Julani

Lutani pa menyu yachiŵi

Akaboni aku Yehova

Chitonga (Malawi)

Kabuku ko ke mu Vineneru Vinandi ko Kasambiza Mwakugwirisiya Ntchitu Vithuzi

Kabuku ko ke mu Vineneru Vinandi ko Kasambiza Mwakugwirisiya Ntchitu Vithuzi

Ama Odval aja ku Mongolia. Aziŵa cha kuti ŵe ndi vyaka vilinga kweni awona kuti akuwa mu 1921. Ŵeche ŵana aryiskana viŵetu va apapi ŵawu ndipu kusukulu akukaku chaka chimoza pe pa umoyu wawu. Yiwu mbajila kuŵerenga. Kweni kabuku kakutowa ko katuzgika pambula kuswera kaŵawovya kuti amuziŵi Chiuta. Kaŵawovya so kuziŵa kuti ŵanthu wo atimuvwiya azamuja umoyu wamampha ukongwa munthazi. Kuziŵa venivi kwaŵakondwesa ukongwa.

Kabuku kenaka kakutuzgika mu 2011 ndi Akaboni aku Yehova ndipu kasanirika mu mitundu yiŵi. Timabuku tosi tiŵi te ndi vithuzi vakutowa kweni kanyaki ke ndi mazu nganandi kuphara kanyaki.

Kabuku ko ke ndi mazu nganandi ke ndi mutu wakuti, Vwiyani Chiuta kuti Muje ndi Umoyu Wamuyaya. Pambula kuswera kasanirikengi mu vineneru 583. Kabuku kanyaki ke ndi mutu wakuti, Vwiyani Chiuta, ndipu kasanirika mu vineneru 483. Yeruzgiyani ndi unandi wa vineneru vo buku la kukwaskana ndi va wanangwa la United Nations lisanirikamu. (Universal Declaration of Human Rights) Mu October 2013, buku ili lasanirikanga mu vineneru 413. Timabuku to tasindikizikapu kali ta Vwiyani Chiuta kuti Muje ndi Umoyu Wamuyaya kweniso Vwiyani Chiuta tikwana pafupifupi 80 miliyoni.

Ku Brazil, munthukazi munyaki wakukota wangukondwa kulonde kabuku ka Vwiyani Chiuta ndipu wanguti: “Ntchakukondwesa kuziŵa kuti kwe ŵanthu wo aŵanaŵaniya ŵanthu a nge ini. Ndakananga kulonde magazini nginu chifukwa ndiziŵa cha kuŵerenga. Kweni ndikhumba kabuku yaka.”

Ma munyaki yo waziŵa cha kuŵerenga yo waja ku France, zina laki Brigitte wangukamba kuti: “Zuŵa lelosi ndiwona vithuzi vo ve mukabuku yaka.”

Kaboni munyaki wa ku South Africa, wangulemba kuti: “Palivi so buku linyaki lo litindiwovya kwamba kukambisana uthenga wa m’Bayibolu ndi ŵanthu wo alongoro Chitchayinizi. Ndasambirapu Bayibolu ndi ŵanthu wo akuluta ku yunivesite, ŵanthu azeru ukongwa kweniso wo atondeka kuŵerenga. Kabuku ka Vwiyani Chiuta kuti Muje ndi Umoyu Wamuyaya katindiwovya kusambiza ŵanthu mwaliŵi fundu zakwamba za m’Bayibolu. Mumaminisi 30 pe, mbwenu ndajalikisa sambiru.”

Akaboni ŵaŵi anthukazi ku Germany asambira Bayibolu ndi banja linyaki lakusambira. Munthurumi wa m’banja lo wangukondwa ukongwa ndi kabuku yaka ndipu wanguti: “Mwasweriyangaji kundipasa kabuku yaka? Katindiwovya kuvwisa mwambula kusuzga vinthu vo vikulembeka m’Bayibolu.”

Munthukazi munyaki wambula kulongoro wa ku Australia wanguti: “Kwa vyaka vinandi ndajanga ndi masisiteli. Ndenga ndi mwaŵi chifukwa ndenga pafupi ukongwa ndi alongozgi a tchalitchi. Kweni pengavi yo wangundisambizapu kuti Ufumu waku Chiuta ung’anamuwanji. Vithuzi va mukabuku yaka vandiwovya kuziŵa vo lemba la Mateyu 6:10 ling’anamuwa.”

Ofesi ya Akaboni aku Yehova ku Canada, yikulemba kuti: “Ŵati awona buku la Vwiyani Chiuta mu Chikiriwo, ŵanthu anandi aku Sierra Leone angukamba kuti Akaboni aku Yehova agwira mwaphamphu ntchitu yakupharazga uthenga wa m’Bayibolu. Anyaki anguti, ‘Mwaŵanthu imwi muŵanaŵaniya ŵanthu, kweni ŵanthu anandi mucharu ichi achita viyo cha.’”