Te haapii ra o Marta, hoê Ite no Iehova i Guatémala, i te reo Kekchi no te poro i te poroi Bibilia i te feia e paraparau ra i tera reo. I te hoê mahana, ua ite o ˈna i te hoê tane o tei faarue i te fare maˈi. Ia hiˈohia to ˈna huru rapaeau, ua manaˈo atura Marta e no ǒ mai o ˈna i te hoê oire iti Kekchi i te vahi mouˈa, hoê vahi mea varavara te mau Ite no Iehova i te poro atu. Ua haere o ˈna e farerei i tera tane e ua paraparau o ˈna ia ˈna na roto i te reo Kekchi, noa ˈtu mea iti to ˈna ite i te reo.

 Ua ani Marta ia ˈna aita anei o ˈna e hinaaro e haapii i te Bibilia. Ua farii te taata ma te oaoa. Ua parau râ o ˈna aita ta ˈna e moni no te aufau i te haapiiraa. Ua faataa ˈtura Marta e e faatere te mau Ite no Iehova i te haapiiraa Bibilia ma te tamoni ore. Ua parau atoa Marta e e nehenehe te tane e haapii na roto i te niuniu paraparau e e nehenehe atoa te mau mero atoa o to ˈna utuafare e apiti ia ˈna. Ua farii te taata. Inaha e paraparau e e taio atoa tera taata i te reo Paniora, ua pûpû atu Marta i Te Bibilia, Huriraa o te ao apî na roto i tera reo. Ua horoa atoa o ˈna i te papai haapiiraa Eaha ta te Bibilia e haapii mau ra? na roto i te reo Kekchi. Te hebedoma i muri iho, ua haamata te taata, ta ˈna vahine e ta raua na tamarii i te haapiiraa Bibilia na roto i te niuniu paraparau na muri ia Marta. Ua haapii ratou e piti taime i te hebedoma. Ua parau Marta: “Aita vau i paraparau maitai i te reo Kekchi. Ua rave ïa matou i te haapiiraa Bibilia na roto i te reo Paniora e na te tane i huri atu. Ua taa i te mau tamarii i te reo Paniora.”

 E tiaraa to teie taata i roto i ta ˈna haapaoraa. Ua haamata o ˈna i te haapii atu i te feia e haere i te fare pure i ta ˈna i haapii mai i te Bibilia. Ua au roa ratou i ta ratou i faaroo e ua ani ratou ihea o ˈna i haapii mai ai i tera mau haapiiraa apî. I to ˈna parauraa e ua haamata o ˈna i te hoê haapiiraa Bibilia e te hoê Ite no Iehova, ua apiti atu ratou, hoê i muri i te tahi atu. Oioi i te iteraahia 15 taata o tei putuputu mai i te hebedoma tataitahi no te haapii na roto i te niuniu paraparau na muri ia Marta. I muri iho, ua tuu ratou i te hoê ravea haapuairaa reo i pihai iho i te niuniu paraparau, ia nehenehe te taatoaraa e faaroo.

 I to Marta faatia ˈtu i te mau matahiapo o ta ˈna amuiraa no nia i ta ˈna haapiiraa Bibilia, ua haere hoê matahiapo e farerei i te mau piahi Bibilia i te oire iti i ora ˈi ratou. Ua titau manihini o ˈna ia ratou i te hoê oreroraa parau na te taata atoa ta te tiaau haaati a e vauvau i te tahi atu oire iti. No te tae atu, ua titauhia ia tere hoê hora na nia i te pereoo e e haere na avae e piti hora i te maoro. Ua farii te mau piahi i te titau-manihini-raa e ua tae 17 o ratou.

 Tau hebedoma i muri iho, ua haere te tiaau haaati e te tahi atu mau Ite no Iehova e farerei i te mau piahi e maha mahana i te maoro. I te mau poipoi, e mataitai ratou i te mau video na roto i te reo Kekchi itehia i nia jw.org e e hiˈopoa ratou i te buka rairai O vai te rave nei i to Iehova hinaaro i teie mahana? I te mau ahiahi, e mataitai ratou i te tahi mau tuhaa o te JW Haapurororaa teata. Ua rave atoa te tiaau haaati i te faanahoraa ia haapii te piahi Bibilia taitahi na muri i te hoê taata, eiaha faahou ei pǔpǔ.

 I na maha mahana, ua poro atoa te mau Ite no Iehova i te mau oire iti Kekchi na pihai iho mai e ua titau manihini ratou i te mau taata i te hoê putuputuraa taa ê. I taua putuputuraa ra, ua faaitoito te mau taeae i na 47 taata tei tae mai ia haapii i te Bibilia. Ua farii 11 utuafare i te reira.

 Tau avaˈe i muri iho, ua rave te mau matahiapo i te faanahoraa ia ravehia hoê putuputuraa i te oire iti matamua i te hebedoma taitahi. I teie mahana, e 40 tiahapa taata te tamau ra i te haere i te mau putuputuraa. I te Oroa haamanaˈoraa o te pohe o Iesu, ua tae mai 91 taata.

 A haamanaˈo ai e nafea te reira i haamata ˈi e eaha tei tupu i muri iho, te na ô ra Marta: “Te haamauruuru nei au ia Iehova. I te tahi mau taime, e au ra e mea taotia roa ta ˈu e nehenehe e rave i roto i te taviniraa. Tera râ, e mauhaa tatou i roto i te rima o te Atua. Ua ite maitai o ˈna eaha to roto i te aau o te feia e ora ra i tera oire iti. E ua faanaho o ˈna i te ohipa ia farerei ratou i to ˈna nunaa. Mea here na Iehova ia ratou.”