Rut 3:1-18
3 Jaxa Noemí yalayabʼ ja Rut: «Kala akʼix, t’ilani oj jleʼawi jun lugar* bʼa oj wajukawuj lek.
2 Ja Boaz jpamilyatikto, jaxa ixuke aʼtijiyasoki jani ja yaʼtijumiki. Kʼela, ja bʼa akwal it, ja yeʼn oj wajuk ja bʼa lugar bʼa xchijeli bʼa oj waj xchij ja cebada.
3 Ja yuj atnan sok jaxabʼaj aseyte bʼa jel x-ajbʼani yikʼil. Tsaʼan, lapa jawa kʼu mas lek sok kaʼax ja bʼa lugar bʼa xchijeli. Pe talnabʼaj mok yaʼsbʼaj kuenta ja Boaz ke teya tiw man xchʼak waʼuk sok xchʼak yuʼe.
4 Yajni xwaj wayuk, kʼela bʼa oj och bʼaʼana. Anto kaʼax, joloyi ja bʼa yoki sok ti la och bʼaʼan bʼa stsʼeʼel yok. Jaxa yeʼn oj yalawabʼ ja jas tʼilan oja kʼuluki».
5 Jaxa Rut sjakʼayi: «Jachni oj chʼak jkʼuluk».
6 Anto tixa waj ja bʼa lugar bʼa xchijeli sok skʼulan spetsanil ja jas aljiyabʼ yuja yalibʼi.
7 Jaxa Boaz waʼi, yuʼaj sok gustoʼaxi. Anto tixa och bʼaʼan mojan ja bʼa monton cebada. Tsaʼan, ja Rut chʼabʼanxta mojxiʼoche, sjoloyi ja bʼa yoki sok tixa och bʼaʼan bʼa stsʼeʼel ja yoki.
8 Ja bʼa nalan akwali, ja Boaz och kʼitkʼunuk yuja cheʼeji, ja yuj tixa kʼe jachana sok yila tey jun ixuk bʼaʼan ja bʼa stsʼeʼel ja yoki.
9 Tixa sjobʼoyiʼa: «¿Machʼayaʼa?». Jaxa yeʼn sjakʼayi: «Keʼn ja Rut, jawa waʼtijum ixuki. Lichʼa jawa palkʼu sbʼaja wa waʼtijum ixuki,* yujni kʼotela jun manbʼanum».
10 Jaxa Boaz yalayab’i: «Kala akʼix, aya koʼuka lekilal ja Jyoba. Pes ja yajalkʼujol mey stikʼanil wana sjejel ja wego mastoni ekʼxel ke yuja jastal wa jeʼunej bʼajtani, yujni mi wajakʼujol slejel jun winik bʼa mitoʼayskʼujol, bʼa riko ma pobre.
11 Ja yuj kala akʼix, mok xiwan, oj chʼak jkʼuluk ja jas waxa wala, yujni spetsanil ja swinkil ja chonabʼi wa snaʼawe ke kʼotela jun lekil ixuk.
12 Meran, ama ja keʼn kʼotelon jun manbʼanum, pe ayni jun pilan manbʼanum masto apamilya.
13 Ti la kan il ja akwal it. Sok ta ja yeʼn xyala oj smana ja bʼa saʼansakbʼeli, jelni lek sok a-skʼuluk. Pe ta mi skʼana oj smana, meran lek wa xkalawabʼi, jastalni meran sakʼan ja Jyoba, keʼnani oj jkʼuluk. Ja wego ti la kan bʼaʼan il man sakbʼi».
14 Ja yujil, ja Rut tixa och bʼaʼan bʼa stsʼeʼel ja yok ja Boaz man yajni ojxa sakbʼuk, sok yajni mito xchiknaji tixa kʼeʼa bʼa jachuk mi oj najuksbʼaj. Anto ja Boaz yala: «Mok maʼ snaʼ ta jakya ja bʼa lugar bʼa xchijel ja cebada».
15 Sok cha yala: «Iʼajan jawa palkʼu lapanawuji, lichʼa sok yama lek». Anto ja Boaz ya ochuk seis medida* bʼa cebada. Tixa slikaʼa, yayi ja Rut bʼa oj skuche sok jaxa Rut kumxi ja bʼa chonabʼi.
16 Yajni kʼot ja bʼa snaj ja yalibʼi, jobʼjiyi: «Kala akʼix, ¿jastal wajawuj?». Jaxa Rut xcholoyabʼ yibʼanal ja jas skʼulan ja Boaz
17 sok cha yala: «Yaki 44 litro bʼa cebada sok yalakabʼ ke ‹Mok kumxukon lom ja bʼa snaj ja kalibʼi›».
18 Anto ja Noemí yalayabʼ: «Kala akʼix, ja wego majlay jastal oj elkʼot ja it, yujni ja Boaz mi oj jijluk ja kʼakʼu it man xchʼak stojbʼes».
