Ivur ne ka i môm ken avur a Bibilo a ior ve hembe teren cii yô. I kaa ér, ken Bibilo cii, ka ivur ne tseegh i pase kwagh u mlu u Aôndo vea uumace man gbenda u zuan a myom la, sha asember kpuaa shi i wanger kpaa ye. Sha nahan yô, ashighe kpishi ka i nger “Yohane 3:16” shin i nger mkaanem ma ivur Bibilo shon sha kpekpe hen ape i zough kwagh ken igbar yô, shin i var sha umato gayô sha ajiir agenegh.

A̱ shi nan kpa, ior mba ka ve nger ivur Bibilo ne ve var sha akaa la mba a jighjigh u nan ér ve doo Aôndo ishima, nahan una yima ve, vea lu uma gbem sha won. We di ye? U nenge wer mdoo u u doo Aôndo ishima la una wase u nena? Man ka nyi u nenge Aôndo a er, i tesen we ér u doo un ishima?

Ior kpishi ka ve wuese Aôndo er a gbe sha man tar, man akaa a a lu ker cii, kua uumace kpaa yô. Akaa a uma nga anza kposo kposo, shi i er a sha inja sha inja kpaa. Kwagh ne tese ér, or u nan er a la nan ngu a kwaghfan u a gande ave yô. Ior kpishi mba sughun Aôndo ayange ayange, er a ne ve uma gbilin yô. Shi ve fa er i lu Aôndo a ne ve akaa a hange hange ken uma ér a wase ve u lun uma shi i kpe ve iyol kpaa la yô, ambaakaa er ahumbe man mngerem man kwaghyan, kua mbamgem mba sha igbetar, mba ka ve na ura u nôô, shi inya i hide i doo la nahan.

Doo u se sughun Aôndo sha akaa ne cii, sha ci u mimi je, ka un a er se shi a lu koson se sha u se lu uma ye. (Pasalmi 104:10-28; 145:15, 16; Aerenakaa 4:24) Aluer se hen sha akaa a Aôndo a eren sha u se lu uma la yô, se nenge er se  doo un ishima yô. Apostoli Paulu kaa ér: “Ka [Aôndo] A ne uumace cii uma man iôôn kua akaa cii ye. Gadia ka ken a Na man se lu uma man se tenger shi se tem kpaa” ye.—Aerenakaa 17:25, 28.

Nahan kpa, Aôndo tesen se dooshima na sha igbenda igen kpaa, ka sha u kôson se sha akaa a iyolough tseegh ga. A er se se mba kposo a annyamev, sha gbenda u civirigh u se civir un yô, shi wasen se u civir un kpaa. (Mateu 5:3) Sha nahan yô, uumace mba ungwan imo i Aôndo mba a ishimaverenkeghen i va lun ken tsombor na, ka “ônov” nav je la.—Mbaromanu 8:19-21.

Er Yohane 3:16 a kaa nahan, Aôndo tese se dooshima na sha u tindin Wan na Yesu shin tar ér a va tese se kwagh u Ter na, Aôndo, shi a kpe sha ci wase. Ior kpishi vea kaa ér, ve fa ityôkyaa i yange gba u Yesu una kpe sha ci u uumace ga, shi vea kav er Aôndo a tese se dooshima sha ku u Yesu la kpaa ga. De se nenge er Bibilo i pase ityôkyaa i i ne ve Yesu yange kpe la, man er ku na la u lu se a iwasen yô.

Uumace cii mba gbe angev shi ka ve bee iyol shi ve kpe. Nahan kpa, Aôndo yange gba or a awashima ér nana kpe ga. Yange na uumace mba hii gban ve la ishimaverenkeghen i lun uma gbem sha won ken paradiso shin tar. Kpa kwagh lu môm u vea er ve vea lu uma yô: Yange gba u vea ungwan un. Aôndo kaa a ve ér, vea er nahan ga yô, vea kpe. (Genese 2:17) Kpa or u Aôndo hii gban la venda u dondon hemen u Aôndo, nahan ieren na la va un a ku kua uumace mba ve dugh ken a na la cii. Apostoli Paulu pase ér: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.”—Mbaromanu 5:12.

