Yona 4:1-11
4 Baitu kinu kikabiihiza muno Yona, kandi yakwatwa ekiniga ky’amaani.
2 Nahabweki akasaba Yahwe ati: “Ai Yahwe, eki tikiri nikyo nagambire, obu nkaba ndi omu nsi y’owaitu? Egi niyo ensonga habwaki nalengereho kwirukira Tarasiisi; habwokuba nkaba nkimanyire ngu oli Ruhanga ow’embabazi, arukuganyira, atayanguha kubiihirwa, aijwire okugonza okutalekera, kandi ow’asaasa habw’akabi.
3 Ai Yahwe, hati nkwesengeriize nyita, habwokuba kirungi kufa omu kiikaro ky’okwomeera.”
4 Yahwe yamukaguza ati: “Mali kihikire iwe okubiihirwa muno oti?”
5 Hanyuma, Yona akaturuka aheeru y’orubuga kandi yaikarra burugaizooba bw’orubuga. Yayombekaho akaju yakaikarramu nukwo atunge ekiituuru, yalindirra kurora ekiraahika ha rubuga.
6 Hanyuma, Yahwe Ruhanga akameza ekimera ekirukuranda, kyaranda kyahika haiguru y’akaju ka Yona, nukwo atunge ekiituuru n’okumukoonyera kuteekaana. Yona akasemererwa muno habw’ekimera eki.
7 Baitu ha kiro ekyahondiireho omu rukyakya, Ruhanga ow’amananu akasindika ekihuka kyalya ekimera ekirukuranda kandi kyahotoka.
8 Omusana obu gwajwire, Ruhanga akasindika n’omuyaga ogurukwokya kuruga burugaizooba, kandi omusana gwateera Yona yaburaho kake kukaba. Akaikara naasaba afe kandi yaikara naagamba ati: “Nimpurra ningonza kufa omu kiikaro ky’okwomeera.”
9 Ruhanga akakaguza Yona ati: “Kihikire iwe kubiihirwa muno oti habw’ekimera ekirukuranda?”
Nubwo Yona yamugarukamu ati: “Mpikire kubiihirwa, kubiihirwa muno kuhika na ha rulengo ngu nimpurra ningonza kufa.”
10 Baitu Yahwe akamugambira ati: “Okwatiirwe embabazi ekimera ekirukuranda eki otaraakoleriire, noobu kwakuba okukikuza. Kikakurra omu kiro kimu, kandi kyafa omu kiro kimu.
11 Na nyowe tinsemeriire kukwatirwa embabazi orubuga orw’amaani Nineve, orurumu abantu abarukuhingura 120,000 abatamanyire kwahukaniza ekihikire n’ekitahikire, otwaliiremu n’ebisoro byabo ebingi?”
