Ne Agumaior, Hendan Nen A Mkighir U Mbakov
Ne Agumaior, Hendan Nen A Mkighir U Mbakov
‘Kwaghôron wen a̱ luun . . . u i we bar sha mi yô, sha u fa nen er i doo u ne ôr kwagh a hanma or yô.’—Kol. 4:6.
1, 2. Ka i lu agumaior kpishi ken ishima nena sha kwagh u ve lun kposo a mbakov ve laa, man ka sha ci u nyi?
A SHI nan kpa, u ungwa a ungwa ishember i “mkighir u mbakov” la tseegh ga, kpa we iyol you u vande tagher a mkighir u mbakov. Alaghga shighe ngu u yange or mgbegha u ken ityô ér u er kwagh u ú fe wer ka u shami ga yô. Ka a kighir we ér u er kwaghbo nahan, i lu u nena? Wanye ugen u lun anyom 14, iti na ér Christopher, a kaa ér: “Ashighe agen ka m tôm mer ma m ndiir shin ma m dondo mbayev mba se ze makeranta imôngo la ityô sha er me lu kposo a ve ga yô.”
2 Mbakov wou ka ve na yô, i lu u er u̱ er kwaghbo u ve lu kighir we ér u er laa? Aluer ka nahan yô, ka sha ci u nyi? Alaghga ka sha ci u ú soo wer ve lumun we shinii? U lun a isharen i dondon ve ityô la tseegh yô, ka kwaghbo kpee ga. Mbaganden kpa ka ve soo ér mbakov ve ve lumun ve. Mbaganden man mbayev cii, or môm kpa soo ér mbagenev ve venda nan ga. Nahan kpa, jighilii yô, ashighe agen ior mbagenev vea soo kwagh wou ga sha ci u ú venda u eren kwaghbo yum. Yesu kpa yange tagher a imba kwagh ne. Nahan cii kpa, Yesu eren kwagh u vough hanma shighe. Shin er mbagenev dondo un shi ve hingir mbahenen nav nahan kpa, mbagenev gema laha Wan u Aôndo shi ve “wa Un ikyo ga.”—Yes. 53:3.
Mkighir u Mbakov Ngu a Tahav Kuma Nena?
3. Aluer u lumun u eren kwaghbo u mbakov wou ve kighir we a mi la yô, a lu shami ga sha ci u nyi?
3 Ashighe agen yô, a tsue u ken ishima er u er kwagh u mbakov wou ve lu kighir we ér u er la sha er vea venda u ga yô. Ú er nahan yô, a lu shami ga. Gba u Mbakristu vea lu “mbayev mba ka i daase a ve i yem a ve wue wue sha ahumbe” la ga. (Ef. 4:14) Alaghga mbayev mba kiriki vea ngôôr eren kwagh u mbagenev ve soo ér ve er la ga. Nahan kpa, er u lu gumor yô, u ngu yemen u za hingir organden. Sha nahan yô, wea na jighjigh wer atindiakaa a Yehova nga sha ci u mkpeyol wou yô, de deen mkpeyol la a karen we ga, dondo kwagh u ú ne jighjigh a mi la. (Dut. 10:12, 13) Aluer u er kwagh ugen kposo yô, u lu geman tahav mbu u lu a mi sha uma wou la tan kera. Jighilii yô, aluer u de mbagenev kighir we u er kwaghbo yô, u hingir atoki a ve.—Ôr 2 Peteru 2:19.
4, 5. (a) Aron yange de mkighir u mbakov hemba un nena, man kwagh u er un la tese se nyi? (b) Ka sha igbenda i nyi nahan alaghga mbakov wou vea nôngo ér vea kighir we?
4 Sha shighe ugen la, Aron, anmgbian u Mose er kwaghbo sha ci u a cia mkighir u mbakov. Shighe u Mbaiserael kumbur a na ér a er ve an-aôndo la, a er nahan vough. Aron yange lu tor-mcie ga. Cii man shighe la yô, Aron sue Mose ve za tagher kwagh a Farao, or u hemban tahav ken Igipiti cii la. Shighe la Aron lam a na vangertiôr shi pase un loho u Aôndo tindi hen a na yô. Kpa ka lun ior mba ve kpa ve lu Mbaiserael er un nahan la mba kighir un yô, Aron cia. Nenge mkighir u mbakov a lu a tahav sha wono! Yange hemba lun Aron zange u hendan a Farao a u hendan a mbakov na.—Eks. 7:1, 2; 32:1-4.
