Juan 13:1-38
13 Ja yujil, bʼajtanto ja bʼa kʼin bʼa Pascua, ja Jesusi wa snaʼa eltajul ja yora oj wajuk ja bʼa luʼumkʼinal it bʼa oj kumxuk soka Tatali. Ja yujil, yuja syajtunej ja snochumanik matik tey ja bʼa luʼumkʼinali, mini yaʼakan syajtajel man xchʼakulabʼil.
2 Wanetoni waʼel bʼa och akwal,* jaxa Dyablo xchʼikatayi ja bʼa skʼujol ja Judas Iscariote, ja skerem ja Simón, bʼa oj xchʼaykʼujoluk ja Jesús.
3 Jaxa Jesús, yuja wa snaʼa ajitayi bʼa skʼabʼ yibʼanal ja jastik junuk yuja Tatali sok ja yeʼn ti jakel bʼa Dyos sok oj cha kumxuk soka Dyosi,
4 ti stulu sbʼaj ja bʼa mesa, yaʼakan jun lado ja spal kʼuʼi, syama jun tuaya sok smocho bʼa snalan.
5 Sok tixa sbʼutʼu yalel jun basija, och sakʼyi ja yok ja snebʼumaniki sok stakesyi soka tuaya smochunej bʼa snalani.*
6 Yajni kʼot ja bʼay ja Simón Pedro, ja yeʼn sjobʼoyi: «Kajwal, ja weʼni, ¿oja sakʼ ki ja koki?».
7 Ja Jesús sjakʼayi: «Ja wego mixa wabʼ stojol ja jas wanon skʼulajeli, pe oja wabʼ stojol mas tsaʼan».
8 Ja Pedro yala yabʼi: «Mini tʼun oj kakan oja sakʼ ki ja koki». Jaxa Jesús sjakʼayi: «Ta mi jsakʼawi, mini keʼn jbʼajuka».*
9 Ja Simón Pedro yala yabʼi: «Kajwal, anto mi kechan xa sakʼaki ja koki, cha jachuk ja jkʼabʼ sok ja kolomi».
10 Jaxa Jesús sjakʼayi: «Ja maʼ atneli asyadoni ay lek sok kechan wa skʼana oj sakʼxuk ja yoki. Ja weʼnlexi asyadoni ayex, ama mi apetsanilukex».
11 Yujni ja yeʼn wa snaʼa maʼ oj chʼaykʼujolajukyuj. Ja yuj yala «Mi apetsanilukex asyado ayex».
12 Anto, yajni chʼak sakʼyi ja yokeʼi sok chʼak slap ja spal kʼuʼi sok cha och kulan* ja bʼay ja mesa, ti yala yabʼyeʼa: «¿Wan maʼ xa wabʼyex stojol ja jas jkʼulanawilexi?
13 Ja weʼnlexi waxa wawex jbʼiʼiluk Maestro sok Ajwalal, sok stojolni ayex, pes yujni jach kʼotelon.
14 Ja yujil, ta ja keʼn, bʼa kʼotelon Ajwalal sok Maestro, jsakʼunejawilex jawa wokexi, ja weʼnlexi cha tʼilani* oja sakʼabʼajex jawa wokexi.
15 Keʼnani kaʼunejawilex ja sjejeli bʼa oj cha akʼulukex junxta jastal jkʼulanawilex.
16 Wani xkalawabʼyex meran lek: ja mosoʼali mi mas ekʼxel yuja yajwali, cha mini ja jekabʼanumi yuja maʼ jekubʼalyuji.
17 Yuja wanxa xa naʼawex ja jastik it ja wego, ojni ajyanik gusto ta akʼulanexi.
18 Mi wa xkʼan kal bʼa apetsanilex; wani xnaʼa sbʼaj ja matik jtsaʼuneji. Pe ekʼ ja it bʼa oj kʼotuk ja Yabʼal ja Dyosi bʼa wa xyala: ‹Ja maʼ wan swejel ja jpani yilawonta kontra›.
19 Wanxa xkalawabʼyex man jutsʼin it bʼajtanto oj ekʼuk, bʼa jachuk ja yajni x-ekʼi ja weʼnlexi oja kʼuʼukex keʼnani kʼotelon ja maʼ wa xkala.
20 Wani xkalawabʼyex meran lek: ja maʼ wa skʼulan resibir chikan maʼ wa xjeka cha wani skʼulanon resibir, jaxa maʼ wa skʼulanon resibir ja keʼni cha wani skʼulan resibir ja Maʼ sjekawoni».
