Tukora kyona ekirukusoboka kutwaza abantu boona omu mulingo ogw’okugonza, ogw’ebambazi, n’okubatamu ekitiinisa. Kakuba omu h’Abakaiso ba Yahwe agarukirra rundi aleka kuheereza Yahwe, tumuhikirra, nitumugumya ngu nitukyamugonza, kandi tumukoonyera kugaruka hali Ruhanga.—Luka 15:4-7.

 Omu nyikara ezimu, ebikorwa by’omuntu nibisobora kumuleetera kwihwa omu kitebe. (1 Abakolinso 5:13) Baitu, habwokuba tugonza muno Abakristaayo bagenzi baitu, tukora kyona ekirukusoboka kukoonyera omuntu ogu nukwo ataihwa omu kitebe. Noobu yaakwihwa omu kitebe, twikara nitumutwaza omu mulingo ogw’okugonza kandi ogw’ekitiinisa, nkooku Baibuli erukutwekambisa kukora.—Marako 12:31; 1 Petero 2:17.

Kiki ekireetera omuntu kwihwa omu kitebe?

 Baibuli ekyoleka kurungi ngu kakuba Omukristaayo akora ekibi eky’amaani kandi akanga kwegarukamu, asemeriire kwihwa omu kitebe. a (1 Abakolinso 5:11-13) Baibuli etwoleka ebibi eby’amaani ebisobora kuleetera omuntu kwihwa omu kitebe. Ekyokurorraho, ebazaaho ebikorwa nka obusiihani, obutamiizi, obwisi, omuntu kutwaza kubi ab’omu ka ye hamu n’obusuma.—1 Abakolinso 6:9, 10; Abagaratiya 5:19-21; 1 Timoseo 1:9, 10.

 Baitu nabwo, omuntu taihwa omu kitebe ahonaaho hanyuma y’okukora ekibi eky’amaani. Abagurusi b b’ekitebe babanza kulengaho kumukoonyera nukwo asobole kuhindura engeso ze. (Abarooma 2:4) Batamu amaani kumuhika ha mutima, obu nibamutwaza omu mulingo ogw’embabazi kandi ogw’okugonza. (Abagaratiya 6:1) Eki nikisobora kukoonyera omusiisi kwetegereza ekibi kye kandi kimwekambise kwegarukamu. (2 Timoseo 2:24-26) Hanyuma y’okulengaho kumukoonyera emirundi nyingi, baitu akagumizaamu naacwa ebiragiro bya Ruhanga kandi akanga kwegarukamu, asemeriire kwihwa omu kitebe. Abagurusi bamanyisa ekitebe ngu omuntu ogu takyali omu h’Abakaiso ba Yahwe.

 Birungi ki ebiruga omu kwiha omuntu omu kitebe ow’acweriiremu kimu kugumizaamu naakora ekibi? Eky’okubanza, ekitebe kiikara nikisagika endengo za Ruhanga ezirukukwata ha ngeso ezeecumi, kandi kirinda abandi hali engeso embi. (1 Abakolinso 5:6; 15:33; 1 Petero 1:16) Ekindi, eki nikisobora kwekambisa omuntu ow’akozere ekibi kuteekamu amaani kukinoba n’okukireka.—Abahebburaniya 12:11.

Abakaiso ba Yahwe batwaza bata abo abaihirwe omu kitebe?

 Baibuli egambira Abakristaayo ‘kuleka kukoragana’ n’omuntu anyakwihirwe omu kitebe, “noobu kwakuba kulya hamu n’omuntu nk’ogu.” (1 Abakolinso 5:11) Nahabweki, titumara obwire n’omuntu owaihirwe omu kitebe, kandi titukoragana na uwe. Baitu titumwecweraho kimu. Tumutwaza omu mulingo gw’ekitiinisa. Naikirizibwa kwija kuramya na itwe omu nsorrokano, kandi Abakaiso ba Yahwe nibasobora kumuramukya. c Naasobora nookusaba abagurusi b’ekitebe obukoonyezi omu by’omwoyo.

 Kiki ekisobora kubaho kakuba omuntu aba aihirwe omu kitebe baitu ow’ali na uwe omu buswere n’abaana be bakyali Abakaiso ba Yahwe? Noobu kiraaba ngu aba atakyaramya Yahwe n’eka ye, enkoragana ye na bo eba ekyaroho. Habwokuba baikara omu nju emu, enkoragana ye n’ab’eka ye ikaraho.

 Omuntu ayaihirwe omu kitebe naasobora kusaba abagurusi kumubungira, kandi nibamuha obuhabuzi kuruga omu Baibuli, n’okumwekambisa kwegarukamu akagaruka hali Ruhanga. (Zaakaliya 1:3) Kakuba aleka ekibi kandi akooleka ngu naagonza kuhondera endengo za Baibuli, aikirizibwa kwongera kugaruka omu kitebe. Ekitebe nikiija “kumuganyira” kandi ‘kimuhuumuze,” nkooku Abakristaayo ab’omu Kolinso baakozere, omusiisi obu yayegarukiremu yaleka kukora ekibi kye.—2 Abakolinso 2:6-8.

Abo Abaihirweho omu Kitebe Beehurra Bata?

 Weetegereze bimu ha bigambo by’Abakaiso ba Yahwe abamu abaihirwe omu kitebe, baitu hanyuma baacwamu kugaruka hali Ruhanga.

 “Obu nacwiremu kugaruka omu kitebe, nkaba ninteekereza ngu abagurusi nibaija kugonza kumanya ebintu byona ebi nakozere omu myaka nyingi ei namazire nyihirwe omu kitebe. Baitu, bakangambira bati: ‘Nitugonza omutima ogute ha by’orukukora hati hatali eby’enyuma.’ Obu nahuliire eki, nkahurra mpuumuziibwe.”—Maria, United States.

 “Ab’omu kitebe bakaba baine ekihika eky’okundora ningaruka hali Ruhanga. Eki, kikandeetera kwehurra nk’ow’omugaso. Ab’oruganda na banyaanya itwe bakankoonyera kukigumya ngu nkaganyirwa kandi baanyekambisa kuta omutima ha by’omumaiso hatali eby’enyuma. Abagurusi baikara beeteekaniize kunkoonyera kugumya enkoragana yange na Ruhanga. Baangumya kandi baankooyera kukigumya ngu Yahwe naakyandora nk’ow’omugaso kandi nangonza.”—Malcom, Sierra Leone.

 “Nimpurra nsemeriirwe habwokuba Yahwe ayoleka ngu naagonza abantu be kuraba omu kwikaza ekitebe kye kiri kyecumi. Noobu kiraaba ngu abamu bateekereza ngu ekikorwa kinu tikiri ky’embabazi, nyowe ninkirora nk’ekirukwetaagisa kandi nikyoleka okugonza. Nikinsemeza ngu Isiitwe ow’omu iguru ali Ruhanga ow’okugonza kandi ow’okuganyira.”—Sandi, United States.