Julani

Lutani pa menyu yachiŵi

Akaboni aku Yehova

Chitonga (Malawi)

Nyumba za Ufumu 1000 Zazengeka Kweniso Zinyaki Zeche Kuzengeka

Nyumba za Ufumu 1000 Zazengeka Kweniso Zinyaki Zeche Kuzengeka

Mu August 2013, Akaboni aku Yehova ku Philippines anguzenga Nyumba ya Ufumu ya nambala 1000. Ichi chenga chinthu chapade ukongwa. Nge mo viliri muvyaru vinandi, Akaboni aku Yehova ku Philippines ŵengavi malusu kweniso ndalama zakuzenge Nyumba za Ufumu. Kwa vyaka vinandi, anyaki awungananga munyumba za abali ndipu anyaki awungananga muvisakasa vo anguzenga ndi sungwi.

Chifukwa chakuti chiŵerengeru cha Akaboni aku Yehova ku Philippines ndipuso pacharu chosi chakwera ukongwa, Nyumba za Ufumu zinandi zikhumbika kuzengeka. Mwaviyo, mu 1999 Wupu Wakulongozga wa Akaboni aku Yehova ungujalikisa pulogilamu yo yitovya kuti Nyumba za Ufumu zizengeki muvyaru vikavu. Kuziya mu pulogilamu iyi, Akaboni aku Yehova a muvyaru vikavu apereka ndalama zo angafiska, ndipu zisazgika pamoza ndi ndalama zo ziperekeka muvyaru vinyaki. Pavuli paki, ŵanthu wo akusambira ntchitu zakuzenga agaŵika mumagulu ndipu atovya mipingu kuzenga Nyumba zawu za Ufumu. Ku Philippines, pulogilamu iyi yingwamba kugwira ntchitu mu November 2001.

Iluminado yo wawungana mu mpingu wa ku Marilao, Bulacan ko anguzengaku Nyumba ya Ufumu ya nambala 1000, wanguti: “Ndinguwona chanju cha ubali. Ŵanthu anandi angujipereka, anthurumi ndi anthukazi, arara kweniso ŵana. Tagwiriyanga limoza ntchitu chinanga kuti kwafundanga ukongwa. Chinanga kuti kufika mazulu tajanga kuti tavuka kweni takondwanga asani tawona vo tafiska.”

Ŵanthu wo mbakaboni cha nawu anguzizwa ukongwa kuwona mtima wakujipereka wenuwu. Mweneku wa galimotu yo yapinganga mchenga wakuzenge kweniso mya wanguti: “Mwaŵanthu imwi mwe nge nyere. Ŵanthu anandi atijipereka kugwiraku ntchitu. Chiwiyi ndendawonepu vange ivi.”

Nyumba ya Ufumu yo yikuzengeka

Ŵanthu wo angujipereka kuzengaku Nyumba ya Ufumu iyi, angumaliza kuyizenga mu masabata 6 pe. Chifukwa chakuti ntchitu iyi yingwenda liŵi, ŵanthu a mpingu uwu angutimbanyizgika cha pa ntchitu yawu yakukhumbika ukongwa yakupharazga uthenga wamampha wa Ufumu waku Chiuta.​—Mateyu 24:14.

Muzichi munyaki wa mumpingu wenuwu zina laki Ellen, wanguti: “Tatondekanga kukwana mu Nyumba ya Ufumu yidu yakali chifukwa yenga yimana ndipu anyaki ajanga kubwalu. Nyumba ya Ufumu yidu yasonu njakutowa ndipuso ye ndi mipandu yamampha. Sonu, tosi tiyanduwa ukongwa ndi maunganu kweniso tichiskika ukongwa.”