Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te taui hoê hoê nei te mau taata mau auri i to ratou oraraa

Te taui hoê hoê nei te mau taata mau auri i to ratou oraraa

E 68 fare auri i Paniora te farii nei i te mau Ite no Iehova e e 600 taata mau auri te haapii nei i te Bibilia.

I rotopu i tera mau Ite no Iehova, te vai ra o Miguel tei mau hoi i te fare auri i na mua ’‘e 12 matahiti i te maoro. I teie mahana te ho‘i nei o ’na i ǒ i te mau hebedoma atoa. Te tumu? No te tauturu i te taata mau auri ia taui i to ratou oraraa mai ia ’na atoa.

I na vau matahiti i mairi a‘enei, ua haapii Miguel i te Bibilia i te taata mau auri e rave rahi. Te parau ra o ’na: “Te oaoa nei au i te tauturu i te feia i roto i te fare auri i reira vau i na mua ’‘e. E te oaoa nei au a ite ai i to ratou hinaaro ia matara mai i teie ao ino.”

E maha matahiti to Miguel a pohe ai to ’na papa tei faaûhia e te hoê taero ava. Ua rave ïa to ’na mama i te ohipa e rave rahi hora no te faatamaa i te utuafare.

Ua haamata Miguel e to ’na tuaana i te faatau i te haapiiraa e i te tomo i roto i te mau fare no te eiâ e i te vavahi i te mau pereoo. I te 12raa o to ’na matahiti, e taata ohipa ino o ’na. I te 15raa o to ’na matahiti, e topa noa mai ta ’na moni a hoo ai i te raau taero. No to ’na râ hinaaro maha ore i te raau taero, ua rahi atu â ta ’na mau ohipa eiâ. Mai te 16raa o to ’na matahiti, ua mau e ua matara mai o ’na i te fare auri e rave rahi taime e aita i maoro ua riro mai o ’na ei taata ohipa ino haapaari. Te na ô ra o Miguel: “Ua papu ia ’u e e pohe vau i te fare auri aore ra no te mea ua rave rahi roa vau i te raau taero. E au vau i te hoê ra‘o i roto i te puaverevere.”

Tera râ i 1994, ua ani hoê o to ’na mau hoa i te hoê Ite no Iehova ia papai i te hoê rata ia Miguel i te fare auri. A taio ai i teie rata, ua haapii Miguel i te opuaraa a te Atua e faariro i te fenua ei paradaiso. Ua faaitoito te Ite no Iehova ia ’na ia taui i to ’na oraraa no te fana‘o i teie parau tohu. Te parau ra o ’na: “Ua putapû ta ’na mau parau i to ’u aau. I tera mahana, ua taui roa to ’u oraraa e ua faaoti vau i te haapii i te Bibilia noa ’tu e ua ite au e e ere roa ’tu i te mea ohie.”

Ua ite o Miguel e e ere i te mea ohie no te mea e tîtî o ’na no te raau taero e te avaava. E noaa ohie hoi tera na mea e piti. Pauroa te mahana, e pûpû atu to ’na hoa piha i te raau taero. Ua tamau noa râ Miguel i te pure ia noaa i te puai no te haavî i tera hinaaro maha ore e ua manuïa i muri a‘e.

Toru ava‘e i muri a‘e, ua haamata Miguel i te faaite i ta ’na mau tiaturiraa i te tahi atu mau taata mau auri. Ua opua atoa o ’na e faaipoipo, ua fa mai râ te tahi fifi. Hoê ava‘e hou to ’na faaipoiporaa, ua faautua te hoê tiripuna ia Miguel ahuru atu â matahiti fare taperaa no te tahi atu mau mea ta ’na i rave na. I muri a‘e râ e toru matahiti e te afa, ua faatiamâhia oia no to ’na haerea maitai. E ua faaipoipo iho â o ’na. Aita roa ’tu Miguel i ho‘i i to ’na oraraa tahito.

 

No te ite atu â

Eaha te opuaraa a te Atua no te fenua?

Te faataa ra te Bibilia no te aha te Atua i poiete ai i te fenua, afea te mauiui e ore ai, eaha te a muri a‘e o te fenua, e o vai te ora i reira.