Ruusi 3:1-18
3 Nubwo Naume, yagambira Ruusi ati: “Muhara wange, habwaki ntakuserurra eka,* nambere oraikara nukwo obe kurungi?
2 Bbowaazi tali munyabuzaale waitu? Nuwe ogu abaheereza be abakazi ab’obaire na bo. Kiro kinu rwebagyo naija kusegesa* sayiiri ha zigati ey’okusegeseraho.*
3 Nahabweki, yoga, oyesiige amagita agarukuboya; hanyuma ojwale kandi osirimuke ogende ha zigati ey’okusegeseraho.* Oteeyoleka omusaija ogu, kuhikya obu araamara kulya n’okunywa.
4 Obu araabyama, weetegereze nambere abyamire; hanyuma ogende osuukule ebigere bye kandi obyame. Naija kukugambira eki osemeriire kukora.”
5 Nubwo Ruusi yamugarukamu ati: “Byona ebi ongambiire niinyija kubikora.”
6 Nahabweki, Ruusi akasirimuka yagenda ha zigati ey’okusegeseraho* kandi yakora byona nyinazaara ebi akaba amugambiire.
7 Omu kasumi ako, Bbowaazi akalya, yanywa, kandi akaba asemeriirwe. Obu yamazire, yagenda yabyama ha kumalirra kw’omutuumo gwa sayiiri. Hanyuma, Ruusi akaija naasoobasooba yasuukura ebigere bya Bbowaazi, yabyama.
8 Omu itumbi, Bbowaazi akatandika kutukumira, yaimuka yaikarra, kandi yarora omukazi abyamire omu marambi ge.
9 Bbowaazi yamukaguza ati: “Niiwe oha?” Akagarukamu ati: “Niinyowe Ruusi, omuheereza waawe. Yanjurra ekijwaro kyawe onsweke, habwokuba oli mucunguzi.”
10 Nubwo Bbowaazi yamugambira ati: “Muhara wange, Yahwe akuhe omugisa. Ha murundi gunu, oyolekere okugonza okutalekera okwingi muno kukira oku wayolekere ha kubanza, habwokuba ocwiremu kutagenda n’abasigazi, kababe baguuda rundi banaku.
11 Muhara wange, otatiina. Niinyija kukukorra buli kimu kyona eki oraagamba, habwokuba buli muntu weena omu rubuga akumanyire nk’omukazi ow’engeso enungi muno.
12 Ky’amananu ngu ndi mucunguzi, baitu haroho omucunguzi ow’abaineho obuzaale obwa haihi muno kunkira.
13 Raara hanu kiro kinu, kandi obu araakucungura nyenkyakara, kirungi! Leka akucungule. Baitu obu araaba atarukugonza kukucungura, nyowe niinyija kukucungura omu ibara lya Yahwe, Ruhanga omwomeezi. Byama hanu kuhikya obu buraakya.”
14 Nahabweki akabyama omu marambi ga Bbowaazi kuhikya nyenkyakara, kandi yaimuka obwire butakakiire kurungi nambere abantu baba batarukusobora kumanyirrangana. Hanyuma Bbowaazi yagamba ati: “Hatabaho omuntu ayakimanya ngu haroho omukazi aizire ha zigati ey’okusegeseraho.”*
15 Akongera yagamba ati: “Leeta omwenagiro ogu ojwaire, kandi ogwanjurre.” Ruusi yagwanjurra, kandi Bbowaazi yaseesamu ebipimo mukaaga* ebya sayiiri, yagimwetwekesa, kandi Bbowaazi yagenda omu rubuga.
16 Akakwata omuhanda yagaruka hali nyinazaara, kandi nyinazaara yamukaguza ati: “Muhara wange, bikugendiire bita?”* Ruusi yamugambira buli kimu kyona omusaija eki amukoliire.
17 Akongera yagamba ati: “Ampaire n’ebipimo mukaaga ebya sayiiri kandi yangambira ati, ‘Otagaruka hali nyokozaara otaine kantu.’”
18 Nubwo Naume yamugambira ati: “Muhara wange, ikarra hanu, kuhikya obu oraamanya nkooku ensonga enu eraaba, habwokuba omusaija ogu tarukwija kuteekaana, kuhikya obu araatereekereza ensonga egi kiro kinu.”
