ua mataitai to reira mau taata i te video ma te anaanatae rahi, e ua ui noa mai ihea e itehia ˈi te tahi atu mau video mai teie. Aita i rahi te papai na roto i to ratou reo. I to ratou faarooraa i te video na roto i to ratou reo, to ratou iho â râ iteraa i te reira, ua maere roa ratou.”

I Cameroun, e piti Ite no Iehova tei fano na nia i te hoê vaa. Pou ihora raua i te hoê oire iti faaeahia e te tahi mau taata mea poto roa ratou. Paraparau atura raua i te raatira o te oire iti, e orometua haapii atoa o ˈna i reira. Ite aˈera raua e e paraparau o ˈna i te reo Bassa. Faaite atura raua ia ˈna i nia i ta raua roro uira afaifai i te video No te aha e haapii ai i te Bibilia? na roto i to ˈna reo. Ua maere roa te raatira e ua ani mai i te tahi mau papai.

I te hoê oire iti i Initonetia, mea riri roa na te hoê orometua i te mau Ite no Iehova. Ua tanina oia i te auahi pauroa te papai ta te mau Ite no Iehova i opere na reira. Ua parau atoa te tahi atu e e tanina ratou i te Piha a te Basileia i te auahi. Haere atura e maha mutoi i te fare o te hoê tuahine Ite no Iehova e uiui aˈera ia ˈna e i to ˈna utuafare. Ua hinaaro ratou e ite eaha te ravehia i roto i te Piha a te Basileia. Faaite maira oia i te video Eaha te ravehia i te Piha a te Basileia? na roto i te reo Initonetia.

I te otiraa ia ratou te mataitai i te video, na ô atura hoê o te mau mutoi: “Te taa ˈtu ra ïa ia ˈu i teie nei e ua hape te taata, aita hoi ratou i matau maitai ia outou.” Ui atura te tahi atu mutoi: “Nehenehe au e rave i teie video no te faaite ia vetahi ê? Te faaite maitai ra teie video o vai mau â outou.” I teie nei, e manaˈo maitai to te mutoi no te mau Ite no Iehova e e paruru atoa ia ratou.

Mai te peu e aita â oe i mataitai atura i tera na video, te faaitoito nei matou ia oe ia mataitai atu na roto i to oe reo.