I te mahana taitahi, e papai te feia i roto i te mau fare tapearaa i Marite e rave rahi rata i te mau piha ohipa a te mau Ite no Iehova no te ani i te tauturu pae varua.

Ua pahono matou i tera mau aniraa ma te faanaho i te mau Ite no Iehova o te mau amuiraa no te haere e hiˈo e e haapii i te Bibilia e te feia i roto i te fare auri, fare tapearaa no te feia apî, fare maˈi o te rapaau i te feruriraa e te pu rapaauraa i te hiaai maha ore.

I te tahi mau fare tapearaa, e faatupu tamau te Ite no Iehova i te mau putuputuraa. Ei hiˈoraa, i te hoê fare tapearaa, e 32 taata tei haere mai e faaroo i te hoê oreroraa parau tei horoahia i roto e piti aua.

Mea faaitoito mau te mau faahopearaa. A tapao na i teie taata mau auri i te tuhaa fenua o Indiana o tei haapohe i te hoê taata ma te opua. Ta ˈna faautuaraa? E faaea ïa e tae roa ˈtu i to ˈna pohe i te fare tapearaa. Ua rave oia i te mau tauiraa faahiahia mau i nia i to ˈna huru e ua bapetizohia oia ei Ite no Iehova.

E rave atoa anaˈe i te hiˈoraa o teie taata mau auri i roto i te hoê fare tapearaa rahi i Kalifonia. Ua parau te Ite no Iehova o tei haapii i te Bibilia e o ˈna: “Ua ite au i to ˈna huru i na mua ˈˈe e i te mau tauiraa ta ˈna i rave. Ua taui mau iho â oia no te faaî i te mau titauraa ia bapetizohia oia.”

E rave rahi taata mau auri tei farii i te parau mau Bibilia noa ˈtu e ua ite ratou e e nehenehe ratou e haapohehia. Ei hiˈoraa, no te mea ua faarue vetahi i te hoê pǔpǔ taata ohipa ino, i titauhia na ia faataa ê mai ia ratou o ratou anaˈe aore ra ia afai ia ratou i te tahi atu fare tapearaa ia ore ratou ia haapohehia.

E mana iho â to te Bibilia no te taui i te taata. Ua faahiahia roa te feia e ohipa ra i te fare auri. No te ohipa maitai i ravehia e te mau Ite, ua horoa ˈtu te mau tia faatere o te tahi mau fare tapearaa i te mau parau papai haamauruururaa e i te mau re no ta ratou tauturu aufau-ore-hia.