Yona 1:1-17
1 Yahwe akagambira Yona* mutabani wa Amitaayi ati:
2 “Imuka ogende omu rubuga orw’amaani orwa Nineve, orangirre omusango ogurucweriirwe, habwokuba ebibi byarwo bihikire omu maiso gange.”
3 Baitu Yona akairuka Yahwe yagenda Tarasiisi. Akasirimuka yagenda Yopa kandi yasangayo emeeri erukugenda Tarasiisi. Nahabweki, akasasura kandi yatemba emeeri kugenda na bo Tarasiisi nukwo airuke Yahwe.
4 Nubwo Yahwe yasindika ekiyaga eky’amaani ha nyanja, kandi hakabaho ihunga ery’amaani muno ha nyanja kandi emeeri ekaba eri haihi kucwekacweka.
5 Abakozi aba ha meeri* bakatiina muno kandi buli omu hali bo yatandika kukunga ruhanga we amukoonyere. Kandi bakatandika kunaga omu maizi ebintu ebikaba biri ha meeri nukwo bakeehye ha bulemeezi. Baitu Yona akaba asirimukire omu kisiika ekya hansi eky’emeeri nambere akaba abyamire kandi agwijagiriire kimu.
6 Omukuru w’emeeri akagenda nambere ali, yamugambira ati: “Habwaki obyamire? Imuka, okunge ruhanga waawe! Obundi Ruhanga ow’amananu araatugirra embabazi nukwo tutahwerekerra.”
7 Hanyuma, baagambirangana bati: “Mwije tutome, nukwo tumanye nooha atuleetiire kuhikwaho akabi kanu.” Nahabweki bakatoma, kandi okutoma kwagwa hali Yona.
8 Nubwo baamukaguza bati: “Tugambire, niiwe atuleetiire kuhikwaho akabi kanu? Okora mulimo ki, kandi nooruga nkaha? Nooruga omu ihanga ki, kandi oruganda rwawe nurwo ruha?”
9 Yabagarukamu ati: “Ndi Muhebburaniya, kandi ndamya* Yahwe, Ruhanga ow’omu iguru, ayahangire enyanja n’obwerre.”
10 Abasaija obu bahuliire ebi, baayeyongerra kimu kutiina kandi baamukaguza bati: “Kiki kinu eki okozere?” (Abasaija bakakyetegereza ngu akaba nairuka Yahwe, habwokuba akaba abagambiire.)
11 Habwokuba ihunga likaba niryeyongerra kimu kuba ly’amaani, bakamukaguza bati: “Hati tukukole ki kurora enyanja yateekaana?”
12 Akabagarukamu ati: “Mumpimbe munnage omu nyanja, kandi niija kuteekaana, habwokuba nkimanyire ngu ihunga linu ery’amaani libaiziire habwange.”
13 Baitu abasaija bakakora kyona ekirukusoboka kugarra emeeri ha musa gw’enyanja, baitu batasobole habwokuba ihunga likaba niryeyongerra kimu.
14 Hanyuma, bakakunga Yahwe nibagamba bati: “Ai Yahwe, nitukwesengereza otatuhwerekereza habw’omusaija* onu! Otatujunaana habw’esagama etaine musango, habwokuba okozere nkooku ogondeze, Ai Yahwe.”
15 Nubwo baahimba Yona baamunaga omu nyanja, kandi enyanja yateekaana.
16 Hanyuma, abasaija bakatandika kutiina muno Yahwe, baahayo ekihongwa hali Yahwe kandi baayeraga hali uwe.
17 Hanyuma, Yahwe akatuma encu enkooto yamira Yona, kandi Yona akamara omu nda y’encu ebiro bisatu, nyamusana n’ekiro.