Nahan kpa, “kwagh u mimi doon” Aôndo ishima. (Pasalmi 37:28) Shin er yange gba den den orumace u hii gban la isholibo i er sha apera la ga nahan kpa, Aôndo de ér uumace cii ve ya ican shi ve saa kpen sha ci u isholibo i or môm gbem sha won ga. Yange kimbi “uma sha uma” er atindiakaa a na a tese la, sha er una er kwagh a uumace mba ve ongo imo na la sha mimi, nahan ve hide ve lu uma gbem sha won yô. (Ekesodu 21:23) Kpa, uumace vea hide a lu a uma u vough, u yange i gba Adam a mi la sha nyi gbenda? Se na mlumun ser: Saa or a na nagh sha uma u nan u vough, imba i yange i gba Adam a mi la.

Kwagh ne tese wang ér, ma orumace u lun vough ga, u ken tsombor u Adam môm kpa nan kuma u nan imba nagh kura ga, lu Yesu tseegh. (Pasalmi 49:6-9) Er i mar Yesu ken isholibo ga yô, lu or u vough, er i gba Adam sha hiihii la nahan. Nahan, er Yesu na uma na yô, a paa uumace sha ikyev i isholibo. Kwagh u Yesu er ne na yô, tsombor u Adam man Ifa mba a ian i va zuan a uma u vough u Adam man Ifa yange ve lu a mi sha hiihii la. (Mbaromanu 3:23, 24; 6:23) Gba u se er ma kwagh ve se zua a iwasen ken dooshima u i tese se mgbeghaa ne yee?

Shi i ôr ken Yohane 3:16 ér, “anti or u nan ne Un jighjigh yô, nana̱ de timin ga kpa nana̱ zua a uma u tsôron.” Kwagh ne tese ér kwagh ngu u i gbe u se er ve se zua a iyua i uma u tsôron la yô. Aluer se soo u ‘zuan a uma u tsôron’ yô, saa se na Yesu jighjigh shi se ungwan imo na.

Alaghga u pine wer: ‘Er nan i gbe u saa se ungwa imo i Yesu ve se zua a uma u tsôrono? Yesu kaa ér “anti or u nan ne Un jighjigh’ yô nana zua a uma u tsôron, man er nan ve i gbe u saa se ungwa imo na kpaa keng ve, se zua a uma u tsôrono? Ka mimi, gba kpee u se na jighjigh. Nahan kpa, doo u se umbur ser Bibilo kaa ér, u se nan jighjigh ser Yesu ngu la tseegh kuma ga. Takerada ugen u pasen asember a ken Bibilo kaa ér, ishember i ken zwa Grika i Yohane yange ter, i gem i ér jighjigh la ngi ôron kwagh u “u suur sha or, ka u nan nan jighjigh tseegh tsô ga.” Saa or a er kwagh a hemba u gban fan tsô ér Yesu ka Oryiman tseegh tsô la ve, Aôndo una lumun nan ye. Shi gba kpee u ornanjighjigh la nana nôngo kpoghuloo nana eren kwagh u Yesu a tese la. A ieren shio yô, hanma jighjigh u nan cii una lu u gbilinigh. Bibilo kaa ér, ‘jighjigh u nan u lun a aeren ga ngu kpenegh.’ (Yakobu 2:26) Se fatyô u ôron kwagh ne sha gbenda ugen ser, gba u ornanjighjigh la nana na Yesu jighjigh, inja na yô, gba u nana eren kwagh u i tese nan ve nan ne jighjigh a mi la.

Paulu ta iwanger sha kwagh ne ér: “Dooshima u Kristu ngu mgbeghan se, sha mnenge wase yô or môm [Yesu] kpe sha ci u ior cii . . . Man A kpe ka sha ci u ior cii sha u mba ve lu uma yô, ve̱ de kera lu uma sha ci ve ayol a ve ga, kpa i̱ lu sha ci u Un u A kpe sha ci ve shi i nder Un kpaa la.” (2 Mbakorinte 5:14, 15) Iwuese i se lu a mi sha nagh ku Yesu la i̱ mgbegha se u geman uma wase, se kera lu mba wan ayol a ase ikyo tseegh ga, kpa se lu uma sha ci u Yesu, u a kpe sha ci wase la. Inja na yô, gba u se hemba veren ishima sha u eren akaa a Yesu a tese se la. Se er nahan yô, mlu wase man akaa a se tsough u eren la kua hanma kwagh u se eren cii, una hemba lun se a inja. Ka injar i nyi mba ve ne Yesu jighjigh shi ve eren kwagh u tesen ér ve na un jighjigh la vea zua a mini?

