Juan 5:1-47
5 Tsaʼan ja bʼa it ajyi jun skʼine ja judíoʼiki, jaxa Jesús wajkʼe bʼa Jerusalén.
2 Jaxa bʼa Jerusalén, mojan ja bʼa Spuertaʼil ja Chejiki, ay jun niwan tanke ja bʼa hebreo sbʼiʼil Betzata, bʼa ayiʼoj joʼe korredor.
3 Ja bʼa lugar jaw ti bʼaʼane ekʼ jitsan kristyano maloʼaye, mi xyilawe kʼinal, renkoʼik sok matik tsats ay* ja skʼabʼeʼi ma ja yokeʼi.
4 *
5 Jaxa tiw tey jun winik bʼa ayxa 38 jabʼil maloʼay.
6 Yajni ja Jesús yila ti bʼaʼan ekʼ tiw ja winik jaw, sok yuja wa snaʼa jitsanxa tyempo maloʼay, ti sjobʼoyiʼa: «¿Wan maʼ xa kʼana oj tojbʼan?».
7 Ja maʼ maloʼayi sjakʼayi: «Kajwal, mi maʼ wa xchʼikawon ja bʼa niwan tanke ja yajni wa snika sbʼaj ja jaʼi. Pe kada ekʼele wa xkʼana oj ochkon, ayxa maʼ bʼajtan wa x-ekʼi sok yeʼn bʼajtan wa xkoʼ yuja keʼni».
8 Ja Jesús yala yabʼi: «¡Kʼeʼan! Tulu jawa waynubʼi* sok bʼejyan».
9 Jaxa winiki wegoxta tojbʼi, stulu ja swaynubʼi* sok och bʼejyuk.
Pe sábado ja kʼakʼu jawi.
10 Ja yuj ja judíoʼiki och yal-e yabʼ ja winik maʼ tojbʼita: «Sábado ja yani, mini sbʼejuk oja kuch jawa waynubʼi».*
11 Pe ja yeʼn sjakʼayile: «Ja winik maʼ ya tojbʼukoni yalakabʼi ‹Tulu jawa waynubʼi* sok bʼejyan›».
12 Jaxa yeʼnleʼi sjobʼoweyi: «¿Machunkiluk ja winik yalawabʼ ‹Tulu jawa waynubʼi* sok bʼejyan›?».
13 Pe ja winik maʼ tojbʼi mini snaʼa sbʼaj, pes ja Jesusi mini ilxi bʼa waj ja bʼa yojol ja nole kristyano tey tiwi.
14 Tsaʼan ja bʼa jastik it, ja Jesús ti staʼa bʼa templo sok yala yabʼi: «Kʼela, tojbʼiyata. Mokxa aleʼ mas jawa muli, bʼaxama lek x-ekʼabʼaj jun jasunuk masto peor».
15 Jaxa winiki waji sok yala yabʼ ja judíoʼik yeʼnani ja Jesús ja maʼ aji tojbʼukyuji.
16 Ja yuj ja judíoʼik wa xyiʼaje spatik ja Jesús, yujni wa skʼulan ja jastik it bʼa sábado.
17 Pe ja yeʼn wa sjakʼayile: «Ja jTati mitoni xyaʼakan aʼtel man wego, cha jachuk ja keʼn me xkaʼakan aʼtel».
18 Ja yuj ja judíoʼiki masto sleʼawe modo bʼa oj smil-e, yujni wa spensarane ja yeʼn mi skisa ja sábado, sok wanbʼi skʼana oj ya spensaraʼuk ja kristyano junxtabʼi soka Dyosi yuja wa xyala jani sTat ja Dyosi.
19 Ja yujil, ja Jesús yala yabʼye: «Wa xkalawabʼyex meran lek: ja Uninali mi xbʼobʼ skʼuluk mini jun jasunuk bʼa yeʼnta spensar, kechan wa skʼulan ja jas wa xyila wa skʼulan ja Tatali. Yujni yibʼanal ja jastik wa skʼulan ja Tatali, jachni junxta cha wa skʼulan ja Uninali.
20 Yujni ja Tatali yajxta wa xyila ja Uninali sok wa sjeʼayi yibʼanal ja jastik wa skʼulan ja yeʼn, sok ojto sjeyi jastik masto niwak yuja jastik it bʼa jachuk ja weʼnlexi jel oj ochkan wa pensarex.
21 Pes jastalni ja Tatal wa xya sakʼwuk* ja chamwiniki sok wa xyayi sakʼanil, ja Uninali cha wani xyayi sakʼanil ja maʼ wa skʼana oj yayiʼi.
22 Yujni ja Tatali mini maʼ wa skʼulan jusgar, pes jani yaʼunejyi bʼa skʼabʼ ja Uninal yibʼanal ja aʼtel bʼa kʼulwanel jusgar,
23 bʼa jachuk yibʼanale oj skis-e ja Uninali jastalni wa skisawe ja Tatali. Ja maʼ mi skisa ja Uninali mini skisa ja Tatali, bʼa yeʼnani sjekakoni.
24 Wa xkalawabʼyex meran lek: ja maʼ wa smaklay ja jas wa xkala sok wa skʼuʼan sbʼaja Maʼ sjekawoni ojni ajyuk sakʼanil bʼa tolabida sok mini oj kʼulajuk kastigar, pes jach jastal jun winik bʼa chamelxa ajyi sok ja wego sakʼanxa ay.