5 Er ikyav i Aron la i tese nahan, ka agumaior tseegh a tagher a mkighir u mbakov ga, shi ka di zayol u ior mba i vande lun ve ken ishima u eren kwaghbo la tseegh ga. Mkighir u mbakov una fatyô u benden a mba i sar ve sha mimi u eren kwagh u vough la je kpaa, kua we. Mbakov wou vea nôngo u kighir we ér u er kwaghbo sha u tan we mciem iyol shin wan we ikyaa iyol gayô nahan we tar. Mkighir u mbakov una va sha nyityô gbenda kpa, taver u hendan a mi tsô. Cii ve or a hendan a mkighir u mbakov nana hemba un yô, gba u nana hii lun a vangertiôr ken kwagh u nan ne jighjigh a mi la.
“Time Nen ken Ayol a En”
6, 7. (a) Er nan ve i lu a inja u lun a vangertiôr ken akaa a u ne jighjigh a mi laa, man u lu a vangertiôr nena? (b) Ka mbampin mba nyi u fatyô u pinen iyol you sha er u seer taver vangertiôr wouwe?
6 Saa u vande lun a vangertiôr wer akaa a u ne jighjigh a mi man atindiakaa a u dondon la ka a vough, ve u hendan a mkighir u mbakov ye. (Ôr 2 Mbakorinte 13:5.) Wea lu or u cian kwagh sha marami je kpa, vangertiôr una wase u ú kera cia ga. (2 Tim. 1:7, 8) Kpa, or u nan cie kwagh ga je kpa, a taver nan u tilen dông sha kwagh u nan ne jighjigh a mi vindi vindi ga yô. Nahan er nan u time ken iyol you sha er u lu a vangertiôr wer akaa a i tese u ken Bibilo la ka a mimi ga? Hii sha atesen a kiriki a u ne jighjigh a mi la. U tesen ikyav yô, u na jighjigh wer Aôndo ngu, shi u ungwa mbagenev pase atôakyaa aa a ne ve ve ne jighjigh ér Aôndo ngu yô. Nahan pine iyol you wer, ‘Kanyi i ne ve m lu a vangertiôr mer Aôndo ngu?’ Awashima u mpin la yô, ka u nan we akperan ken ishima ga, kpa ka sha u taver jighjigh wou u nan. Shi pine iyol you wer, ‘Er nan ve m fe mer ka Aôndo a ne i nger Icighanruamabera?’ (2 Tim. 3:16) ‘M na jighjigh mer se mba ken “ayange a masejime” hegen sha ci u nyi?’ (2 Tim. 3:1-5) ‘Kanyi i ne ve m ne jighjigh mer atindiakaa a Yehova nga sha ci u mkpeyol wama?’—Yes. 48:17, 18.
7 Alaghga a taver we u pinen iyol you mbampin mban nahan, sha ci u ú lu cian wer u zua a mbamlumun sha mi ga. Nahan kpa, u er nahan yô, a lu inja er u ngu nahan mato yô, u venda u kenger hen ijiir i tesen mkurem ma ken mato la, sha ci u cier we iyol er ivaan la ngi tesen ér mkurem ou “Uma” nahan! Aluer mkurem uma ken tanke u mato wou la cica cii yô, a gba u ú fa sha er u er kwagh sha mi yô. Kape we kpa i doo u ú tôv iyol you sha er wea ban a vangertiôr kpa u fa, nahan u ker gbenda u taver un je la.—Aer. 17:11.