Vegher u masetyô u Yohane 3:16 la ôr kwagh u ityendezwa i Aôndo a er a mba ve ne nagh ku ipaan kura jighjigh shi ve lu dondon atindiakaa a Aôndo la. Aôndo wa ishima ér mbananjighjigh mbara ‘ve de timin ga kpa ve zua a uma u tsôron.’ Nahan kpa, hanma or u nan doo Aôndo ishima yô, averen kposo kposo nga keghen nan ken hemen.

Yesu yange tôndo zwa a kweior ugen ér ua zua a uma u tsôron sha. Yange ôr a mbahenen nav mba jighjigh mbara ér un ngu yemen una za sôr ijiir sha ci ve sha er vea za tema tor a na imôngo ken iengem na yô. (Yohane 14:2, 3; Mbafilipi 3:20, 21) Mba a nder ve vea za lu uma sha la “vea lu upristi mba Aôndo man mba Kristu kpaa, vea tema tor a Na imôngo sha anyom dubu.”—Mpase 20:6.

Ka mbadondon Yesu kpuaa tseegh vea yem sha ye. Jighilii yô, Yesu kaa ér: “Ne anikyumuile u kpeghee ne, de cie nen ga! Gadia i doo Ter wen u nan ne tartor la.” (Luka 12:32) “Anikyumuile u kpeghee” shon una kuma iyenge nena? Mpase 14:1, 4 kaa ér: “M shi m ver ashe, tsô nenge, Waniyôngo [Yesu Kristu u i nder un la] tile sha uwo u Shion [ka tartor u sha je la]. Ior lu a Na imôngo ve kuma dubu deri man akunduahar kar unyiin, i nger iti Na man shi iti i Ter Na sha atsul a ve. . . . Ka mba i paa ve ken ior, ve lu iyiagh ki tsutswaagh sha ci u Aôndo man sha ci u Waniyôngo kpaa ye.” Aluer u tôô ior mba kuman 144,000 mban u kar sha ior ubiliôn ubiliôn mba sha tar yô, iyenge ne ka “Anikyumuile u kpeghee.” I kaa ér vea tema tor. Nahan vea hemen unô?

Yesu yange ôr kwagh u kweior u sha uhar u jighjigh, mba vea zua a mtsera ken Tartor u sha la. Yesu kaa ken Yohane 10:16 ér: “M ngu a iyôngo igen i i lu hen ityôr ne ga yô, i kpaa Me va a i keng, ia ungwa imo Yam; ia hingir ikyum i môm man orkuran môm kpaa.” “Iyôngo” la ngi veren ishima u va lun uma gbem sha won shin tar, man ka ishimaverenkeghen i Adam man Ifa kpa yange ve lu a  mi je la. Er nan ve se fe ser ka shin tar vea va lu uma?

Bibilo ôr kwagh u tar ne va hingir Paradiso la acin imôngo. Aluer u soo u fan er Bibilo i er kwagh ne yô, bugh ase Bibilo you, ôr avur a a dondo ne: Pasalmi 37:9-11; 46:8, 9; 72:7, 8, 16; Yesaia 35:5, 6; 65:21-23; Mateu 5:5; Yohane 5:28, 29; Mpase 21:4. Avur ne tsengaôron ér a va kar a ityav mbi nôngon man ijen man angev kua ku cii kera. Shi avur ne kaa ér shighe ngu van u a saan ior mba dedoo iyol u maan uya vev shi kahan ishule ve shi yesen ônov vev a mbamzeyol shio. * Imba ishimaverenkeghen ne i kôr u ken ishima ga he? Se mba a ityôkyaa i dedoo i nan jighjigh ser, ica a gba ga tsô ityendezwa ne ia kure sha mi vough.

Aluer u hide u hen sha hanma kwagh u a Aôndo a er sha ci wou kua uumace jimin cii la yô, u nenge wang, er a er akaa kpishi yô. A na se uma shi se mba a kwaghfan, shi kpe se iyol shi se mba a akaa a hange hange a a wasen se u lun uma yô. Heela tseegh ga, iyua i nagh ku ipaan i Aôndo a ne sha Yesu, u a kpe sha ci wase la ia fatyô u van se a averen a hemban cii, er se hen ken Yohane 3:16 nahan.

Shighe u se va zua a uma u tsôron ve se lu bem bem shi se lu ken mkpeyol shi angev man ityav man ijen shin ku ua lu ga la, se zua a msaanyol man averen a been mayange ga. Ka we iyol you i gbe u u er kwagh u una na u zua a averen ne shin u zua a mi ga ye. Kpa jighilii yô, Ka nyi u lu eren sha ci u Aôndo?