Hi September 2025, a swi endla malembe ya 50 Timbhoni ta Yehovha ti ri enawini eNew Caledonia. Endzhaku ko ringeta ku kuma mpfumelelo wa xinawu ku ringana kambirhi, vamakwerhu a va tsake ni swikunwana loko va tsarisiwa ximfumo hi September 19, 1975.

Mahungu lamanene ma sungule ku chumayeriwa etikweni leri, leri nga swihlala eka malembe yo tlula 90 lama hundzeke. Hi va 1930, ntlawa lowutsongo wa Timbhoni a wu rhendzeleka ni swihlala leswi, wu ri karhi wu fambisa mikandziyiso ya le Bibeleni. Endzaku ka malembe yo tlula 20, vamakwerhu lava hisekaka va suke eAustralia va rhurhela eswihlaleni leswi. Loko va ri karhi va chumayela, va kume leswaku vo tala va swi tsakela ku dyondza Bibele. Hi August 1956, ku simekiwe vandlha ro sungula eNouméa.

Hiloko hi 1959, mfumo wu tshika ku pfuxeta maphepha ya vahlapfa, leswi endleke leswaku vamakwerhu va boheka ku tlhelela eka rikwavo. Eka lembe leri landzeleke, mikandziyiso ya hina hinkwayo yi yirisiwile. Un’wana loyi a bohekeke ku tlhelela eka rikwavo i Makwerhu John Hubler. Loko a vulavula hi mhaka yoleyo u te: “Vamakwerhu va kwalaho va hi byele leswaku vafundhisi etikerekeni va byele vanhu leswaku leswi ‘varhangeri’ va Timbhoni ta Yehovha va nga muka, Timbhoni ta kwalaho ti ta tlhelela etikerekeni.”

Makwerhu Jean-Pierre Francine, la nga un’wana wa Timbhoni to sungula ku khuvuriwa eNew Caledonia u te: “Hambileswi vamakwerhu va le Australia va bohekeke ku tlhelela eka rikwavo, ntlawa lowutsongo wa vahuweleri va 15 wu ye emahlweni wu chumayela. Ku yirisiwa ka mikandziyiso ya hina a swi ta va swi endle leswaku hi koka milenge kambe Yehovha u hi seketerile. A hi tirhisa Tibibele ntsena loko hi chumayela. Xintlawana lexiya xa hina xi sungule ku kula.”

Hi November 1962, hi pfumeleriwe ku tirhisa mikandziyiso leyin’wana hinkwayo handle ka Xihondzo xo Rindza ni Xalamuka! Hi ku famba ka nkarhi, mikandziyiso yoleyo na yona hi pfumeleriwe ku yi tirhisa. Endzhaku ka n’hweti hi tsarisiwe ximfumo hi September 1975, vamakwerhu va le New Caledonia va amukele varhumiwa vo sungula lava humaka eGiliyadi, ku nga Marc na Paulina va ka Fosset. Hi June 1976, ku pfuriwe hofisi ya rhavi eNouméa. Swi nga si ya kwihi, ku akiwe Holo ya Mfumo yo sungula ya Timbhoni ta Yehovha edorobeni rero.

Eka malembe lama tlulaka 50, vamakwerhu eNew Caledonia va ya emahlweni va chumayela mahungu lamanene hi ku hiseka. Sweswi hi vulavulaka, ku ni vahuweleri va kwalomu ka 2 700 ensin’wini ya rhavi ra tiko rero. Lexi tsakisaka, ku ve ni vanhu va 7 833 eXitsundzuxweni xa rifu ra Yesu hi 2024, ku nga nhlayo leyi tlulaka ya vahuweleri kanharhu.

Ha tsaka ku vona leswaku Yehovha u ya emahlweni a katekisa ntirho wa hina eNew Caledonia. Endzhaku ka malembe ya 50 vamakwerhu va kume mpfumelelo, va ha “tiyimisele ku chumayela mahungu lamanene.”—Varhoma 1:15.