8. Pase er ú taver vangertiôr u ú lu a mi wer tindi u Aôndo a we ér i de eren idya ga la ka kwagh u a doo u ú er yô.
8 Nenge ase ikyav ne. Bibilo taver we ishima ér u ‘yevese idya.’ Pine iyol you wer, ‘Er nan ve i doo u me dondo tindi la?’ Hen sha atôakyaa a a ne ve mbakov wou ve eren idya la cii. Shi hen sha atôakyaa kposo kposo a a ne ve or u eren idya yô, i lu “iyol i nan je nan eren i kwaghbo” la. (1 Kor. 6:18) Time ase sha atôakyaa la, nahan pine iyol you wer: ‘Kanyi i̱ hembe doon u me ere? Aluer m nyôr iyol ken idya i eren nahan, me zua a iwasen ker je he?’ Shi seer timen sha ikyaa la, nahan pine iyol you wer, ‘Aluer m er idya nahan, a lum ken ishima nena?’ Alaghga sha hiihii la a doo mbakov wou a we, kpa a lu u ken ishima nena zum u ú va lu vea mbamaren ou shin Mbakristu mbagenev ken Iyou i Tartor laa? A lu u ken ishima nena shighe u ú lu nôngon wer u er msen hen Aôndo laa? Mimi je, ú soo wer u gema mlu wou u dedoo vea Yehova la u ta kera sha er a doo mbayev mba ken kelase wou a we yôô?
9, 10. Aluer u ngu a vangertiôr ken akaa a u ne a jighjigh la yô, kwagh la una wase u, u seer taver ishima shighe u ú lu vea mbakov wou nena?
9 Wea lu wan a wa ikyondo yô, u ngu sha shighe u “mkav [wou] u ken ishima” a lu vesen hemban ave a tse yô. (Ôr Mbaheberu 5:14.) Tôô shighe ne hen er i hii ve u lun Orshiada i lu u kwagh u injaa yô. Aluer u gbidye kwar sha imba gbenda ne yô, u hemba lun a vangertiôr ken akaa a u ne jighjigh a mi la cii. Nahan shighe u ú tagher a mkighir u mbakov kpa, u fatyô u hendan a mi fese man a vangertiôr. U er nahan yô, a lu u ken ishima er gumkwase ugen u a lu anmgbian ken Kristu la nahan, a kaa ér: “Ka mea hendan a mkighir u mbakov yô, m pasen mbagenev or u m lu yô. Kwagh ne ka di ‘ma kwaghaôndo’ tsô ga. Kpa ka ikile i mhen wam man asaren a am man ieren yam man uma wam jimin cii.”
10 Sha mimi yô, ka i gba u or nana nôngo kwagh tsung ve nana er kwagh u nan fe ér ngu shami la ye. (Luka 13:24) Shi alaghga u lu henen wer shin kwagh u m eren ne ngu a iwasen je kpaa-o? Kpa umbur wer: Aluer u ngu mhôônom mhôônom shin kunya ngu kôron we a iyol you sha kwagh u injaa u ú kange ishima wer u er yô, mbagenev vea hemba kighir we cii. Nahan kpa, aluer u lam vangertiôr yô, a kpiligh we iyol er mbakov wou vea ngôôr den gbenda wou ga yô.—Nenge Luka 4:12, 13.
‘Henen Imokwagh i U Ôr Yô’
11. Aluer u vanden wan agoyol sha u va tagher a mkighir u mbakov yô, a wase u nena?
11 Kwagh u injaa ugen, u una wase u u̱ hendan a mkighir u mbakov yô, ka u wan ago iyol. (Ôr Anzaakaa 15:28.) Inja i u wan agoyol yô, ka u vanden henen sha kwagh u ú nenge wer u va tagher a mi la. Ashighe agen yô, aluer u vande henen sha kwagh u ú nenge wer u va tagher a mi la yô, u palegh iyongo i vesen. U tesen ikyav yô, tôô wer u nenge a mbakov wou mbagenev ken makeranta mba imôngo shi mba man taav sha hemen ape u soo u karen yô. Aluer u kar her nahan vea na u taav ér u maa? Aluer u nenge wer kwaghbo una fatyô u hiin yô, u er nyi? Anzaakaa 22:3 kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.” Aluer u kar gbenda ugen yô, u fatyô u palegh iyongo la kuaa je. U eren nahan la ka u cian a cia kwagh ga, kpa ka gbenda u eren kwagh sha kwaghfan.
