Juan 9:1-41
9 Yajni ekʼumi, ti yila jun winik mi xyila kʼinal man pojki.*
2 Sok ti jobʼjiyi yuja snebʼumaniki: «Maestro,* ¿maʼ sleʼa smul yuja mi xyila kʼinal man pojki ja winik it: yeʼn maʼ, ma jaʼa snantati?».
3 Ja Jesús sjakʼayile: «Mini yeʼn sleʼa smul sok mini ja snantati, pe jachni ekʼ sbʼaj bʼa oj ilxuk jaman lek ja jas wa xbʼobʼ skʼuluk ja Dyosi.
4 Tʼilani oj jkʼuluktik ja yaʼtel ja Maʼ sjekawon ja yajni sat kʼakʼujto; pes yajni wa x-eljul ja akwali, mini maʼ xbʼobʼ aʼtijuk.
5 Yajni tito ayon ja bʼa luʼumkʼinali, keʼnon ja ijlabʼ ja bʼa luʼumkʼinali».
6 Yajni chʼak yal ja it, tsujbʼani bʼa luʼum, jaxa soka stsujubʼi skʼulan lokok. Tixa sbʼalayi bʼa sat ja winiki
7 sok yala yabʼi: «Kax sakʼa jawa sat bʼa niwan tanke bʼa Siloam» (ja it wa sutxi «jekubʼal»). Tixa waja, sakʼa, sok yajni kumxi, wanxa xbʼobʼ ilwanuk.
8 Jaxa besinoʼik sok ja matik yilawe wa skʼana limosna ajyi och yal-e: «¿Anke yeʼnani ja winik it ja maʼ wa xkulani skʼanjel limosna ajyi?».
9 Jujuntik wa xyalawe: «Yeʼnaniʼa». Tuk wa xyalawe: «Mini yeʼnuk, pe jaxani ela». Jaxa winiki wa xyala: «Keʼnaniʼa».
10 Ja yuj ti sjobʼoweyiʼa: «Anto, ¿jastal jamxi jawa sati?».
11 Jaxa yeʼn sjakʼayile: «Ja winik maʼ sbʼiʼil Jesús skʼulan lokok, sbʼalayi ja jsati sok yalakabʼi: ‹Kax bʼa Siloam sok sakʼa jawa sati›. Jaxa keʼn wajyon, jsakʼa sok bʼobʼxa ilwanikon».
12 Anto sjobʼoweyi: «¿Bʼaxa ay ja winik jawi?». Ti sjakʼaʼa: «Mi xnaʼa».
13 Ja yeʼnleʼi yiʼaje och bʼa stiʼ sat ja fariseoʼik ja winik mi xyila kʼinal ajyi.
14 Pe ja kʼakʼu skʼulan lokok ja Jesús sok sjamayi ja sati skʼakʼujilni sábado.
15 Ja yuj ja fariseoʼiki cha och sjobʼeyi jastal lek wanxa xyila kʼinal. Ja yeʼn sjakʼayile: «Sbʼalayi lokok ja jsati, tixa jsakʼaʼa sok ja wego wanxa la ilwaniyon».
16 Anto jujuntik ja bʼa fariseoʼik och yal-e: «Ja winik jaw mi jaʼ jekubʼaluk yuja Dyosi, yujni mi skisa ja sábado». Tuk wa xyalawe: «Pe ¿jastal modo jun mulanum wa xbʼobʼ skʼuluk milagroʼik* jastal it?». Mini slaja sbʼajyujile.
17 Sok ti cha yalawe yabʼ ja winik mi xyila kʼinal ajyi: «Yuja yeʼn sjamawi jawa sati, ¿jas waxa pensaraʼan bʼa yeʼna?». Ja winiki sjakʼayile: «Juni aluman».
18 Pe ja judíoʼiki mini skʼuʼane ta mi xyila kʼinal ajyi ja yeʼn sok wanxa xyila ja wego, man spayawe ja snantat ja winiki.
19 Ti sjobʼoweyiʼa: «¿Ja maʼ it jawa keremex ja maʼ waxa walawex mi xyila kʼinal man pojkiʼi? Anto, ¿jastal lek wanxa x-ilwani ja wego?».
20 Jaxa snantati sjakʼaweyi: «Wani xnaʼatikon yeʼnani ja jkeremtikoni sok mi xyila kʼinal ja pojki.
21 Pe mini xnaʼatikon jastal lek wanxa xyila kʼinal ja wego; cha mini xnaʼatikon maʼ sjamayi ja sati. Jobʼowikyi yeʼna, pes ayxani skʼujol sok ayalawabʼyex yeʼna».
