Yona 3:1-10
3 Yahwe akagambira Yona omurundi ogwa kabiri ati:
2 “Imuka, ogende omu rubuga orw’amaani Nineve, kandi orangirre hali abantu baarwo obutumwa obu ndaakugambira.”
3 Yona akoorobera ekigambo kya Yahwe, yaimuka yagenda omu Nineve. Nineve rukaba ruli rubuga orukooto* muno, kurwetooroora rwona kikaba nikitwara ebiro bisatu ha bigere.
4 Hanyuma, Yona akataaha omu rubuga yamara orugendo orw’ekiro kimu naarangirra naagamba ati: “Hasigaireyo ebiro 40 byonka Nineve ehwerekerezebwe.”
5 Abantu ab’omu Nineve obu baakihuliire, baikiririza omuli Ruhanga, baarangirra okusiiba kandi baajwara ebiguniya* kurugira kimu ha muntu arukukirayo obukuru, kuhikira kimu ha muntu owa hansi.
6 Omukama wa Nineve obu yahuliire obutumwa obu, akaimuka omu ntebe ye ey’obukama, yajuuramu ekijwaro kye eky’obukama, yajwara ebiguniya* kandi yaikarra omu iju.
7 Ekindi, akarabyaho ekiragiro omu Nineve yoona naagamba ati:“Kinu nikyo ekiragiro eky’omukama n’abanyoro be: Omuntu weena atalya ebyokulya noobu kwakuba kunywa amaizi, kandi n’ebisoro bitalya ekintu kyona noobu kwakuba kunywa amaizi.
8 Leka ebisoro babijweke ebiguniya,* n’abantu bajwale ebiguniya,* kandi bakunge Ruhanga kuruga ha mutima, baleke emihanda yabo embi, hamu n’ebikorwa byabo eby’okurwana n’obwisi.
9 Tomanya, obundi Ruhanga ow’amananu naasobora kuhinduramu eki abaire naagonza kutukora, aleke ekiniga kye nukwo tutahwerekerra.”
10 Ruhanga ow’amananu obu yarozere eki baakozere, n’omulingo bakaba balekere emihanda yabo embi, akahinduramu yaleka akabi ak’akaba naagenda kubahikyaho.