12. Aluer or pine u mpin sha u nahan we tar nahan, u na mlumun nena?
12 Aluer u tagher ishigh a zayol u ú fatyô u palegh ga di ye? Ikyav i tesen yô, aluer orkov wou pine u ér: “We nahan u ngu a yav a or gaa?” sha ci u nan tôô ér hegen nahan u kuma u ma u fe kwagh u nomsoor shin kwase di ye? Kwagh u una wase u yô, ka u dondon kwaghwan u a lu ken Mbakolose 4:6 la, a kaa ér: “Kwaghôron wen a̱ luun u doon gbem, u i we bar sha mi yô, sha u fa nen er i doo u nea ôr kwagh a hanma or yô.” Er ivur ne i tese nahan, ka mlu u ú lu ker la una wase u u̱ fan gbenda u ú na mlumun ye. A kera gba u ú pase Bibilo gôgônan keng ga. Alaghga, mlumun u tiônôô, u ú na vangertiôr la tseegh kpa una kuma. U tesen ikyav yô, u fatyô u nan mlumun sha mpin u sha kwagh u yavaor la wer, “Een m ngu a yav a or ga ,” shin, “Kwagh wou ngu sha mi ga.”
13. Mkav ngu hange hange shighe u ú lu nan mlumun sha mpin u orkov nan pin sha iyongo la sha ci u nyi?
13 Ashighe kpishi Yesu yange a na mlumun tiônôô zum a fe ér una lam gôgônan kpa a wase ga yô. Shighe u Herode pine Yesu mbampin la, Yesu bugh zwa na tsô kpaa ga. (Luka 23:8, 9) Ashighe kpishi ka i hemba doon u ungwan ato shighe u or pin mpin sha ayongo yô. (Anz. 26:4; Orpa. 3:1, 7) Nahan kpa, alaghga orgen nana vande lamen sha a we dang je kpa, u nenge wer kunda nan iyol sha mimi sha ci u akaa a u ne jighjigh a mi la, er kwagh u aeren a wang sha gbaa u yavaor la nahan. (1 Pet. 4:4) U pase imba or la nahan jighjigh wou u nan u a har sha Bibilo la vighe vighe kpa a vihi ga. Aluer u tagher a imba la yô, de cie u pasen ga. ‘Waan ago iyol veren a ver sha u ú na imo’ yô.—1 Pet. 3:15.
14. Ashighe agen u fatyô u hiden a mkighir sha mbakov wou sha kwaghfan nena?
14 Ashighe agen yô, u fatyô u hiden a mkighir la sha mbakov wou. Nahan kpa, gba kpee u ú er kwagh ne sha kwaghfan. U tesen ikyav yô, aluer wanye u hen makeranta wou na u taav ér u ma yô, u fatyô u kaan wer, “Ei, gba den tsô,” maa u kaa wer, “M hen mer we nahan u ngu tsera tsera gande u ú ma taav!” U nenge er mkighir la a hidi sha orkov wou la kpa? U ma u yem pasen ityôkyaa i u me taav ga la yô, u gema u na orkov wou una yem henen sha ityôkyaa i í ne ve un me taav la.
15. Ka hanma shighe nahan i doo u ú kar hen ape mbakov wou ve lu kighir we ér u er kwaghbo la kera, man ka sha ci u nyi?
15 Nahan kpa, aluer u nôngo nan, kpa mbakov wou de u kighir we ga di ye? Hen shighe la, hemba doon u karen her kera. Aluer u ngu her gbem yô, u lu hemban veren iyol you ken mlu u una na u er ma kwagh u peren tindi u Yehova yô. Sha nahan yô, undu ijiir la. Wea er nahan kpa, de nengen wer mbakov wou hemba u a hemba ga, sha ci u ú er kwagh u i gbe u ma u er yô. U hingir atoki a mbakov wou ga, shi u na saan Yehova iyol.—Anz. 27:11.
