Rut 1:1-22
1 Ja b’a tyempo k’ulwaniye jusgar ja juesiki, ajyi jun tyempo b’a waʼin ja b’a paisi. Jun winik ja b’a Belén b’a Judá wajsok ja xcheʼumi sok ja chabʼ yuntikil ja b’a slujmal Moab b’a ti oj ajyuke jastal june bʼa pilan país.
2 Ja winiki sbʼiʼil Elimélec,* jaxa xcheʼumi sbʼiʼil Noemí,* sok jaxa chabʼ yuntikile, sbʼiʼil Mahlón* sok Kilión.* Tisbʼaje ajyi bʼa Efrata, wa xkʼan alxuk, bʼa Belén bʼa Judá. Ti kʼotye bʼa slujmal Moab sok ti kanye tiwi.
3 Ekʼ ja tyempo, ja Elimélec chami. Anto ja xcheʼum Noemí sok ja chabʼ yuntikili, kanye stuchʼile.
4 Mas tsaʼan, ja yuntikili nupaniyesok ixuke bʼa Moab: ja juni sbʼiʼil Orpá, jaxa pilani sbʼiʼil Rut. Sok ti ajyiye tiw junuk 10 jabʼil.
5 Tsaʼan, ja Mahlón sok ja Kilión chamye, ja yuj ja Noemí chʼayuj ja statami sok ja chabʼ yuntikili.
6 Anto tixa kumxi ja bʼa spaisi soka chabʼ yalibʼi, yujni yabʼta ke ja Jyoba cha wanxa yajel koʼyi slekilal ja xchonabʼ sok wanxa yajelyi swaʼel.*
7 Ja yuj ja Noemí soka chabʼ yalibʼi elye ja bʼa lugar bʼayeʼi. Yajni kumxume ja bʼa slujmal Judá,
8 ja Noemí yalayabʼ ja yalibʼiki: «Mas lek kaxik, kumxanik ja bʼa snaj jawa nanexi. Sok ja Jyoba a-sjeʼawilex yajalkʼujol mey stikʼanil, jastalni ajeʼunejexki ja keʼn sok ja kuntikili.*
9 Ja Jyoba ayawilex juna tatamex sok jun lugar bʼa seguro oj ajyanik».* Anto tixa yujtsʼan xchawanile’a, sok jaxa yeʼnle’i tsatsxta k’e okʼuke.
10 Sok yalaweyabʼi: «Miyuk, mi oj kumxukotikon, oj wajkotikonamok sok ti oj ajyukotikonsok jawa chonabʼi».
11 Pe ja Noemí yalayabʼye: «Kala akʼixuk, kumxanik. ¿Jas yuj oj jakanikjmoki? Mixa oj ajyuk kuntikil bʼa oj cha nupananiksok.
12 Kaxik, kumxanik kala akʼixuk, yujni ja keʼn awelonxa sok mixa ojto nupanukon. Lekbʼi la nupaniyonto ja akwal it sok x-ajyito kuntikil,
13 ¿ojto maʼ amajlayex oj kʼiʼuke bʼa oj cha nupananiksok? ¿Oj maʼ kuchukawujilex bʼa mi oj nupananik? Miyuk, kala akʼixuk. Pes ja Jyoba ochta skontraʼukon, sok yajni wa xpensaraʼan jastal wanex yijel wokol yuja it, jelni x-och jtristeʼil».
14 Anto ja yeʼnleʼi cha kʼe okʼuke tsats. Tsaʼan, ja Orpá yujtsʼankan ja yalibʼi sok kumxi, pe ja Rut mini skʼana oj yakani.
15 Ja yuj ja Noemí yalayabʼi: «Kʼela, jawa moj alibʼali kumxita ja bʼa xchonabʼi sok sbʼaja sdyosiki. Kumxansok».
16 Pe ja Rut yalayabʼi: «Mok wa kʼokxukon oj kaʼakani, yujni ja bʼa oj wajan ja weʼn ti oj wajkon ja keʼn, sok ja bʼa oj ekawuj ja akwali ti oj ekuj ja akwali. Jawa chonabʼi ja oj jchonabʼuk, sok jawa Dyosi ja oj jDyosuk.
17 Ja bʼa oj chaman ja weʼn ti oj chamkon ja keʼn, sok ti oj mukjukona. A-skʼulukon kastigar tsats lek ja Jyoba ta jpilajbʼaj yuj pilan jasunuk bʼa mi jaʼuk ja chamelali».
18 Yajni ja Noemí yila ke mi xkʼokxiyuj ja Rut bʼa oj ajukani, tixa yaktakana.
19 Sok xchawanile kumxiye man Belén. Yajni kʼotyeʼi, jelni chamyabʼye ja swinkil ja chonabʼi, ja ixukeʼi och yal-e: «¿Jaʼ it ja Noemí?».
20 Jaxa Noemí yalayabʼye: «Mok wawex jbʼiʼiluk Noemí.* Awik jbʼiʼiluk Mara,* yujni ja Maʼ jel ja yipi yaʼunej och jtristeʼil.
21 Yajni elyoni jelni jas kiʼoj, pe ja Jyoba chʼakta sjapki. ¿Jas yuj wa xwawex jbʼiʼiluk Noemí? Ja Jyoba kontraniʼayjmok. Ja Maʼ jel ja yipi jel yaʼunej kiʼ wokol».
22 Jachuk ja Noemí sok ja yalibʼ Rut, ja moabita, elye ja bʼa slujmal Moab. Sok yajni kʼotye ja bʼa Belén, jani kʼeʼum ja styempoʼil bʼa stuljel cebada.
Notaʼik
^ Wa stojolan ‹ja jDyosi kʼotel rey›.
^ Wa stojolan ‹lek xkila› ma ‹ja jgustoʼil›.
^ Bʼobʼta ti jakel bʼa jun yaljel hebreo wa stojolan ‹mey yip› ma ‹wa xmaloʼaxi›.
^ Wa stojolan ‹ja maʼ wa xmokʼi› ma ‹ja maʼ ti wa xkʼot tikʼani›.
^ Jach kanel ja bʼa hebreo: «pan».
^ Ma «ja winike chamyeta».
^ Jach kanel ja bʼa hebreo: «lugar bʼa jijlel».
^ Wa stojolan ‹lek xkila› ma ‹ja jgustoʼil›.
^ Wa stojolan ‹tristeʼil›.
