U Fa Kpa?

Yesu Yange Lu a ma Anmgbian ken Mbaapostoli Nav Mba 12 Mbaraa?

▪ Ruamabera na mlumun sha mpin ne jighilii ga. Nahan kpa, adini u Mbayuda kua akav agen tese ér alaghga mbaapostoli mbagenev ken mba 12 mbara lu anmgbianev mba Yesu.

Mbangeren ityakerada i Ivangeli pase se ati a kasev mbagenev mba ve tile ve lu kenger er Yesu kpe sha kon u mtsaha la yô. Yohane 19:25 pase ati a kasev mban unyiin: “Ngô Na [Maria] tile heregh kua anngô u ngô Na u kwase, kua Maria, kwase u Kelopa, man shi Maria Magedalena kpaa.” [NW] Aluer se tôô kwagh u i nger ken ivur ne se kar sha avur a ken takerada u Mateu man Marku aa á er kwagh shon ne môm yô, se mase kuren ikyaa ser ka Salome yange lu anngô u ngô u Yesu u kwase la ye. Ikyav tese ér Salome shon ne lu ngô u ônov mba Sebedeu. (Mateu 27:55, 56; Marku 15:40) Nahan yô, ônov nav mba i yer ati a ve ken avur agen ken Bibilo ér Yakobu man Yohane la lu anmgbianev mba Yesu. Yesu yange yila Yakobu man Yohane mba ve lu ngô môm, shi ve lu ior mba kôron ishu ne ér ve hingir mbahenen nav.—Mateu 4:21, 22.

Akaaôron a uter a i nger ken Bibilo ga yô, kaa ér Kelopa shin Alefeu, nom u kwase ugen ken kasev mba i ter ve ken Yohane 19:25 la, lu anmgbian u Yosev, ter-ikyoson u Yesu. Aluer ka mimi yô, kwagh ne tese ér Yakobu, wan u Alefeu, apostoli ugen ken mbaapostoli mba 12 mbara kpa lu anmgbian u Yesu.—Mateu 10:3.

Yesu man Yohane u Eren Batisema Lu Anmgbianev Nena?

▪ Mbagenev na jighjigh ér Yesu man Yohane lu anmgbianev mba ken iyou. Jighjigh u nan ne har sha gbenda u i gem Luka 1:36 i wanger ga la. U tesen ikyav yô, ken Bibilo i King James Version la, i nger ishember igen ken ivur ne i tesen ér mbamaren mba Elisabetu, ngô u Yohane man mbamaren mba Maria, ngô u Yesu, lu ngô môm, ter môm.

Kpa sha mimi yô, ishember i ken zwa Grika i í gem ken ivur ne la i tese gbenda u yange ve lu anmgbianev la jighilii ga. Ishember shon i tese ér kasev mba uhar mban due tar môm, nahan kwagh ne tese jighilii ér mbamaren vev lu ngô môm, ter môm keng ga. Takerada u i yer ér, The Interpreter’s Dictionary of the Bible la kaa ér, “inja i ishember ne gbanger gande u wasen se u fan jighilii er yange ve lu anmgbianev la.” Nahan yô, mhen u ior ve lumun a mi ér Yesu man Yohane lu anmgbianev mba ken iyou la due hana? Takerada u i yer ér The Catholic Encyclopedia la na mlumun sha mpin ne ér: “Hanma kwagh u se fe sha kwagh u . . . mbamaren mba Maria cii . . . i zua a mi ken ngeren mba ngise, mba i er ukwaghhir ker la.”

Sha nahan yô, a bunde kera kera kpa Yesu man Yohane yange ve due tar môm tseegh tsô, ve lu anmgbianev mba ken iyou keng, kpee ga.