Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Faaiteiteraa te faaho‘i mai ia tatou i te omuaraa

Faaiteiteraa te faaho‘i mai ia tatou i te omuaraa

Mai Atopa 2012, te vai ra te hoê faaiteiteraa i te pu rahi a te mau Ite no Iehova i Brooklyn, New York, no nia i ta te mau Ite no Iehova i ite e tae roa mai i teie mahana. * Na te taata iho e haere e hi‘o i te faataaraa no nia i te mau aroraa, fifi atâta e upootiaraa faaruruhia e te tahi mau taata tei hinaaro e pee i te Kerisetianoraa.

E faaho‘i-roa-hia te taata mataitai i te tau o te mau Kerisetiano matamua i te matahiti 33 e tae roa mai i teie mahana. Ua faanahohia te faaiteiteraa ei maha tuhaa o tei taaihia e te hoê reni o te tau. E mana‘o tumu Bibilia to te tuhaa taitahi e e omuahia e te hoê video poto ta te taata e nehenehe e faaroo na roto i te reo Beretane a taio noa ’i i te huriraa na roto i te reo Farani, Italia, Tapone, Korea, Potiti aore ra Paniora.

Te mau tuhaa taa ê

No roto mai te tuhaa matamua, “E hinaaro a‘enei te taata i te pouri,” i te mau parau a Iesu i roto i te Ioane 3:19. Ua tohu te Bibilia e “e tia mai” te taata ino o “te parau mai i te parau pi‘o.” (Ohipa 20:30) Ua riro ta ratou mau haaraa, tei faaitehia i nia i te reni o te tau, ei haaferuriraa.

No roto mai te mana‘o tumu o te piti o te tuhaa, “Ia anaana te maramarama,” i te Korinetia 2, 4:6. E haamata te reni o te tau i te hopea o te mau matahiti 1800 tae roa ’tu i te omuaraa o te mau matahiti 1900. E haamata teie tuhaa e te aamu o te mau tane aau haavare ore o tei hi‘opoa i te Bibilia ma te tuu i te mau mana‘o oti noa i te hiti. E faataahia mai mea nafea teie pǔpǔ iti i te rahiraa mai e i te fana‘oraa i te ite rahi a‘e hou te Tama‘i rahi matamua.

E faaite-atoa-hia te tahi hoho‘a tavirihia tuiroo matauhia mai te “Hoho‘a Darama o te Poieteraa.” I 1914, ua haamata te Feia haapii Bibilia (te i‘oa o te mau Ite no Iehova i na mua ’‘e) i te rave i teie faaiteiteraa otahi o tei anoi i te hoho‘a e te haruharuraa. I te mau matahiti i muri mai, e mirioni taata tei haere e mataitai i teie porotarama. E ite atoa outou i te mau hoho‘a mau, te tahi video poto o te omua i te porotarama e hau atu i te 500 hoho‘a peni rau.

“Ua riri roa te teni,” o te mana‘o tumu ïa o te toru o te tuhaa, hutihia mai i roto i te Apokalupo 12:17. E faatia mai te reira i te hamani-ino-raa ta te mau pǐpǐ a te Mesia i faaruru i te omuaraa o te mau matahiti 1900. Oia atoa i te aamu faaitoito o te mau Kerisetiano tei tapea i to ratou tiaraa amui ore i te tau tama‘i. E faaite te hoê video i te aamu o Remigio Cuminetti, te hoê Ite no Iehova tei patoi i te oomo i te ahu tama‘i o Italia aore ra i te aro i roto i te Tama‘i rahi matamua. Oia atoa te aamu o Alois Moser, no Auteteria, o tei patoi i te parau “Heil Hitler!” Ua ere ïa o ’na i ta ’na ohipa e ua afaihia o ’na i te aua haavîraa i Dachau.

Ua faanahohia te tahi piha tapearaa poiri no te faaiteite i te hoho‘a o te mau Ite no Iehova tei tapeahia i te fare auri no to ratou faaroo i te mau fenua mai i Heleni, Poronia, Serbie e Tapone.

Te mana‘o tumu o te tuhaa hopea, ua niuhia ïa i nia i te Mataio 24:14: “Parau apî oaoa no te mau nunaa atoa.” E faataa te reira i te ohipa a te mau Ite no Iehova mai 1950 e tae roa mai i teie mahana. E faatia mai te mau hoho‘a i te maraaraa vitiviti, te pororaa itoito e te here taeae e ite-maitai-hia ra i rotopu i te mau Ite no Iehova.

Hou a faarue ai i tera vahi, e nehenehe te taata e haere i nia i te mau roro uira no te mataitai i te Fare Bibilia e te Sekene no Brooklyn, fare tahua faaohipahia e te mau Ite no Iehova a hau atu 100 matahiti a‘enei.

No te aha teie faaiteiteraa?

I titauhia na hoê matahiti faaineineraa e tau ava‘e paturaa no te faaoti i teie faaiteiteraa. Ua tauturu mai te mau Ite no Iehova na te ao atoa nei ma te horoa mai i te mau taihaa tahito faufaa roa no to ratou utuafare.

No te aha teie rahiraa ohipa? Ua uihia te hoê melo o te Tino aratai a te mau Ite no Iehova eaha te faufaa no te Ite no Iehova ia haere e mataitai i tera faaiteiteraa. Ua faahiti o ’na i teie parau matau-maitai-hia: “E taa maitai ia tatou ihea e haere ai a ite ai nohea mai tatou.”

^ par. 2 Tei te 25 Columbia Heights, Brooklyn, New York, te faaiteiteraa. Mai te Monire tae atu i te Mahana pae e mai te hora 8 i te poipoi tae atu i te hora 5 i te ahiahi. Mea tamoni ore te tomoraa.