U Ôron Washika u Yakobu man u Peteru Asav-asav
Mkaanem ma Yehova Ma Uma Je
U Ôron Washika u Yakobu man u Peteru Asav-asav
I ER iniongo i Pentekosti i inyom i 33 la i bee, anyom nga kar er 30 nahan yô, orhenen Yakobu, u lu ngô môm vea Yesu la nger “ikwe i pue kar ihiar” i Iserael u ken jijingi la washika. (Yak. 1:1) Awashima na yô lu u taver ve ishima ér ve taver ken jighjigh u nan shi ve lu a ishimawan shighe u vea tagher a ameen yô. Shi yange wa ve kwagh sha er una kôôm akaa a vihin a a lu zan hemen ken atôônanongo la yô.
Apostoli Peteru yange nger washika na u hiihii la hen Mbakristu taver ve ishima ér ve tile ken mimi dông, ica i gba ga maa Nero, Tor u Mbaroma mough sha u tôvon Mbakristu a ican ken inyom i 64 la. Peteru yange ngôôr ga je maa nger washika na u sha uhar la taver mbananjighjigh a na imôngo ishima ér ve ver ishima sha mkaanem ma Aôndo shi ta ve icin sha kwagh u mve u iyange i Yehova la kpaa. Sha kpôô yô, aluer se ver ishima sha ilyoho i i lu ken washika u Yakobu man Peteru yange ve nger la yô a lu se a inja.—Heb. 4:12.
AÔNDO NE MBA VE ‘SEN SHA JIGHJIGH U NAN’ LA KWAGHFAN
Yakobu nger ér: “Or u nan taver ishima ken imeen yô, saan nan iyol, gadia zum u nana kar ikyaren i i lu karen nan la yô, nana ngohol tsar u uma.” Mba ve ‘sen sha jighjigh u nan’ yô, Yehova ne ve kwaghfan u una wase ve u wan ishima a ameen yô.—Yak. 1:5-8, 12.
Gba u mba ve “hingir mbatesen” ken tiônnongo cii vea na jighjigh shi vea lu a kwaghfan kpaa. Yakobu er kwagh u nombor ér ngu “anlyegh u kpeghee” kpa ua fatyô u “hôngor iyol cii” been yô, a ta icin sha kwagh u aeren a taregh a aa fatyô u vihin ikyaryan i or vea Aôndo la. Shi a tese kwagh u or u nan lu uange ken jijingi nana er ve a hide a kpe nan iyol ken jijingi yô.—Yak. 3:1, 5, 6; 5:14, 15.
Mbamlumun sha Mbampin mba sha Akaa a ken Ruamabera:
2:13—“Mhôônom ma zungwen ma hembe ijir agee” sha nyi gbenda? Ka a va sha kwagh u se va pase Aôndo kwagh wase la yô, Aôndo ka a umbur er se kpa se zungu mbagenev mhôônom yô, nahan un kpa a de se kwaghbo wase sha ci u nagh ku ipaa ku Wan na la. (Rom. 14:12) Nahan doo u se kpa se zungwen mbagenev mhôônom mgbeghaa ga he?
4:5—Ka hanma ivur Bibilo Yakobu a lu ôron kwagh u i̱ heenee? Yakobu ngu ôron kwagh u ma ivur heen jighilii ga. Nahan kpa, alaghga mkaanem ma Aôndo a ne un a nger heen ne ma har sha kwagh u i er ken avur a Bibilo a a lu shin heen ne, er Genese 6:5; 8:21 man Anzaakaa 21:10 kua Mbagalatia 5:17 nahan.
5:20—“Or u nan ker orsholibo sha gbenda u mtsum u nan la nan hidi a nan” yô, nan cir isholibo i ana? Orkristu u nan ker orsholibo sha gbenda u mtsum u nan la nan hidi a nan yô nan dugh uma u orsholibo u nan gem ishima la ken ku u ken jijingi kera, man alaghga je yô nan dugh uma u nan ken mtim u tsôron la kpa kera. Or u nan lu wasen orsholibo u nan gem ishima la shi nana “cir asorabo [a orsholibo shon] kpishi” kpaa.
Ityesen hen Avese:
1:14, 15. Isholibo hiin shighe u or nan lu a asaren a bo yô. Sha nahan yô, doo u se zer henen sha asaren a bo gbem ga. Kpa hemba doon u se hemba ‘veren ishima’ sha akaa a maan se a maa shi se henen sha akaa shon kpaa.—Fil. 4:8.
2:8, 9. ‘Msange u sha dooshima’ la hendan a “tindi u tartor” u i lu dooshima la. Sha nahan yô, Mbakristu mba mimi mba sangen a sange sha dooshima ga.
2:14-26. I “yima” se “sha jighjigh u nan,” ka “sha tom u eren” u Tindi u Mose shin u Mbakristu ve eren la ga. Jighjigh u nan hemba di u or kaan ér nan na Aôndo jighjigh tseegh la. (Ef. 2:8, 9; Yoh. 3:16) Kpa hemba doon u jighjigh u nan una mgbegha se u eren ishima i Aôndo.
