Juan 16:1-33
16 «Ja keʼn kalawabʼyex ja jastik it bʼa mi oj chʼayuka wujilex ja skʼuʼajeli.*
2 Oj aji elanik ja bʼa naʼits wa stsomo sbʼaje. Iday, jakum ja yoraʼil yibʼanal ja matik oj smilexi oj skʼuʼuke wane skʼulajelyi jun aʼtel ja Dyosi.
3 Pe oj skʼuluke yibʼanal ja jastik it yujni mito xkʼot snaʼe sbʼaj ja Tatali sok mini ja keʼn.
4 Kaluneja wabʼyex ja jastik it, bʼa jachuk yajni x-eljul ja yoraʼil oj ekʼuki, oj juluka kʼujolex kalni awabʼyex.
Mini kalawabʼyex bʼajtan ja jastik it yujni tito ayona mokexa.
5 Pe ja wego wajumon soka Maʼ sjekawoni, sok mini june bʼa weʼnlex wa sjobʼoki ‹¿Bʼa wajumaʼa?›.
6 Pe yuja kalawabʼyex ja jastik junuk it, tristeʼaxita jawa kʼujolexi.
7 Pe wa xkalawabʼyex ja smeranili: sbʼajni alekilalex ja oj wajkoni. Pes ta mi la wajyon, ja koltanumi mi oj jakuka mokex; pe ta wajyon, keʼn oj jekawilex.
8 Sok yajni xjaki, oj yayi ja luʼumkʼinal meran prebaʼik sbʼaja mulali, sbʼaja stojolili sok sbʼaja maʼ wan kʼulajel jusgari.
9 Jani bʼajtan sbʼaja mulali, yujni ja yeʼnleʼi mi sjeʼawe skʼuʼajel sbʼaja keʼni;
10 tixa sbʼaja stojoli, yujni wajumon soka Tatali sok jaxa weʼnlexi mixa oja wilonex mas,
11 sok tixa sbʼaja maʼ wan kʼulajel jusgari, yujni kʼulajita jusgar ja smandaranum ja luʼumkʼinal it.
12 Jelto jas oj kalawabʼyex, pe ja wego mito oja wabʼyex stojolil.
13 Pe yajni xjak ja yeʼn,* ja ipal* bʼa smeranili, ojni stojex bʼa yibʼanal ja smeranili. Pes yujni mi yeʼnta spensar oj kʼumanuk, jani oj yal ja jas oj yabʼi sok oj yalawabʼyex ja jastik oj jakuki.
14 Ja yeʼn oj stoy-on, yujni yeʼn oj yalawabʼyex ja jas oj yiʼ bʼa keʼn.
15 Yibʼanal ja jas yiʼoj ja Tatali cha keʼnani jbʼaj. Ja yuj kalawabʼyex ja yeʼn oj yalawabʼyex ja jas oj yiʼ bʼa keʼn.
16 Tʼusanxta skʼana mixani oja wilonex mas, pe cha tʼusanxta skʼana oj cha wilonex».
17 Yajni yabʼye ja it, jujuntik ja bʼa snebʼumaniki yala sbʼaje: «¿Jas wa xkʼan yalkabʼtik soka ‹Tʼusanxta skʼana mixato oja wilonex mas, pe cha tʼusanxta skʼana oj cha wilonex›? ¿Soka ‹Yujni wajumon soka Tatali›?».
18 Wa xyalawe: «¿Jas wa xkʼan yal ja yajni yala ‹Tʼusanxta skʼana›? Mi xnaʼatik ja jas wan stajel tiʼali».
19 Yuja wa snaʼa ja Jesús wa xkʼan jobʼjukyi, ja yeʼn yala yabʼye: «¿Wanex sjobʼjela bʼajex yuja kala ‹Tʼusanxta skʼana mixato oja wilonex mas, pe cha tʼusanxta skʼana oj cha wilonex›?
20 Wani xkalawabʼyex meran lek: ja weʼnlexi oj okʼanik sok oj mebʼa okʼanik, pe ja luʼumkʼinali oj gustoʼaxuk; ja weʼnlexi oja wabʼyex syajal, pe ja syajal oja wabʼyexi oj pax gustoʼil.
21 Yajni jun ixuk wan ajyel* ja yali, wani xyabʼ syajal yujni kʼota ja styempoʼili. Pe yajni ajyita ja yalatsi, ja yeʼn mixani snaʼa yibʼanal ja wokol yiʼaji yuja sgustoʼil bʼa ajyita jun kristyano ja bʼa luʼumkʼinal.
22 Junxta wa x-ekʼ soka weʼnlexi. Ja wego jelni triste ayex; pe ojtoni cha kilex, sok ojni gustoʼaxuk jawa kʼujolexi sok mini maʼ oj sjapawilex jawa gustoʼilexi.
23 Jaxa bʼa kʼakʼu jaw mini jas oja jobʼexki. Wani xkalawabʼyex meran lek: ta waxa kʼanawexyi chikan jasa ja Tatal bʼa jbʼiʼil, ja yeʼn ojni yawilex.
24 Man wego mitoni jas xa kʼanawex bʼa jbʼiʼil. Kʼanawik sok ojni ajukawilex, sok jachuk jelxani gusto oj ajyanik juntiro.
25 Kalunejawabʼyex ja jastik it yajel makunuk slajelalik. Jakum ja yoraʼil bʼa mixa oj ka makunuk slajelalik yajni oj kalawabʼyexi, pes ojni kalawabʼyex jaman lek sbʼaja Tatali.
26 Ja bʼa kʼakʼu jaw ojni akʼanexyi ja Tatal bʼa jbʼiʼil. Sok ja it mi wa stojolan keʼn oj kʼanyi yuj weʼnlex.
27 Pes yujni yeʼn mismo yajxta wa xyilawex ja Tatali, yujni yajxta awilunejonex ja keʼni sok akʼuʼunejex jakyon bʼa sparte Dyos.
28 Jakyon ja bʼa luʼumkʼinal bʼa sparte ja Tatali. Ja wego wa xkaʼakan ja luʼumkʼinali sok wajumon soka Tatali».
29 Ja snebʼumaniki yalawe yabʼi: «Ja wego jamanxani lek wala kʼumani, mixa xwa makunuk slajelalik.
30 Ja wego wa xnaʼatikon waxa naʼa yibʼanal sok mixa yajnaluk ayto maʼ oj sjobʼawi. Ja yuj wani xkʼuʼantikon ti jakela bʼa Dyos».
31 Jaxa Jesús sjakʼayile: «¿Ja wego waxa kʼuʼanex?
32 ¡Kʼelawik! Jakum ja styempoʼili, iday, jultani ja tyempo jaw, bʼa xaʼantikan oj wajanik. Kada jujune oj waj bʼa snaj sok oja waʼonexkan jtuchʼil. Pe mi jtuchʼil ayon, yujni tey jmok ja Tatali.
33 Kaluneja wabʼyex ja jastik it bʼa oj ajyukawujilex lamanil yuj keʼna. Ja bʼa luʼumkʼinali oj ekabʼajex wokolik. Pe ¡mok xiwanik!, pes ja keʼn jkʼulanta ganar ja luʼumkʼinali».
Notaʼik
^ Ma «mi oja loka wokex».
^ Ja bʼa bersikulo 13 sok 14, ja yaljel yeʼn jani wa xkʼan yal sbʼaja «koltanum» wa staʼa tiʼal ja bʼa bersikulo 7. Ja Jesús ya makunuk ja yaljel ja koltanum bʼa yajel slaj ja yip ja Dyos jastal jun kristyano.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «manxel».
