ORTAMEN ugen, u a lu ken tar u u lu a kwagh ave kpishi ga yô, mba yer un ér François, a kaa ér: “Yange mba eren ishangen igen mba been yô, ayôôso num, nahan kwagh ne na Mbashiada mba Yehova yevese undu uyaav vev. Kwaghyan man icigh ban kpishi, shi akaa ne aa lu kpa, a taver ishe i gande. Ubanke de u eren tom, inyaregh lu ken akeke a dughun inyaregh ga, agen je yô de u eren tom.”

Fese je afishi a branci hii u tindin a inyaregh man akaa a kwagh gba sha mi ave ave la hen Mbashiada mba ayôôso zenda ve, ve za lu ken Ayou a Tartor sha ajiir kposo kposo ken tar shon la. Iniongo i mba eren ayôôso kposo kposo yisa igbenda, kpa er iniongo ne fa er Mbashiada mba Yehova ve we ave sha kwagh u patii ga yô, ashighe kpishi i na umato mba branci asev ian i karen.

François kaa ér: “Se mba ngur yemen hen Iyou i Tartor igen yô, ushoja mba ve yer mape yô, bugh usu sha mato wase. Nahan kpa, agbo kar hen atô wase yem. Se mba nengen a orshoja ngur yevese van sha avese, a ikyagh ki tswamev ken uwe yô, se wa gia, se hide ajime ajime ayem, maa se za goom se haa usu se hide se yem hen iyagh ki branci wase. Yange se sugh Yehova er a war uma wase yô. Kpernan, i kura anmgbianev 130, mba ve lu ken Iyou i Tartor i se soo u zan her la, i yem a mi ijiir igen, ape zayol lu ga yô. Mbagenev va shin afishi a branci, nahan se nenge sha ugbayol vev mba sha iyol man mba ken jijingi zan zan ayôôso la kar been.”

François kaa ér: “Shighe kar yô, anmgbianev mba sha ajiir kposo kposo ken tar la nger uwashika kpishi sugh afishi a branci kigh kigh sha iwasen i i na ve la. Yange mba nengen iwasen i anmgbianev vev na ve ne yô, kwagh ne na ve hemba suur sha Yehova cii.”

Shighe u uaahe mba sha gbaaôndo man mba uumace ve ve a mi la ka vea tser anmgbianev asev yô, se mba kaan a ve ser, “i̱ tsee ne iyol, ide nen” ga. (Yak. 2:15, 16) Ka se ker u nengen sha ugbayol vev. Sha ayange a mbaapostoli la kpa kwagh lu nahan. Yange mba te icin ér zegejen ngu van yô, “mbahenen wa ken ishima er hanmô ve nana nôngo sha kwagh u nan fatyô yô, sha u tindin a iwasen hen anmgbianev mba ve tem ken Yudia la.”—Aer. 11:28-30.

Er se lu Mbashiada mba Yehova yô, ka se kegh iyol u wasen anmgbianev sha ugbayol vev. Nahan cii kpa, ior mba a ugbayol mba ken jijingi kpaa. (Mat. 5:3) Yesu yange kaa a mbahenen nav ér ve za gema ior ve hingir mbahenen sha er vea wase ve vea fa gbayol ve u ken jijingi la, shi vea ker gbenda u kuren un kpaa yô. (Mat. 28:19, 20) Se asange asange ka se na shighe wase man agee a ase kua akaa a ase u eren tom u i ne se ne. Shi nongo wase ka u tôô inyaregh ki i er iyua a mi la u wase anmgbianev sha akaa a iyolough, kpa ngu hembe vihin inyaregh sha u nengen sha akaa a Tartor man u samber a loho u dedoo. Sha nahan yô, ka se tese ser Aôndo man mba wan ndor a vese doo se ishima.—Mat. 22:37-39.

Mba ve lu suen tom u pasen kwagh u Mbashiada mba Yehova ve eren tar sha won cii la ve lu a vangertiôr ér a er tom a uiyua vev sha inja man sha gbenda u vough kpaa. U fatyô u wasen anmgbianev ou mba ve nyer ken ican la kpa? Sar u u suen tom u geman ior hingir mbahenen ne kpa? Aluer ka nahan yô, “de nyum u eren kwagh u dedoo a mba ve kom un la ga, zum u u lu a tahav mbu eren un yô.”—Anz. 3:27.