Er ‘Mbamhen Mba Kwagh a Za a Doo Yô’
16. Agumaior a a senge ér nga civir Yehova la aa fatyô u kighir we ér u er kwaghbo nena?
16 Ashighe agen yô, a lu agumaior a a senge ér nga civir Yehova je aa kighir we ér u er kwaghbo ye. U tesen ikyav yô, aluer u za hen mtem u imba or la nan lehe, man u za kav wer ma organden ngu her u nengen ér kwagh za sha inja ga nahan u er nena? Shin, aluer gumor u nan senge ér nan ngu civir Yehova yô nan va a msôrom hen mtem, man mô wen hen mtem la kuma anyom a tindi a ne ian ér or nana kuma ve nana ma msôrom la ga di ye? Akaa kpishi aa fatyô u eren, aa á gba u ú dondo imoshima you i Bibilo i tsaase i la yô. Anmgbian u kwase ugen u lun anyom 16 kaa ér: “Mo vea anmgbian wam u kwase yange se due hen ijiir i nengen fiim igen kera sha ci u fiim i í lu tesen la ngee a iliam i dang ker yum. Mbagenev mba se za imôngo la tema lu her. Mbamaren asev wuese se sha kwagh u se er la. Nahan kpa, ishima gema vihi mbagenev mbara sha ci u kwagh u se er la na yô, lu er ve neer dang nahan.”
17. Zum u ú lu zan hen mtem yô, ka akaa a nyi nahan u fatyô u eren sha er u dondo atindiakaa a Aôndoo?
17 Er kwagh u yange er agumaior a se ter sha heen ne a tese nahan, alaghga u dondon imoshima you i Bibilo i tsaase i la, una na u hingir ityough gondo a mbagenev. Nahan kpa, er kwagh u ú ne jighjigh wer ka u vough la. Wa agoyol u eren nahan. Wea lu zan hen mtem yô, wa agoyol sha er kwagh a va kera za er u ver ishima la ga yô, u undu ijiir la yô. Agumaior agen ka a vande lamen a mbamaren vev ér aluer kwagh va kera za sha hwange ga yô, vea gbidye mbamaren vev waya sha er vea va tôô ve a yem a ve ken ya tsuaa yô. (Ps. 26:4, 5) Imba mhen la nahan ‘una na kwagh a za a doo.’—Anz. 21:5, NW.
‘Ember Sha Iyev Ou’
18, 19. (a) U fatyô u lun a vangertiôr wer Yehova soo ér i saan we iyol sha ci u nyi? (b) Aôndo nengen mba ve hendan a mkighir u mbakov la nena?
18 Yehova gba u ér we u ember uma, man a soo ér i saan we iyol kpaa. (Ôr Orpasenkwagh 11:9.) Umbur wer kwagh u mbakov wou kpishi ve zough a mi la ka di “mdoom ma isholibo ma ma lu sha anyangem kpeghee la” tsô. (Heb. 11:25) Aôndo u mimi la soo ér we u zua a kwagh u hemban ngula ica je. A soo ér i saan we iyol gbem sha won. Sha nahan yô, zum u í mee u ér u er kwagh u ú fe wer ka u bo sha ishigh ki Yehova yô, umbur wer hanma shighe u Yehova a kaa ér u er kwagh yô, ka sha ci u mkpeyol wou.
19 Er u lu gumor yô, gba u ú fa wer aluer u er kwagh u doon a doo mbakov wou je kpa, anyom a karen yô, alaghga mbagenev vea kera umbur iti you tsô kpaa ga. Nahan kpa, aluer u hendan a mkighir u mbakov wou yô, Yehova una nenge a mi, shi una hungur a we shin mtil sha mimi wou la mayange ga. Una ‘bugh u aan a Sha, una haa u iveren, je ia neer á haa inya.’ (Mal. 3:10) Heela tseegh ga, una na u icighan jijingi na mgbeghaa sha u wasen we hen shighe u ú yen tahav yô. Sha kpôô yô, Yehova una wase u u̱ hendan a mkighir u mbakov wou!
Ú Umbur Kpa?
• Mkighir u mbakov ngu a tahav kuma nena?
• Vangertiôr una wase or nana hendan a mkighir u mbakov nena?
• U wa agoyol u tagher a mkighir u mbakov nena?
• Er nan ve u fe wer mtil sha mimi wou la gba Yehova kwagha?
[Mbampin mba ngeren u henen]
[Foto u sha peeji 8]
Aron yange lumun u eren wanbua u zenaria la sha ci u nyi?
[Foto u sha peeji 10]
Wa iyol kegh a kegh, vande tsuan kwagh u ú ôr yô