Ruusi 4:1-22
4 Nubwo Bbowaazi yagenda ha mulyango gw’orubuga yaikarra. Kandi dora! omucunguzi, Bbowaazi ow’akaba abalizeeho akaba naarabaho. Bbowaazi obu yamurozere yamugambira ati: “Iwe Nanka, ija oikarre hanu.” Kandi yaija yaikarra.
2 Bbowaazi yayeta n’abagurusi ikumi ab’orubuga, yabagambira ati: “Mwikarre hanu.” Na bo baikarra.
3 Nubwo Bbowaazi yagambira omucunguzi ati: “Naume, ayagarukire kuruga omu nsi ya Mowaabbu, asemeriire kutunda ekibanja ekikaba kiri kya mugenzi waitu, Erimereki.
4 Nahabweki, ningonza kukugambira nti: ‘Kigule omu maiso g’abaikazi hamu n’omu maiso g’abagurusi b’abantu bange. Obu oraaba noija kukicungura, kicungule, obu oraaba otarukwija kukicungura, ngambira nakyo nkimanye, habwokuba niiwe oine obusobozi bw’okukicungura nukwo nyowe, ninkugarukaho.’” Yamugarukamu ati: “Niinyija kukicungura.”
5 Bbowaazi yagamba ati: “Ha kiro eky’olikigura kuruga hali Naume, osemeriire n’okukiguraho Ruusi Omumowaabbu, omukazi w’omusaija ayafiire nukwo ibara ly’omusaija ogu ayafiire ligarurweho ha bugwetwa bwe.”
6 Omucunguzi obu yahuliire eki, yagamba ati: “Tindukusobora kukicungura habwokuba ninsobora kusiisa obugwetwa bwange. Iwe kicungule omu kiikaro kyange, habwokuba nyowe tindukusobora kukicungura.”
7 Omu Isaleeri eya kara, kusobora kugumya ngu ekintu kikaba kicungwirwe rundi kiguzirwe, gunu nugwo mugenzo ogwakorwaga: Omuntu akaba aine kujuuramu enkaito ye kandi agihe omuntu ondi, kandi gunu gwali mulingo gw’okugumya endagaano omu Isaleeri.
8 Nahabweki, omucunguzi obu yagambiire Bbowaazi ati: “Iwe kigule,” omucunguzi akajuuramu enkaito ye.
9 Hanyuma Bbowaazi akagambira abagurusi hamu n’abantu boona ati: “Muli bakaiso bange kiro kinu, habwokuba mwarora ninguraho Naume ebi byona ebikaba biri bya Erimereki, na byona ebikaba biri bya Kiriyooni na Maharooni.
10 Na Ruusi Omumowaabbu ow’akaba ali muka Maharooni na uwe nimmutwara kuba mukazi wange kusobora kugarraho ibara lya kifa ha bugwetwa bwe, nukwo ibara lya kifa litahweraho kimu omu bagenzi be n’omu mulyango gw’orubuga rw’owaabu. Muli bakaiso kiro kinu.”
11 Nubwo abantu boona abakaba bali ha mulyango gw’orubuga hamu n’abagurusi, bagamba bati: “Tuli bakaiso! Leka Yahwe ahe omugisa omukazi arukutaaha omu nju yaawe, abe nka Rakeeri na Leeya, abaayombekere enju ya Isaleeri. Okuraakurane omu Efurasa kandi oyekorre ibara erirungi* omu Bbeterehemu.
12 Leka enju yaawe efooke nk’eya Pereezi, mutabani wa Tamara na Yuda, kuraba omu mwana Yahwe araakuha kuruga omu mukazi onu.”
13 Nahabweki, Bbowaazi akatwara Ruusi kandi yafooka mukazi we. Akateerana na uwe, kandi Yahwe yasobozesa Ruusi kutwara enda, yazaara omwana omwojo.
14 Hanyuma abakazi baagambira Naume bati: “Akugizibwe Yahwe, ow’akukoonyiire kutunga omucunguzi kiro kinu. Leka ibara lye lirangirirwe omu Isaleeri!
15 Agarwireho* obwomeezi bwawe kandi naija kukurolerra omu myaka yaawe ey’obukuru habwokuba azairwe mukamwana waawe, ow’arukukugonza muno kandi naakukirra abaana aboojo musanju.”
16 Naume akahimba omwana yamuteeka omu kifuba kye kandi yafooka mulezi we.
17 Abakazi abataahi nubo baamurukire ibara. Bakagamba bati, “Omwana azaaliirwe Naume” kandi baamuruka ibara Obbedi. Nuwe yazaire Yese, ise Daudi.
18 Bunu nubwo obuzaale bwa Pereezi: Pereezi akazaara Hezirooni
19 Hezirooni yazaara Raamu; Raamu yazaara Aminadaabbu;
20 Aminadaabbu yazaara Nasooni; Nasooni yazaara Salimooni
21 Salimooni yazaara Bbowaazi; Bbowaazi yazaara Obbedi;
22 Obbedi yazaara Yese, kandi Yese yazaara Daudi.