21 Yajni chʼak yal ja jastik it ja Jesús, ja yeʼn jel och cham skʼujol* sok ti yala jaman leka:* «Wa xkalawabʼyex meran lek: ojni xchʼaykʼujolukon june bʼa weʼnlex».
22 Ja nebʼumaniki och skʼel sbʼaje, pes jomta yolome yuja mi snaʼawe machunkiluk bʼa yeʼnle ja wan stajel tiʼali.
23 June ja bʼa snebʼumaniki, ja it maʼ jel syajta ja Jesús, tey bʼa mesa bʼa stsʼeʼel* ja Jesús.
24 Jaxa Simón Pedro sjeʼayi jun senya soka yolomi sok sjobʼoyi: «¿Maʼ wan stajel tiʼal?».
25 Anto ti och kʼachan ja bʼa yaltsil ja Jesús sok sjobʼoyi: «Kajwal, ¿machunkiluka?».
26 Jaxa Jesusi sjakʼayi: «Yeʼn ja maʼ oj kayi ja xen pan oj ka poxuki». Sok yajni ya poxuk ja pani, tixa yayi ja Judas ja skerem ja Simón Iscariote.
27 Yajni ja Judas syama ja xen pani, tixa och sbʼaj ja Satanás. Anto ja Jesús yala yabʼi: «Ja jas kʼeta akʼuluki, kʼulanxa wego».
28 Pe mini june ja matik tey* ja bʼa mesa wa snaʼawe jas yuj jach yala yabʼi.
29 Pes yuja yeʼn kajan sbʼaj ja Judas ja skajaʼil ja takʼini, jujuntik wa spensarane ja Jesús wan yaljel yabʼi «Mana ja jastik wa xmakunikujtik ja bʼa kʼini», ma bʼobʼta ay jas oj yayi ja matik pobre.
30 Ja yujil, yajni syama ja xen pani, tixta el ja tiwi. Sok akwalxaniʼa.
31 Anto, yajni wajta, ja Jesús yala: «Ja wego wa xtoyji ja Yunin ja Winiki,* sok wani xtoyji ja Dyos yuja yeʼn.
32 Ja Dyosi yeʼn mismo oj stoye,* sok wegoxta oj stoye.
33 Kala yal kuntikil, tito oj ajyukona mokex tʼusan tyempo smoj. Ja weʼnlexi oja leʼonex; pe jastalni kala yabʼ ja judíoʼiki cha wa xkalawabʼyex ja wego: ‹Mini xbʼobʼ jakanik ja bʼa wajumoni›.
34 Wa xkawilex jun yajkʼachil mandar: yajta abʼajik; sok jastalni jyajtunejex ja keʼn, cha yajta abʼajik ja weʼnlexi.
35 Sok ta waxa yajta abʼajex, jach oj snaʼe yibʼanal kristyano ja weʼnlexi kʼotelex jnebʼumanik».
36 Ja Simón Pedro sjobʼoyi: «Kajwal, ¿bʼa wajumaʼa?». Jaxa Jesús sjakʼayi: «Ja bʼa wajumoni mini xbʼobʼa nochon ja wego, pe ojni anochon mas tsaʼan».
37 Ja Pedro yala yabʼi: «Kajwal, ¿jas yuj mi xbʼobʼ jnocha ja wego? Ja keʼn ojni kaʼ ja jsakʼanil yuj weʼna».
38 Ja Jesús sjakʼayi: «¿Oja wa jawa sakʼanil yuj keʼna? Wa xkalawabʼ meran lek: bʼajtanto oj okʼ jun gallo, ja weʼn oja wal oxe ekʼele mixa naʼa jbʼaj».
Notaʼik
^ Ma «Wanetoni skʼulajel cenar».
^ Ma «soka jas mochan ja bʼa snalani».
^ Ma «mini jmojuk jbʼajtik».
^ Ma «tsʼelan».
^ Ma «obligadoni».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jach kanel ja bʼa griego: «xcholo sok yala».
^ Jach kanel ja bʼa griego: «tsʼelan ekʼ bʼa sniʼ yaltsil».
^ Ma «tsʼelane».
^ Kʼela ja bʼa Yaljelik cholubʼal.
^ Ma «oj yayi jun chaʼan cholal».