3:13-17. “Kwaghfan u a dugh Sha” la hemba kwaghfan u ‘taregh man u iyolough man u ujijingi mba bov’ la. Nahan yô, se za nen hemen u ‘keren kwaghfan u Aôndo er ka akaa a injaa’ nahan.—Anz. 2:1-5.
3:18. Gba u se lôô ityamegh ki loho u dedoo u Tartor “sha bem sha ci u mba ve ker num la.” Ka hange hange u se lu ior mba keren bem, a lu ior mba moron iyol man mba zôhôn zwa shin mba nôngon num ga.
‘TILE DÔNG SHA JIGHJIGH U NAN’
Peteru yange umbur mba ve na jighjigh a na imôngo mbara kwagh u “ishimaverenkeghen i i lu uma,” i̱ ve lu a mi u va yan dyako sha la. Peteru kaa a ve ér: “Ne mba icuwannongo, nongo u upristi mba sha inja i tor, icighanikyurior.” Peteru we kwagh sha kwagh u m-ongo u ungwan imo i mba se lu sha ikyev ve la been yô, a taver hanma or cii ishima ér, “lu nen ishima i môm, shi lu nen mbazungwenmhôônom; doo nen ayol a en er ka anmgbianev nahan, lu nen mba mhôônom ma ker ve; shi hide nen a ayol a en ijime kpaa.”—1 Pet. 1:3, 4; 2:9; 3:8.
Shighe u “mkur u [tar u Mbayuda] mgbôghom la,” Peteru wa anmgbianev kwagh ér ve ‘kundu ishima shi ve lu geng ge geng shi ve eren msen’ kpaa. Yange kaa a ve ér: “Lu nen geng ge geng shi kuran nen kpaa, . . . Hendan nen a [Satan], tile nen dông sha jighjigh u nan.”—1 Pet. 4:7; 5:8, 9.
Mbamlumun sha Mbampin mba sha Akaa a ken Ruamabera:
3:20-22—Se mba waren sha batisema nena? Gba u mba ve soo u zuan a myom cii vea er batisema. Nahan kpa, batisema tseegh yô una fatyô u yiman se ga. Kpa ka waren se “sha mnder u Yesu Kristu shin ku” la. Gba u or u i lu eren nan batisema la nana na jighjigh ér se fatyô u zuan a myom sha ci u Yesu na nagh sha uma na shighe u kpe la shi i nder un shin ku, nahan “ngu ken uwegh ku yanegh ku Aôndo” shi ngu a tahav sha mbaumav man mbakpenev cii. Ka or u nan ne jighjigh nahan ne batisema u nan la a zough sha ‘iorov anigheni mba ve war sha mnger’ la ye.
4:6—“Mbakpenev” mba yange “i ôr ve Loho u dedoo” la ka unô? Ka mba yange ve lu ‘kpenegh ken gbev mbu nôngon kua asorabo ve’ shin mba ve lu kpenegh ken jijingi cii ve, ve va mase ungwan loho u dedoo la. (Ef. 2:1) Nahan kpa mba ne jighjigh ken loho u dedoo yô ve hingir “uma” sha ci u ve hingir u yan ikyar i dedoo vea Yehova.
Ityesen hen Avese:
1:7. Saa a kar jighjigh u nan wase ve una hemba lun a inja ye. Imba jighjigh u nan taveraa la ngu a ‘na sha er uma una war yô.’ (Heb. 10:39) Mayange akaa a karen jighjigh u nan wase la a de tur se hiden a mi ijime ga.
1:10-12. Sar mbatyomov u gbirin ashe shi kaven akaa a mimi a Aôndo a a ze kweng, a uprofeti mba Aôndo mba sha ashighe a tsuaa yange ve nger sha kwagh u tiônnongo u Mbakristu mba i shigh ve mkurem la. Nahan kpa, ka shighe u Yehova hii u eren kwagh a tiônnongo la ior hii u fan akaa ne ye. (Ef. 3:10) Nahan doo u se kpa se dondo ikyav i mbatyomov la nahan se tôv sha “akaacimin a Aôndo” la ga he?—1 Kor. 2:10.
2:21. Doo u se dondo ikyav i Yesu Kristu a ver se la, nahan se kpa se ya ican sha er se kende a mtemtor u Yehova la sha yô.
5:6, 7. Ka sea gema ishima i nyian yase la cii sea haa sha Yehova yô a wase se u veren mcivir u mimi hiihii ken uma wase, nahan ishima i kera nyian se sha kwagh u kper una er la ga.—Mat. 6:33, 34.
“IYANGE I TER IA VA”
Peteru nger ér: “Mayange ma kwaghôron u profeti due sha awashima u or ga, kpa Icighan Jijingi mgbegha ior man ve ôr kwagh u Aôndo ye.” Aluer se ver ishima sha kwaghôron u profeti yô, una kura se sha ikyev i “mbatesen mba aiev.”—2 Pet. 1:21; 2:1-3.