22 Ja snantati jachni sjakʼawe yujni wa xiwyeyuj ja judíoʼiki; pes ja judíoʼiki ochelexa akuerdo bʼa oj yawe eluk ja bʼa naʼits wa stsomo sbʼaje ja maʼ wa xyala yeʼnani ja Kristo ja Jesusi.
23 Ja yuj ja snantati yalawe «Ayxa skʼujol. Jobʼowikyi yeʼna».
24 Ja yujil, spayawe bʼa xchabʼil ekʼele ja winik mi xyila kʼinal ajyi sok yalawe yabʼi: «Ala bʼa stiʼ sat Dyos ja smeranili. Ja keʼntikoni wa xnaʼatikon ja winik jaw juni mulanum».
25 Ja yeʼn sjakʼayile: «Ja keʼn mi xnaʼa ta jun mulanum ja yeʼn. Ja jas kechan wa xnaʼa: mini xkila kʼinal ajyi sok wanxa ja wego».
26 Anto sjobʼoweyi: «¿Jas skʼulanawi? ¿Jastal sjamawi jawa sati?».
27 Jaxa yeʼn sjakʼayile: «Kalatawabʼyex, pe mi akisawonex. ¿Jas yuj waxa kʼanawex oja wabʼyex pilan ekʼele? ¿Mi maʼ yuj waxa kʼanawex oj cha ochanik snebʼuman ja weʼnlexi?».
28 Yajni yabʼye ja it, ja yeʼnleʼi skʼakʼlaye jachuk: «Ja weʼn snebʼumana ja winik jaw, pe ja keʼntikoni snebʼumanotikon ja Moisés.
29 Wa xnaʼatikon ja Dyosi skʼuman ja Moisés, pe ja winik it mi xnaʼatikon bʼa eleljana».
30 Jaxa winiki sjakʼayile: «Ja jaw jelni cham yabʼjela, ja yeʼn sjamaki ja jsati jaxa weʼnlexi mixa naʼawex bʼa eleljana.
31 Wani xnaʼatik ja Dyosi mi smaklay ja mulanumiki, pe ja maʼ wa xiwyuj ja Dyosi sok wa skʼulan ja jas wa skʼana, wani smaklay.
32 Ja janekʼ tyempo ekʼeli, nunka bʼa abʼubʼal ay maʼ wa sjamayi ja sat june maʼ mi xyila kʼinal man pojki.
33 Lekbʼi ja winik it mi jaʼ jekubʼaluk yuja Dyosi, mini jas oj bʼobʼ skʼuluk».
34 Anto ti yalawe yabʼa: «Ja weʼn, bʼa jel jawa mul pojkiya, ¿waxa kʼana ay jas oja jekitikon?». Sok tixa yawe eluka.
35 Ja Jesús yabʼ yabʼalil aji eluk ja tiw, sok yajni staʼa, ti sjobʼoyiʼa: «¿Wan maʼ xa kʼuʼan sbʼaja Yunin ja Winiki?».*
36 Ja yeʼn sjakʼayi: «Kajwal, ¿machunkiluka? Alakabʼ bʼa oj jkʼuʼuk bʼa yeʼna».
37 Jaxa Jesús sjakʼayi: «Awilataniʼa. Iday, yeʼnani ja maʼ wana loʼilsoki».
38 Anto tixa yalaʼa: «Kajwal, wani xkʼuʼan bʼa weʼna». Sok koʼ sbʼaj tinan.
39 Ja Jesús yala: «Ja keʼn jakyon ja bʼa luʼumkʼinal it bʼa oj bʼobʼ kʼulajuk jusgar, bʼa jachuk ja matik mi x-ilwani oj yil-e kʼinal sok jaxa maʼ wa xyila kʼinali mi oj yil-e kʼinal».
40 Ja fariseoʼik matik teye tiw yabʼye ja jastik iti. Jaxa yeʼnleʼi yalawe yabʼi: «¿Yuj maʼ mi xcha kilatikon kʼinal ja keʼntikoni?».
41 Jaxa Jesús sjakʼayile: «Lekbʼi mixa wilawex kʼinal, mini oj ajyuka mulex. Pe yuja waxa walawex ‹Wa xkilatikon kʼinal›, tini oj ajyuka mokex jawa mulexi».
Notaʼik
^ Ma «manxi».
^ Jach kanel ja bʼa griego: «Rabí».
^ Jach kanel ja bʼa griego: «senyaʼik».
^ Kʼela ja bʼa Yaljelik cholubʼal.