25 Wa xkalawabʼyex meran lek: jakum ja styempoʼili, iday, jultani ja tyempo jaw, bʼa oj yabʼye ja chamwinik ja skʼumal ja Yunin ja Dyosi, sok ja matik skisaweʼi ojni ajyuke sakʼan.
26 Pes jastalni ja Tatal ayiʼoj ja ipal bʼa oj yaʼ sakʼanil, ja yeʼn cha yaʼunejyi ja Uninal ja ipal bʼa oj yaʼ sakʼanil.
27 Sok yaʼunejyi ja cholal bʼa kʼulwanel jusgar, pes yeʼnani ja Yunin ja Winiki.*
28 Mok cham awabʼyex ja it, yujni jakum ja styempoʼil ke yibʼanal ja matik teye bʼa kʼeʼeniki* oj yabʼye ja skʼumali
29 sok oj sakʼwukejan: ja matik skʼulane jastik lek, oj sakʼwuke bʼa oj ajyuke sakʼan, jaxa matik skʼulane bʼa mi lekuk, bʼa jun sakʼwelal bʼa kastigo.
30 Ja keʼn mi xbʼobʼ jkʼuluk mini jun jasunuk bʼa keʼnta jpensar. Yujni jaʼ wala kʼulwaniyon jusgar soka jas wa xkabʼi, sok stojolni ja jastal wala kʼulwaniyon jusgari, yujni mi jaʼ wa xleʼa skʼulajel ja jas wa xkʼana, jani skʼulajel ja jas wa skʼana ja maʼ sjekawoni.
31 Lekbʼi jtuchʼilta wa xcholo bʼa keʼna, ja jas wa xcholo mini meranuka.*
32 Pe ay pilan maʼ wa xcholo bʼa keʼna, sok wani xnaʼa ja jas wa xcholo sbʼaja keʼni meraniʼa.
33 Ja weʼnlexi ajekunejexyi akʼa rasonik ja Juani, jaxa yeʼn xcholunej sbʼaja smeranili.
34 Ja keʼn mini xmakunikuj ja jas wa xcholo ja winike, pe wa xkala ja jastik it bʼa oja taʼ akoltajelex.
35 Ja winik jaw wajni jun ijlabʼ bʼa wa x-ajli sok wa xlijpi, jaxa weʼnlexi jel tʼusan tyempo akʼanawex ajyel gusto soka yijlabʼi.
36 Pe ja jas wa xcholo ja keʼn mastoni ay yip yuja bʼa Juani, yujni ja jastik sjekawon skʼulajel ja jTati, ja jastik it wa xkʼulan ja keʼn, wa xchiktes lek yeʼn sjekawon ja Tatali.
37 Jaxa Tatal maʼ sjekawoni, yeʼnani mismo xcholunej sbʼaja keʼni. Ja weʼnlexi nunka awabʼunejex ja skʼumali sok mini awilunejex ja splanta,
38 jaxa yabʼali mi ti wa x-ajyi amokexa yujni mixa kʼuʼanex ja maʼ sjekakoni.
39 Ja weʼnlexi waxa paklayex jaʼankʼujol lek ja Yabʼal ja Dyosi yujni waxa pensaranex yuj yeʼna oja taʼex sakʼanil bʼa tolabida; sok yeʼn mismo ja Yabʼal ja Dyos wa xcholo sbʼaja keʼni.
40 Ama jachuk, mini xa kʼanawex oj jakanik jmok bʼa oja taʼ asakʼanilex.
41 Ja keʼn mi xkʼana oj stoy-on ja kristyano.
42 Pe ja keʼn wa xnaʼa lek ja weʼnlexi mini xa yajtayex ja Dyosi.
43 Ja keʼn jakelon bʼa sbʼiʼil ja jTati jaxa weʼnlexi mini xa kʼulanonex resibir. Pe lekbʼi ay maʼ xjak bʼa yeʼnta sbʼiʼil, ja yeʼni ojni akʼulukex resibir.
44 ¿Jastal oja kʼuʼukonex ja weʼnlexi, yajni weʼnta waxa toyobʼajex sok mi jaʼ waxa leʼawex ja stoyjelal ja Dyos smeranili?
45 Moka pensaraʼukex ta keʼn oj leʼ amulex ja bʼa stiʼ sat ja Tatali. Ja maʼ wa sleʼa amulexi jani ja jas stsʼijbʼunejkan ja Moisés, ja winik maʼ waxa jipa akʼujolexi.
46 Ja smeranili, lek wanuk xa kʼuʼanexyi ja Moisés, ojni akʼuʼukexki ja keʼn, yujni yeʼn stsʼijbʼan bʼa keʼna.
47 Pe ta mixa kʼuʼanex sbʼaja jastik stsʼijbʼani, ¿jastal oja kʼuʼukex ja jas wa xkala ja keʼni?».
Notaʼik
^ Jach kanel ja bʼa griego: «takin».
^ Ja bersikulo it wani xtax bʼa jujuntik Biblia, pe meyuk ja bʼa jitsan poko juʼunik jel chaʼanyabʼalil tsʼijbʼunubʼal bʼa griego.
^ Ma «popi».
^ Ma «spopi».
^ Ma «popi».
^ Ma «popi».
^ Ma «popi».
^ Jach kanel ja bʼa griego: «wa xya kʼeʼuk».
^ Kʼela ja bʼa Yaljelik cholubʼal.
^ Jach kanel ja bʼa griego: «kʼeʼenik wa xmakuni bʼa yajel jul kʼujolal».
^ Ma «mini xmakuni».
