Vo Ŵanthu Akamba pa Nkhani ya Kupemphera
“Asani ndipemphera kwaku Chiuta, nditijivwa nge kuti iyu we nani pasina, wandiko janja ndipu watindilongozga asani nditijivwa kuti nde ndija.”—MARÍA.
“Muwolu wangu wangutayika wati wasuzgika ndi nthenda ya khansa kwa vyaka 13. Ndikumbuka kuti pa nyengu yeniyi asani ndipemphera kwaku Chiuta zuŵa lelosi, ndijivwanga kuti iyu wavwisa mo ndivwiya. Ndipu ndasaniyanga chimangu cha mumtima.”—RAÚL.
“Pempheru ndi mphasu yapade yo Chiuta wakupaska ŵanthu.”—ARNE.
María, Raúl, Arne kweniso ŵanthu anyaki anandi, awona kuti pempheru ndi mphasu yapade. Yiwu awona kuti kuziya mupempheru, angalongoro ndi Chiuta, kumuwonga kweniso kumupempha kuti waŵawovyi. Ndipu yiwu agomezga ndi mtima wosi vo Bayibolu likamba pa nkhani ya kupemphera kwaku Chiuta. Bayibolu likamba kuti: “Te ndi chigomezgu mwaku iyu, kuti chechosi cho tingapempha mwakukoliyana ndi khumbu laki watitivwa.”—1 Yohane 5:14.
Kweni anyaki anandi, vitiŵasuzga kugomezga vo Bayibolu likamba pa nkhani ya pempheru. Mwakuyeruzgiyapu, Steve wangukonkhoska mo iyu wavwiyanga pa nkhani yeniyi. Iyu wanguti: “Ndati ndifika vyaka 17, anyangu atatu angufwa pa ngozi zakupambana. Munyangu munyaki yingumuganya galimotu ndipu anyaki ŵaŵi angubila munyanja.” Kumbi Steve wanguchita wuli? Iyu wangukamba kuti: “Ndingupemphera kwaku Chiuta kuti ndiziŵi chifukwa cho ngozi zenizi zinguchitikiya. Kweni iyu wangundimuka cha. Mwaviyo, ndingujifumba kuti ‘Ntchifukwa wuli tipemphera?’” Ŵanthu anandi awona kuti mapempheru ngawu ngamukika cha. Mwaviyo, atijifumba asani pe chifukwa cho atenere kupemphere.
Pe so vifukwa vinyaki vo ŵanthu agomezge kuti pempheru litovya cha. Anyaki akamba kuti, chifukwa chakuti Chiuta waziŵa vinthu vosi, iyu waziŵa kali vinthu vo tikhumbikiya pamwenga masuzgu ngidu. Mwaviyo, palivi chifukwa chakumukambiya venivi.
Penipo anyaki agomezga kuti Chiuta wakhumba cha kuvwisiya mapempheru ngawu chifukwa cha vinthu vo angunangisapu kuvuli. Mwakuyeruzgiyapu, Jenny wangukamba kuti: “Suzgu yangu yikulu njakuti, nditijivwa kuti nde wambula kukhumbika. Ndinguchita vinthu vo pasonu panu ndidandawula navu. Mwaviyo, nditijikambiya kuti, nde wakwenere cha kuti Chiuta wavwengi mapempheru ngangu.”
Kumbi yimwi mutiyiwona wuli nkhani ya pempheru? Asani ndimu namwi muŵanaŵaniya pamwenga mukayikiya kuti Chiuta watuvwa mapempheru nginu, mungapembuzgika kuziŵa kuti Bayibolu le ndi kwamuka kwakukhorwesa kwa mafumbu nginu. Vo Bayibolu likamba pa nkhani ya pempheru * vauneneska. Ndipu lingakuwovyani kusaniya kwamuka kwa mafumbu nge yanga:
-
Kumbi Chiuta wavwisiya nadi mapempheru ngidu?
-
Ntchifukwa wuli Chiuta wamuka cha mapempheru nganyaki?
-
Kumbi mungapemphera wuli kuti Chiuta wavwengi mapempheru nginu?
-
Kumbi pempheru lingakuwovyani wuli?
^ ndimi 9 Mu Bayibolu mukulembeka mapempheru nga ateŵeti aku Chiuta anandi, kusazgapu ngo Yesu Khristu wapempheranga. Mu Malemba nga Chiheberi, ngo ŵanthu anandi atingadana kuti Chipanganu Chakali, mukulembeka mapempheru ngakujumpha 150.
Mungayanja Kuŵerenga so Nkhani Izi
VO ACHINYAMATA AFUMBA
Ntchifukwa Wuli Ndikhumbika Kupemphera?
Kumbi pempheru litovya ŵaka kuti mtima uje mumalu pamwenga litovya so mu nthowa zinyaki?
