Rut 4:1-22
4 Ja Boaz tixa waj ja bʼa spuertaʼil ja chonabʼi sok ti och kulana. Yajni yila ti ekʼum ja manbʼanum bʼa staʼunej tiʼali, spaya sok yalayabʼi: «Laʼ il sok kulanan». Ja yuj ja manbʼanumi tixa waja sok och kulan.
2 Tsaʼan, ja Boaz spayajan 10 winike bʼa ay xchole ja bʼa chonabʼi sok yalayabʼye: «Kulananik». Jaxa yeʼnleʼi ochye kulan.
3 Anto ja Boaz yalayabʼ ja manbʼanumi: «Ja Noemí yaʼatakan ja slujmal Moab, ja yuj tʼilani oj xchonkan ja luʼum bʼa yeʼnsbʼaj ajyi ja kermanotik Elimélec.
4 Jpensaraʼan oj kalawabʼ ja it: ‹Mana ja luʼum bʼa stiʼsat ja kristyanoʼik sok bʼa stiʼsat ja winike bʼa ay xchole ja bʼa jchonabʼi. Ta lek xa wila, mana, pe ta mi oja mane, alakabʼi bʼa oj jnaʼe. Yujni ja keʼn cha ay kiʼoj ja derecho bʼa oj jmane›». Jaxa manbʼanumi yala: «Puestoʼayon bʼa oj jmane».
5 Jaxa Boaz yalayabʼi: «Yajni xa mana ja sluʼum ja Noemí, cha tʼilani oja man ja xcheʼum ja skerem chameli, ja Rut, ja moabita, bʼa jachuk ja sbʼiʼil ja dejunto mi oj chʼayuk* ja bʼa spamilya».
6 Yajni yabʼ ja manbʼanumi yala: «Mi oj jbʼobʼ jmane, yujni oj xchʼay ja jdote. Amakunuk ja jderecho bʼa weʼn oja mane, yujni ja keʼn mi oj jbʼobʼ jmane».
7 Ja bʼa tyempo jaw, ja kostumbre yiʼoje bʼa Israel, ta jun winik wa skʼana oj skʼuluk chikan jas trato bʼa ti chʼikansok ja sderecho yiʼoj bʼa smanjeli sok oj ya ekanyi pilan, tʼilani oj sop june ja swarachi sok oj yayi ja maʼ oj yikani. Jachni wa skʼulane jun akuerdo ja bʼa Israel.
8 Ja yuj ja manbʼanumi sopo june ja swarachi yajni yalayabʼ ja Boaz: «Mana weʼna».
9 Anto ja Boaz yalayabʼ ja winike bʼa ay xchole sok yibʼanal ja matik teyi: «Ja wego wala kanyex testigo ke wa xmanayi ja Noemí yibʼanal ja jas wa sbʼajin ja Elimeléc sok yibʼanal ja jas wa sbʼajine ja Kilión sok ja Mahlón.
10 Chomajkil wala nupaniyonsok ja Rut, ja moabita, ja xcheʼum ajyi ja Mahlón, bʼa jachuk ja sbʼiʼil ja dejunto ti oj kanuk ja bʼa sdote yiʼoji, jaxa yermanoʼik sok ja kristyanoʼik ja bʼa chonabʼi mi oj chʼayskʼujole ja sbʼiʼili. Ja wego wala kanyex testigo».
11 Spetsanil ja matik tey ja b’a spuerta’il ja chonab’i sok ja winike bʼa ay xchole yalawe: «¡Wala kantikon testigo! Ja Jyoba aya koʼyi slekilal ja maʼ oj nupanansoki, jastalni ja Raquel sok ja Lea bʼa yeʼn yawe kujlajuk ja chonabʼ Israel. Apojxuk jawa wintil ja bʼa Efrata sok anajukabʼaj lek ja bʼa Belén.
12 Sok yuja wa wintil oj yawi ja Jyoba yuja ixuk it, akʼot niwan lek jawa pamilya jastal ja spamilya ja Pérez, ja skerem ja Tamar bʼa yayi ja Judá».
13 Anto ja Boaz yiʼaj ja Rut sok kʼot xcheʼum. Staʼasbʼajsok, jaxa Jyoba yaʼakan oj kan embarazada sok ajyi jun skereme.
14 Jaxa ixukeʼi yalaweyabʼ ja Noemí: «Aʼaxukyi stoyjel ja Jyoba yuja yaʼunejawi juna manbʼanum. ¡Ja sbʼiʼil ja yal keremi, atajuk tiʼal ja bʼa Israel!
15 Ja yal kerem it oj cha ya ajyan gusto. Yajni la awelaxi oj stalnaya, yujni jaʼ kʼotel skerem jawa walibʼ bʼa jel skʼanawa sok masni lek ja yeʼn ke yuj siete awuntikil».
16 Ja Noemí tixa yiʼaj ja yal keremi, sok yeʼnani ja maʼ stalnay bʼa yajel kʼiʼuk.*
17 Anto ja besinaʼiki sleʼaweyi sbʼiʼil ja yal keremi. Yalawe: «Ajyita jun yal skerem ja Noemí», sok yawe sbʼiʼiluk Obed. Ja yunin ja Obed jaʼa Jesé sok ja yunin ja Jesé jaʼa David.
18 Ja it jaʼa yintil ja Pérez: ja yunin ja Pérez jaʼa Hezrón;
19 ja yunin ja Hezrón jaʼa Ram; ja yunin ja Ram jaʼa Aminadab;
20 ja yunin ja Aminadab jaʼa Nahsón; ja yunin ja Nahsón jaʼa Salmón;
21 ja yunin ja Salmón jaʼa Boaz; ja yunin ja Boaz jaʼa Obed;
22 ja yunin ja Obed jaʼa Jesé sok ja yunin ja Jesé jaʼa David.
