Exeni ambe enga jataka

Segundu menu jimbo nirani

Jeobaeri testiguecha

Purépecha

¿Jatsiaskiksï Jeobaeri testiguecha juramukuechani engaksï nobiuecheri ambe uandajka?

¿Jatsiaskiksï Jeobaeri testiguecha juramukuechani engaksï nobiuecheri ambe uandajka?

Jeobaeri testiguechachi jakajkusïnga eskaksï jorhenguarhikuecha ka juramukuecha engaksï Bibliarhu jaka, jarhuatasïngajtsïni erakuni imani ambe úni enga Tata Diosï jeiapanhintajka ka engajtsïni marhuachijka (Isaías 48:17, 18). Nochi jucha úkuarhiaska ini prinsipiuechani ka juramukuechani, peruchi úrasïnga juchari irekuarhu. Ju je exeani máru engaksï uandajka nobiuecheri ambe. *

  • Temungurhikua jindesti para méntkisï (Mateu 19:6). Jeobaeri testiguechachi exesïnga eska uérani nemani jingoni, jindeska ma ambe enga jimbo nema uáka niárani tembuchani o uambuchani. Jimbochisï no chʼanakueni exejka ini ambe.

  • Enga ma nótki jatirijka para uambuchani o tembuchani, no jatsisti para uérani nemani jingoni. Temungurhikua jindesti para imecha engaksï ‘jatirikia’, o para jiájkani enga na nitamajkia ima tiempu engaksï uénajka kánikua uinhapini eratsikuecha relasioni sexualiri ambe (1 Korintu 7:36).

  • Para úni uérani nema jingoni, ma jatsisti para libre jarhani para tembuchani o uambuchani. Enga nema diborsiadu jauaka, no arhikuekasïndi eska Tata Diosïri orhepani jimbo libre jarhaska para ménderu tembuchantani o uambuchantani. Tata Diosï solu jiájkantkusï jiókuarhijti eska nema diborsiarikuarhiaka, enga nema enganiariuaka témbani o uámbani (Mateu 19:9).

  • Kristianuecha engaksï uékajka tembuchani o uambuchani, jatsistiksï para solu imani erakuni enga imecheri mísmu relijionirhu jaka (1 Korintu 7:39). Jeobaeri testiguechachi solu jatsiska para uénani mítperani ka tembuchani o uambuchani nema jingoni enga itsï atakuarhikia komueska Jeobaeri testigu, no imani jingoni enga solu respetariajka juchari jakajkukuechani (2 Korintu 6:14). Tata Diosï méntkisï kurhakuasti imeri marhuarichani eskaksï solu tembuchaaka o uambuchani imecha jingontku engaksï májkueni jakajkujka (Génesis 24:3; Malaquías 2:11). Ka asta máru inbestigadorichaksï exestia eska i juramukua kánikua marhuasïnga. *

  • Uájpechaksï jatsisti para kurhajchaani imecheri tátichani (Proverbios 1:8; Kolosasi 3:20). Para uájpecha engaksï tátijembechani jingoni irekaka, i juramukua ístu arhikuekasïndi kurhandirani ambe engaksï ima uandaaka de nobiuni o nobiani jatsini. I ambe arhikuekasïndi eskaksï tátijembecha úpiringa arhiani na jatinksï uá jatsini nobiani o nobiuni ka ambeksï uá úni.

  • Biblia uandasïndi eskachi mándani arhini uandantaaka Tata Diosïni japarini na engachi jámajka (Gálatas 6:5, Traducción del Nuevo Mundo). Ísï jimbo, méntkisï engachi úraauaka Bibliaeri prinsipiuechani, Testiguechachi uáka erakukuarhini sinchi uékasïni uénani mítini nemani ka néua. Peru iámindu ini ambe mítiparini, uánikuaksï útasï kurhakuasïndi konseju erachichani engaksï kánikua jánhaskatiika ka engaksï uandanhiajka imechani jimbo (Proverbios 1:5).

  • Uánikua ambe enga kʼuiripu újka enga uérajka nemani jingoni, jindesïndiksï kʼérati pekaduecha. Biblia uandasïndi eska no sési jarhaska ísku jándikua ambe úni. Ísku jándikua, ístu jindesti pʼájchukperani jarhani, úrani penchumikua para relasioni sexuali jatsini o relasioni sexuali jatsini tátsepanisï ka máteru i jásï ambe, ka no solu jindesti jatsini relasioni sexuali entre imecha engaksï no temungurhirika (1 Korintu 6:9-11). Ístu engaksï nobiuecha putimukperajka oksï xáni pʼárperani jarhani engaksï jamberi uékajka apondini, úni jarhasïndiksï imani ambe enga Tata Diosï no sési exejka, nájkirukaksï no niáraaka relasioni sexuali jatsini (Galasia 5:19-21). Biblia ístu uandasïndi eska no sési jarhaska kíchakueni uandontskuarhini (Kolosasi 3:8).

  • Mintsita o juchari pʼikuarherakua uátijtsïni enganiarini (Jeremías 17:9). Uáti úni eska kʼuiripu ma uáka ambe ma enga mítika eska no sési jarhaska. Paraka mintsita no úraauaka ambe enga no sési jaka, nobiuecha engaksï márku uérajka, jatsistiksï para no tsimarhantku pakarani jimesïsï engaksï úpiringa no sési jásï ambe úni. Nobiuechaksï úpirindi no xáni problemechani jatsiani engaksï uérapiringa grupu ma jingoni o pámpiri ma jingoni (Proverbios 28:26). Kristianu ma enga uéjka tembuchani o uambuchani, mítisti eska peligrosueska Interneti jimbo jirinhani nemani, ka sánderia jimboka mítiska eska úpiringa kánikua no sési nikuni enga uénapiringa nobiuni o nobiani jatsini enga no káni mítika (Salmo 26:4).

^ párr. 2 No iámindu iretecharhu pʼindenhasti uérani nemani jingoni ante de tembuchani. Biblia no uandasïndi eska para ma, tembuchani o uambuchani nemani jingoni, uétarhisïnga antesi uérani imani jingoni ma tiempu o eskaksï solu ísï uáka tembuchani.

^ párr. 6 Ejemplu ma, seguni artikulu rebisteri ma enga temungurhikueri ka familieri ambe uandajka, “tanimu estudiuecha temungurhiricha jingoni engaksï ióni tembuchatini jakaia (jukari 25 uéxurhini) xarhatasïndiksï eska májkueni jásï relijioni ka jakajkukua ma jatsini, jindeska ma ambe enga újka eskaksï temungurhiricha durariuaka” (Marriage & Family Review, bolumeni 38, númeru 1, pájina 88, 2005).