Ruusi 1:1-22
1 Omu kasumi abacwi b’emisango obu bakaba nibakyalema, enjara ekagwa omu Isaleeri; eki kikaleetera omusaija kuruga Bbeterehemu ey’omu Yuda kugenda omu nsi ya Mowaabbu kwikarayo nk’omunyamahanga, uwe na mukazi we n’abatabani be babiri.
2 Omusaija ogu akaba naayetwa Erimereki,* mukazi we naayetwa Naume,* kandi batabani baabo babiri bakaba nibeetwa Maharooni* na Kiriyooni.* Bakaba bali baikazi b’omu Efurasa, orubuga orw’omu Bbeterehemu ey’omu Yuda. Bakagenda omu nsi ya Mowaabbu kandi baikarayo.
3 Akasumi kakahika, Erimereki, iba Naume, yafa, kandi yamusiga n’abatabani be babiri.
4 Hanyuma, batabani be bakaswera abakazi Abamowaabbu; omu akaba naayetwa Orupa, kandi ondi, Ruusi. Bakaikara omu nsi ya Mowaabbu kumara emyaka nka ikumi.
5 Batabani be babiri Maharooni na Kiriyooni na bo bakafa, kandi Naume yasigara atakyaine musaija n’abaana be babiri.
6 Nahabweki, akacwamu kutandika orugendo ali hamu na bakabaana be kuruga omu nsi ya Mowaabbu, habwokuba akaba ahuliire ngu Yahwe akaba aijukire abantu be, abahaire ebyokulya.*
7 Akaruga omu kiikaro nambere yaikaraga, ali hamu na bakabaana be babiri. Obu bakaba nibagenda omu nsi ya Yuda,
8 Naume yagambira bakabaana be ati: “Mugende, buli omu hali inywe agaruke omuka ya nyina. Leka Yahwe abooleke okugonza okutalekera oku munnyolekere n’okumwayolekere batabani bange batakafiire.
9 Leka Yahwe akigumye ngu buli omu hali inywe yatunga ah’okuhuumurra* omuka ya iba.” Hanyuma akabanywegera kandi boona barra nibateera omukungo.
10 Bakaikara nibamugambira bati: “Nangwa, nitugenda na iwe omu bantu baawe.”
11 Baitu Naume yabagambira ati: “Bahara bange, caali mugarukeyo. Habwaki nimugenda na nyowe? Mali ninkyasobora kuzaara abaana, abaraafooka baiba inywe?
12 Bahara bange, nimbeesengereza mugarukeyo. Mugende habwokuba nkaikwire muno kandi tinkyasobora kuswerwa. Noobu kyakubaire nikisoboka nyowe kutunga omusaija kiro kinu kandi nkazaara abaana aboojo,
13 mwakwikaire mubalindiriire kuhikya obu baakukuzire? Mwakwerekeseze kwongera kuswerwa ngu habwokuba mubalindiriire? Nangwa bahara bange, niinyehurra kubi muno habwanyu habwokuba Yahwe anyehindukiriire.”
14 Baayongera barra nibateera omukungo, hanyuma Orupa yanywegera nyinazaara yagarukayo. Baitu Ruusi akamugumiraho.
15 Nahabweki, Naume yamugambira ati: “Dora! Orupa agarukireyo omu bantu be n’omu baruhanga be. Na iwe garukayo na uwe.”
16 Baitu Ruusi yamugambira ati: “Otanyesengereza kuleka kugenda na iwe; habwokuba hoona nambere oraagenda na nyowe nuho ndaagenda, kandi nambere oraaraara na nyowe nuho ndaaraara, abantu baawe baraaba bantu bange, na Ruhanga waawe araaba Ruhanga wange.
17 Nambere olifeera na nyowe nuho ndifeera, kandi nuho ndiziikwa. Leka Yahwe anfubire muno kakuba habaho ekintu kyona kikannyahukaniza hali iwe, oihireho okufa kwonka.”
18 Naume obu yarozere ngu Ruusi akaba acweriiremu kimu kugenda na uwe, akalekeraaho kumutanga.
19 Kandi baayeyongerayo omu rugendo rwabo kuhika obu baahikire omu Bbeterehemu. Ahonaaho obu baahikire omu Bbeterehemu, orubuga rwona rukacamuka habw’okubarora kandi abakazi bakaba nibagamba bati: “Onu tali nuwe Naume?”
20 Yagambira abakazi abo ati: “Mutannyeta Naume.* Baitu munnyete Mara* habwokuba Ow’obusobozi Bwona agumanganiize muno obwomeezi bwange.
21 Nkaba nyijwire nambere nagendiire, baitu Yahwe andeetiire kugaruka ntaine kantu koona. Habwaki nimunnyeta Naume kandi kunu Yahwe nuwe anyehindukiriire, kandi Ow’obusobozi Bwona nuwe andeetiire obujune bunu?”
22 Ogu nugwo omulingo Naume yagarukire kuruga omu nsi ya Mowaabbu ali hamu na mukamwana we Omumowaabbu arukwetwa Ruusi. Akasumi nambere baagarukiire Bbeterehemu, kakaba k’okutandika kugesa sayiiri.
Obugambo Obuli Hansi
^ Nirimanyisa, “Ruhanga Wange Nuwe Omukama.”
^ Nirimanyisa, “Okusemererwa Kwange.”
^ Nirisobora kuba niriruga omu kigambo ky’Oruhebburaniya ekirukumanyisa, “kuceka; kurwara.”
^ Nirimanyisa, “ow’Alemerwe; ow’Ali Haihi Kuhwaho.”
^ Nkooku kiri, “omugaati.”
^ Rundi, “obulinzi.”
^ Nirimanyisa, “Okusemererwa Kwange.”
^ Nirimanyisa, “Kusarra.”
