Ruusi 2:1-23
2 Naume akaba aine omunyabuzaale ow’akaba naaruga ha rubaju rwa iba, kandi akaba ali muguuda muno. Akaba naayetwa Bbowaazi kandi akaba naaruga omu kika kya Erimereki.
2 Ruusi Omumowaabbu akagambira Naume ati: “Caali nyikiriza ngende omu misiri, nsorooze* sayiiri ey’esigaliire, enyuma y’ogu weena arankwatirwa embabazi.” Naume yamugambira ati: “Genda muhara wange.”
3 Nubwo Ruusi yagenda, yatandika kusorooza* sayiiri ey’esigaliire omu musiri, enyuma y’abagesi. Kandi akeesanga ngu, omusiri ogu akaba naasoroozaamu gukaba gwa Bbowaazi, ow’akaba naaruga omu kika kya Erimereki.
4 Omu bwire obu bwonyini, Bbowaazi akaija naaruga Bbeterehemu kandi yaramukya abagesi ati: “Yahwe abe na inywe.” Na bo baamugarukamu bati: “Yahwe akuhe omugisa.”
5 Hanyuma, Bbowaazi akakaguza omusigazi ow’akaba ali mukuru w’abagesi ati: “Omukazi ogu omuto, naaruga omu ka y’oha?”
6 Omusigazi yamugarukamu ati: “Omukazi ogu omuto, Mumowaabbu ayaizire na Naume kuruga omu nsi ya Mowaabbu.
7 Ankagwizeege ati: ‘Ninsobora kusorooza sayiiri, abagesi ei balekere enyuma?’ Kandi aikaire naakora kuruga nyenkyakara obu aizirege, kuhikya hati obu yaikarra omu kiituuru kuhuumuraho habw’akacu kake.”
8 Nubwo Bbowaazi yagambira Ruusi ati: “Muhara wange, huliiriza. Otagenda omu musiri ogundi kusorooza ebisigaliire, kandi otagenda ahantu ahandi hoona. Ikara haihi n’abakozi bange abakazi.
9 Amaiso gaawe gaikaze ha musiri ogu baraagesa, kandi ogendege na bo. Ndagiire abasigazi batakukwataho.* Obu oraakwatwaga iroho, ogende onywe h’amaizi agali omu nsoha, abasigazi bange aga baraabaga batahire.”
10 Ruusi obu yahuliire eki, yateeza amaju yainama hansi kandi yamugambira ati: “Nsoboire nta kusiimwa omu maiso gaawe, kandi habwaki ontaireho omutima kandi kunu ndi munyamahanga?”
11 Bbowaazi yamugarukamu ati: “Bangambiire byona ebi okoliire nyokozaara hanyuma ya baro kufa, n’omulingo wasigireho so na nyoko hamu n’ensi ey’abanyabuzaale baawe, kandi waija omu bantu ab’okaba otamanyire.
12 Leka Yahwe akuhe emigisa habw’ebi ebi okozere kandi otunge empeera enyakwijwire* kuruga hali Yahwe Ruhanga owa Isaleeri, nambere oizire kuserra obwirukiro hansi y’amapapa ge.”
13 Nubwo Ruusi yagamba ati: “Weebale kunnyoleka embabazi mukama wange, habwokuba ompuumwize kandi wambaliza omu mulingo ogurukugarramu amaani, noobu kiraaba ngu tindi omu h’abaheereza baawe.”
14 Obu bakaba bali ha kiihuro, Bbowaazi akamugambira ati: “Ija hanu olye ha mugaati, kandi okoze omugaati gwawe omu maarwa agarukusarra.”* Nahabweki akaija yaikarra ha rubaju rw’abagesi. Hanyuma akamuhaho sayiiri ey’ekarangirwe, yalya yaiguta, kandi endi yasigaraho.
15 Obu yaimukire kusorooza sayiiri, Bbowaazi akaragira abasigazi be ati: “Mumuleke asorooze n’omu sayiiri* ey’esazirwe, kandi mutamutwaza kubi.
16 Kandi mukigumye ngu mwamusomorramu sayiiri kuruga omu miganda, mugireke enyuma nukwo agisorooze, kandi mutamutanga.”
17 Ruusi yagumizaamu naasorooza sayiiri omu musiri kuhikira kimu rwebagyo. Obu yatiire sayiiri ei akaba asoroize hakarugamu efa* nk’emu eya sayiiri.
18 Akagenda nayo omu rubuga kandi nyinazaara yarora sayiiri ei akaba asoroize. Ruusi akamuha n’ebyokulya ebikaba bisigaireho obu yaliire yaiguta.
19 Hanyuma, nyinazaara yamukaguza ati: “Kiro kinu, osorooliize* nkaha sayiiri? Okoliire nkaha? Leka ogu ow’akwolekere embabazi aheebwe omugisa.” Nubwo yagambira nyinazaara ebirukukwata ha mukama w’omusiri ogu akaba akoliiremu, ati: “Mukama w’omusiri nambere nkoliire kiro kinu, naayetwa Bbowaazi.”
20 Nubwo Naume yagambira omukamwana ati: “Leka Yahwe ow’atalemwa kwoleka okugonza kwe okutalekera hali aboomeezi n’abafu, ahe omusaija ogu omugisa.” Naume yagumizaamu naagamba ati: “Omusaija ogu atwineho obuzaale. Ali omu h’abacunguzi baitu.”
21 Hanyuma, Ruusi Omumowaabbu yagamba ati: “Ekindi, omusaija ogu angambiirege ati: ‘Ikara haihi n’abakozi bange kuhikya obu balimara kugesa.’”
22 Naume yagambira mukamwana we Ruusi ati: “Muhara wange, kirungi kugenda n’abakozi be abakazi, omu kiikaro ky’okugenda omu musiri ogundi kandi okatwazibwa kubi.”
23 Nahabweki, akaikara haihi n’abakozi ba Bbowaazi abakazi kandi yasorooza sayiiri eyasigaraga enyuma, kuhikya okugesa sayiiri n’engano obu kwahoire. Kandi akagumizaamu naikara na nyinazaara.
Obugambo Obuli Hansi
^ Rora, Kusoborra Ebigambo; “Kusorooza.”
^ Rora, Kusoborra Ebigambo; “Kusorooza.”
^ Rundi, “batakutalibaniza.”
^ Nkooku kiri, “enyakuhikiriire.”
^ Omu kasumi ka kara omu Isaleeri, abagesi baakiraga kukoza omugaati omu maarwa agarukusarra.
^ Rundi nikisobora kuhindurwa, “emiganda.”
^ Efa emu eya sayiiri ninganaingana nka kilo 13. Rora, Kusoborra Ebigambo; “Efa.”
^ Rora, Kusoborra Ebigambo; “Kusorooza.”
