I Sôr Mgber u Iyoukura i Henen ken Tiônnongo La!

Se sôr mgber u Iyoukura i henen ken Tiônnongo la, sha er ia hemba doon shi ia hemba wasen we u henen Mkaanem ma mimi ma Yehova mara yô.—Ps. 1:2; 119:97.

Yange se hii duen a mbamgber mba Iyoukura uhar, ka anyom anyiin je ne; môm lu sha ci u ior mba ken won, ugen la di sha ci u se Mbashiada mba Yehova man mba henen Bibilo mba ve lu zan hemen yô.

Orgen u a civir Yehova ica i gbe hegen yô, yange nger kwagh sha kwagh u mgber u Iyoukura i henen ken Tiônnongo la ér: “Iyoukura i henen ken Tiônnongo i hiihii la, yange i doom tsung, shi m kav i tsembelee kpaa. Gbenda u yange i̱ pase akaa a mimi a injaa la bende a ishima yam jighilii. M sugh ne kpishi sha kwagh u he u ne ne se ne.” Anmgbian ugen nger ér: “Ka i doom u keren ian, timen ken mgber u henen ken Tiônnongo ne, a Bibilo yam.” Se na jighjigh ser we kpa kape i lu u ken ishima je la.

Er u fe nahan, yange se hii u gberen magazin u Iyoukura ken inyom i 1879 la, man ka ikyumen kwagh u se fetyô u eren sha iwasen i Yehova man tahav mbu jijingi na yô. (Sek. 4:6) Ken anyom 133 a a kar ne, se gema akaa kpishi sha igbende i magazin ne. Ken inyom i 2012 ne, hanma mgber u henen ken Tiônnongo yô, una luun a foto u tesen er Mbashiada mba Yehova ve lu pasen kwagh yô, sha u umbur se tom u Aôndo a ne se, ú eren shiada sha kwagh u Tartor u Yehova kpoghuloo la. (Aer. 28:23) U zaan sha peeji u sha 2 yô, u nenge a foto u i tee, i gem i kper sha igbende la, kua mkaanem ma tiônôô, ma pasen kwagh u foto la a lu tesen yô. Ken inyom ne jimin cii, kwagh ne una umbur se cii ér ior mba Yehova mba pasen loho u dedoo sha ‘tar cii.’—Mat. 24:14.

Ka nyi igen kpa i gem sha magazin ne? Se tôô ngeren u hiden saven kwagh, u ka a lu ken mkur u ngeren u henen ken Tiônnongo la, se yem a mi sha mhii. Kwagh ne una wase u u̱ fan atôakaa a vesen, a i gbe u ú ver ishima sha mi er u lu ôron shi henen ngeren u henen ken Tiônnongo la. Kpa, or u hemen mkombo u Iyoukura i Henen la, una za hemen u pinen mbampin mban sha u saven kwagh u i hen la ken mkur u hanma kwaghhenen cii. Kwagh ugen yô, se seer gbanger a aan a ken akpe la cuku shi upeeji man unamba mba akumahiange hemba duen tsembelee.

Er se pase ken mgber u ken uwer ne nahan, se mba seer ngeren u he, una lu a itinekwagh ér “Ngeren u Pasen Yiase Yase,” sha u pasen akaa a a er Mbashiada mba Yehova mba sha ayange ne yô. Shi ngeren mba sha kwagh u uma u or kpa, ashighe agen vea duen ken mgber ne, vea luun a itinekwagh ér “Ve Na Ayol a Ve a Ishima Ve.” Ngeren mban vea pase kwagh u iember ma mkom man msaanyol u anmgbianev mba nomso man mba kasev ka ve zua a mi sha u za pasen kwagh hen ape kwagh a hembe gban sha mbapasenkwagh mba tartor yô.

Yô, shighe u ne tee u henen Mkaanem ma Aôndo a magazin ne la, a̱ lu ne a iwasen kpishi.

Mbangeren

[Foto u sha peeji 3 la]

1879

[Foto u sha peeji 3 la]

1895

[Foto u sha peeji 3 la]

1931

[Foto u sha peeji 3 la]

1950

[Foto u sha peeji 3 la]

1974

[Foto u sha peeji 3 la]

2008