Rut 2:1-23
2 Ja statam ajyi ja Noemí ay jun spamilya jel riko sbʼiʼil Boaz. Ja winik it wajni jun spamilya ja Elimélec.
2 Ja Rut, ja moabita, yalayabʼ ja Noemí: «Aʼakan oj wajkon ja bʼa alaj bʼa oj kil ta ay maʼ oj yakan oj jtsom* ja bʼa wanto xkanyujile ja trigo». Jaxa Noemí sjakʼayi: «Kaʼax kala akʼix».
3 Ja yuj tixa waj ja bʼa alaji sok kʼe stsom ja bʼa wanto xkanyujile ja aʼtijumiki. Pe tojxta kʼot ja bʼa yalaj ja Boaz, bʼa jani spamilya waj ja Elimélec.
4 Ja bʼa jutsʼin jaw, ja Boaz kʼot ja bʼa yalaji sok yalayabʼ ja aʼtijumiki: «Ja Jyoba ti x-ajyiʼamokex». Jaxa yeʼnleʼi sjakʼaweyi: «Ja Jyoba aya koʼuka lekilal».
5 Anto ja Boaz sjobʼoyi ja maʼ kajansbʼaj wa skʼela ja aʼtijumiki: «Ja akʼix jawi, ¿maʼ spamilya?».
6 Ja maʼ kajansbʼaj wa skʼela ja aʼtijumiki sjakʼayi: «Ja akʼixi jun moabita bʼa slujmal Moab sok teysok ja Noemí.
7 Ja yeʼn yalakabʼi: ‹Awa pabor, aʼakan oj jleʼ sok oj jtsom ja trigo wa xkanyujile ja bʼa stsomoweta* ja aʼtijumiki›. Sok man kʼe aʼtijuk ja bʼa saʼansakbʼeli me xjijli, wanto och kulan bʼa oj jijluk jutsʼin ja bʼa lejchupatik».
8 Mas tsaʼan, ja Boaz yalayabʼ ja Rut: «Kala akʼix, maklayon. Mok waja tsom bʼa pilan alaj. Ti la ajyi ili, ti la kansok ja kaʼtijumik ixukeʼi.
9 Kʼela ja bʼa wane aʼteli sok ti la waja. Kalunejyabʼye ja keremtik ke mok yixtalaʼuka. Yajni xtaki atiʼ, kaʼax ja bʼay ja yeʼtalik jaʼi sok ukʼan ja jaʼ wa xyawe eluk ja keremtiki».
10 Yajni ja Rut yabʼ ja it, koʼ mekʼan sok koʼ tinan man luʼum, tixa sjobʼoyiʼa: «¿Jas yuj lek waxa wilawoni? ¿Jastal lek wa xchamakʼujol bʼa keʼna ama mi ti jbʼajuk ili?».
11 Jaxa Boaz sjakʼayi: «Choljitakabʼ yibʼanal ja jasa kʼulunejyi jawa walibʼi man yajni cham jawa tatami, awaʼakan jawa tati, jawa nani sok elya ja bʼa lugar ajyiya bʼa oj ajyan bʼa jun chonabʼ bʼa mixa naʼasbʼaj.
12 Ja Jyoba a-stupawi ja jasa kʼuluneji. Ayawi juna tsʼakol tsʼikan lek ja Jyoba, ja sDyos ja Israel, yujni aleʼunej akoltajel ja bʼa yibʼ swechʼi».
13 Jaxa Rut yalayabʼi: «Kala kajwal, wani xkʼana lek oja wilon, yujni awaʼunejki kulanjkʼujol, sok yaʼunej ajyukon laman yuja jasa walunej ama mi kʼotelukon june ja bʼa wa waʼtijumik ixukeʼi».
14 Sok yajni staʼa ja ora bʼa waʼeli, ja Boaz yalayabʼi: «Laʼ, iʼaj xen pan sok laʼa bʼa pajal vino». Anto ja yeʼn tixa och kulan ja bʼa stsʼeʼel ja aʼtijumiki. Ja Boaz yayi bʼakbʼel trigo, jaxa yeʼn waʼi man bʼutʼi sok kantoyuj sobra.
15 Yajni ja Rut cha kʼe stsom ja bʼa wanto xkan ja trigo, ja Boaz yalayabʼ ja aʼtijumiki: «Cha awikan ke ayiʼ ja bʼa wanto xkan ja bʼa wa tsomowexta sok moka wixtalaʼukex.
16 Cha awik elkan tʼusan ja bʼa manojoʼik tsomanxa sok awik mokani bʼa jachuk oj ekʼstsome. Sok moka komex».
17 Ja Rut mini yaʼakan stsomjel ja bʼa alaji man och ja kʼakʼu. Yajni chʼak smakʼ ja bʼa stsomota, stsomoni junuk 22 litro* bʼa cebada.
18 Anto tixa yiʼaj sok kumxi ja bʼa chonabʼi, sok sjeʼayi ja yalibʼ ja janekʼ stsomoʼi. Cha ya eluk ja waʼelal bʼa kanyuj sobra ja yajni waʼi sok yayi ja yalibʼi.
19 Jaxa yalibʼi sjobʼoyi: «¿Bʼa atsomo ja kʼakʼu it? ¿Bʼa aʼtijiyaʼa? Ja Dyosi aya koʼyi slekilal ja maʼ chamskʼujol bʼa weʼna». Ja yuj ja Rut xcholoyabʼ ja maʼ aʼtijisok. Yalayabʼi: «Ja winik maʼ aʼtijiyonsoki sbʼiʼil Boaz».
20 Yajni ja Noemí yabʼ ja it, yala: «Ja Jyoba, ja maʼ sjeʼunejyi yajalkʼujol mey stikʼanil ja matik sakʼani sok ja chamwiniki, aya koʼyi slekilal». Sok cha yala: «Ja winiki jpamilyatikto. Jani june ja bʼa jmanumantiki».*
21 Anto ja Rut, ja moabita, cha xcholoyabʼi: «Sok yalakabʼi: ‹Ti la kansok ja kaʼtijumik man yajni xchʼak stsom-e›».
22 Jaxa Noemí yalayabʼ ja Rut: «Lek, kala akʼix, mas lek jaʼ la wajsok ja yaʼtijumik ixukeʼi. Jachuk mi maʼ oj yixtalaʼuka ja bʼa pilan alaji».
23 Ja yujil, ja Rut ti ajyi mojan soka yaʼtijumik ixuke ja Boaz bʼa stsomjel, man chʼak ja styempoʼil bʼa stsomjel ja cebada sok ja trigo. Sok jaxa Rut tini ajyi soka yalibʼi.
Notaʼik
^ Ma «oj jtsom ja sobraʼik». Kʼela ja bʼa Yaljelik cholubʼal, Stsomjel.
^ Ma bʼobʼta «ja manojoʼik bʼa mochan».
^ Jach kanel ja bʼa hebreo: «efá». Kʼela ja apéndice B14.
^ Ma «june ja bʼa jpamilyatik bʼa ayiʼoj ja derecho bʼa oj smanotik (skoltayotik)». Kʼela ja bʼa Yaljelik cholubʼal, Manbʼanum.
