Exeni ambe enga jataka

Segundu menu jimbo nirani

Jeobaeri testiguecha

Purépecha

Notisia rebisteri La Atalaya telebisioni groenlandesa jimbo

Notisia rebisteri La Atalaya telebisioni groenlandesa jimbo

Eneruni de 2013, rebista La Atalaya idioma groenlandés jimbo kuarenta uéxurhini andangutasti. Groenlandés, idioma máesti enga ireta inuit uandanhajka ka engaksï solu 57,000 kʼuiripu ísï uandajka.

Jini Groenlandia, jukari 150 Jeobaeri testiguechajkuksïsï jati, peru 2,300 kopiechaksï imprimirinhasïndi rebisteri Napasuliaq Alapernaarsuiffik (nombri rebisteri La Atalaya groenlandés jimbo). I ambe xarhatasïndi eskaksï sáno iámindu ima engaksï arhiantajka nóksï Jeobaeri testigueska.

Para telebisioniri entrebista ma, ima enga enkargadueka ofisineri para tradusirinhani jini iretarhu Nuuk, uandaspti: “Uánikua Groenlandia anapuechaksï tsitisïndi Bibliaeri ambe, ka jimboksïsï arhintajti rebistani”.

Enga entrebistarpiti kurhanguarhipka “¿Ambejtsï sánderu tsitisïni i rebisteri?”, traduktora Groenlandia anapu ma, mókuspti: “Na enga xáni marhuatspijka. Jíndendini kánikua jarhuatasti. Ejemplu ma, jorhendastirini sánderu sési irekani ka tsípikua jingoni. Antesi, kánikua itsutasïrenga nájkirukani mítipkia eska no sési útspisïrenga. Peru Bibliarhu jorhenguarhiska eska engachi uéjka no ma pʼamenchakua jingoni irekani, jatsiskachi para kuerpuni limpiu jatsini”.

Notisia ístu uandasïrendi eskaksï Jeobaeri testiguecha jarhaska Groenlandia desde uéxurhini sinkuenta terujkanisï ka eska imecheri kúnguarhikua uánikua libruechani ka foietuechani petaaskia Groenlandés jimbo. Traduktoricha engaksï jarhuajpijka Dinamarca ka Groenlandia anapuestiksï, ka méntkisïksï jánguarhintasïndi paraka traduksioni sési kurhaakuarhiaka ka sési kurhangukuarhini.

Jeobaeri testigu ma enga beintisinku uéxurhini páni jakaia aianguani groenlandesichani, uandaspti: “Exeska na enga xáni jukaparhakueka aiakuani kʼuiripuechani publikasionichani imecheri idioma jimbo. Máru iretecharhu engaksï iauani ísï jaka —enga solu barku jimbo újka niáranhani máru kutsïcharhu ma uéxurhini jimbo— jarhastiksï kʼuiripuecha engaksï kánikua tsitijka arhiantani juchari rebistechani. Ka jimbokachi no úsïnga méntku pʼorhembiani jarhani, karakuasïngachi ka axakuani juchari publikasionichani”.

Desde eneruni de 2013, Groenlandia anapuechaksï úsïndi jatsini rebistani La Atalaya para estudiu, ka ístu enga jindeka para iámindu kʼuiripu. Ka úsïndiksï késkuani ini tsimani rebistechani pájinarhu jw.org uératini.