Peteru ta se icin ér: “Ken ayange a masejime mbanahantar vea due a tarnahan, . . . Kpa iyange i Ter ia va er ormbaiv nahan.” A mase kuren washika na sha u wan mba ve lu ‘keghen mve u iyange shon’ la kwaghwan u doon tsung.—2 Pet. 3:3, 10-12.
Mbamlumun sha Mbampin mba sha Akaa a ken Ruamabera:
1:19—Ka an nan lu “ishan i sha use,” man yange due kôndo sha hanma shighe, man se fa kwagh ne sha nyi? “Ishan i sha use” la ka Yesu Kristu u i ne un tor u Tartor Aôndo la. (Mpa. 22:16) Ken inyom i 1914 la, Yesu, u a lu ishan i sha use la due kôndo sha ken tahav mbu Tor Mesiya sha u yôôn mhii u iyange i he, akaa a i gbe a cii nenge a mi. Mgem u sha iengem la tese iengem man m-ne u a va na Yesu tor u Tartor ken hemen la, man kwagh ne tese ér kwaghôron u profeti u Aôndo ka u bunden mayange ga. Aluer se ver ishima sha kwaghôron la yô, una bugh se asema nahan se mase kaven er Ishan i sha use la i dugh i kende sha yô.
2:4—Kanyi i lu “Tartaru,” man ka hanma shighe yange i gbihi mbatyomov mba ve er isholibo la shimini? Tartaru ka ijiir i lun er purusu nahan, ape i lu ujijingi mba ve er isholibo tseegh i gbihin ve, i lu uumace ga la. Ka mlu u ime i ken ityou i shin gbem sha kwagh u mbaawashima mba Aôndo mba wanger wang mbara. Mba ve lu shin Tartaru cii mba a ishimaverenkeghen i ken hemen la ga. Aôndo yange gbihi mbatyomov mba ve hembaato sha ayange a Noa la ken Tartaru, man vea lu ker zan zan shighe u a kar timin ve la.
3:17—Shighe u Peteru ôr kwagh u “vande fan” la, lu ôron ér nyi? Peteru yange lu ôron kwagh u akaa a aa va er ken hemen, a i tsenga pasen un kua mbangeren Bibilo mbagenev la. Er mfe ne yange lu a ikighir yô, Mbakristu mba tsuaa mbara fa hanma kwagh u una va er ken hemen cii vindi vindi ga. Yange ve fa kwagh u gba u vea fa la tseegh.
Ityesen hen Avese:
1:2, 5-7. Dugh iwasen i i lu nan se ér se seer zuan a “mfe u [se] fa Ter wase Yesu Kristu” la kera yô, iniôngon i se nôngon sha gbashima sha er se lu a aeren, er jighjigh u nan man ishima i taver man mcivir u civir Aôndo nahan la una na “[se] kera lu gbilin shin mbaumen atam ga, ze.”—2 Pet. 1:8.
1:12-15. Gba u se zuan a mbamumbur hanma shighe, er mba ka se zua a mi ken mbamkombo mba tiônnongo man ken kwaghhenen u sha tseeneke kua Bibilo i ôron la ve, se “taver ken mimi” ye.
2:2. Doo u se wa ikyo sha er ieren yase ia na ior vea tuhwa Yehova man nongo na ga yô.—Rom. 2:24.
2:4-9. Aeren a Yehova ken ayange a karen la na yô, se fatyô u lun a vangertiôr ser “mba ve civir Aôndo la Ter fa u yiman ve ken imeen, shi A fa u kuran mbaaferev zan zan á ar sha iyange i ijirigh la, sha u tsahan ve.”
2:10-13. Er “mba ve engem mbara,” ka mbatamen mba ken Kristu je la, ve lu a mbamshi vev shi ashighe agen ka ve er kwaghbo nahan kpa, mayange se tuhwa shin se lam sha a ve dang ga.—Heb. 13:7, 17.
3:2-4, 12. Aluer se ver ishima se mba ‘umbur akaaôron a uicighanmbaprofeti ngise ôr la man shi tindi u Ter Oryiman’ yô, kwagh la una wase se se hemba veren ishima sha iyange i Yehova i i mgbôghom ne.
3:11-14. Er se lu “keghen mve u iyange i Aôndo, man [se] eren sha u i̱ va fefa yô,” doo u se (1) “lu ken icighanmlu,” nahan se lu wang sha iyol man ken mhen man sha aeren kua ken jijingi cii; (2) shi se eren aeren a “civir Aôndo” sha gbashima, er u eren tom u pasen loho u dedoo u Tartor shi geman ior hingir mbahenen la nahan; (3) shi se lu “wang” sha kwagh u taregh; (4) shi se lu a “acôghor iyol ga,” kpa se eren akaa cii sha ishima i wang; shi (5) se lu “ken bem,” inja na yô, se lu ken bem vea Aôndo man anmgbianev asev mba ken Kristu kua hanma or cii.