Ior Mba Keren ‘Tagbede U Lun Ishe’kpishi Nyian
Ior Mba Keren ‘Tagbede U Lun Ishe’kpishi Nyian
“Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—MATEU 24:14.
1, 2. (a) Mbayuda mba sha ayange a Yesu lu shin tar ne la fa kwagh u Tartor u Aôndo kuma nena? (b) Yesu yange wase mbahenen nav ve fa kwagh u a lu Tartor u Aôndo jighilii nena, nahan ve di ve gema ve er nyi?
ZUM u Yesu va shin tar ne la, Mbayuda cii lu ôron kwagh u Tartor u Aôndo hen shighe la yar yar. (Mateu 3:1, 2; 4:23–25; Yohane 1:49) Kpa sha hiihii la, Mbayuda kpishi lu a kav er Tartor la ua hemen ga, shi ve lu a fa tahav mbu ú kpaa ga, shi ve fa er Tartor la u lu gomoti u sha kpaa ga. (Yohane 3:1–5) Mbagenev mba ve hingir mba dondon Yesu je kpa lu a fa kwagh u a lu Tartor u Aôndo jighilii ga, shi ve fa kwagh u vea er ve vea zua a averen a a lu sha ci u mba vea tema tor a Kristu imôngo la kpaa ga.—Mateu 20:20–22; Luka 19:11; Aerenakaa 1:6.
2 Shighe va karen yô, Yesu kundu ishima tese mbahenen nav akaa kpishi a a wase ve yô. Kwagh môm ken akaa a á tese ve yô, lu injakwagh i tagbede u lun ishe kpishi í se hen kwagh sha mi ken kwaghngeren u a kar la. Yesu tese ve kwagh sha injakwagh la ér gba u vea nôngo kwagh kpoghuloo vea ker Tartor u sha la. (Mateu 6:33; 13:45, 46; Luka 13:23, 24) A̱ shi nan kpa, kwagh u Yesu ôr ve la kôr ve sha mtema doo doo je, sha ci u yange ica i gba ga tsô, ve hii u pasen loho u dedoo u Tartor sha ishima i taver, aa uwer gban shio, zan zan ve ar ikighir i tar je. Takerada u Aerenakaa ôr se akaa kpishi a tesen ér yange ve er nahan mimi.—Aerenakaa 1:8; Mbakolose 1:23.
3. Yesu ôr kwagh u Tartor sha ayange ase ne ér nyi?
3 Mba eren tom u pasen ior kwagh u Tartor la nyian nena? Nyian ne kpa, mba pasen ior umiliôn imôngo averen a Tartor la ua va a mi zum u tar ua hingir paradiso yô. Yesu yange ôr kwaghôron u profeti ugen u injaa sha kwagh u ayange a ‘mkurtar.’ Á ôr jighilii wener: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:3, 14; Marku 13:10) Shi á kaa wener, tom u vesen ne ua za hemen, shin er mba vea lu eren ú la vea tagher a mbamtaver mba vesen shi a hendan kwagh a ve shi a tôvon ve a ican kpoghuloo je kpaa. Nahan kpa, á taver mba vea er tom ne cii asema wener: “Or u nana taver ishima zan zan mkur yô, ka nan á yima nan ye.” (Mateu 24:9–13) Nahan yô, gba u se cii se na ayol a ase sha tom ne shi se wa iyol sha ú, se lu a imba inja i orkasua u keren utagbede u Yesu ôr kwagh na ken injakwagh na la. Ior mba a jighjigh u nan man imba gbashima ngula nahan sha kwagh u Tartor nyian kpaa?
Ior Ka Vea Fa Mimi yô, I Saan Ve Iyol
4. Mimi u Tartor ngu benden a ior nyian nena?
4 Zum u orkusua u Yesu ôr kwagh na ken injakwagh la zua a kwagh u nenge wener ka “tagbede . . . u lun ishe kpishi” yô, á ember kpen kpen. Iember la tseegh na yô, á nôngo sha afatyô na sha er una yam tagbede la yô. (Mbaheberu 12:1) Nyian kpaa, mimi u Tartor ú Aôndo ngu urugh ior shi ngu mgbeghan ve asema ker. Kwagh ne umbur se kwagh u anmgbian A. H. Macmillan yange ôr yô. Á ôr ken takerada ugen ú í yer ér Faith on the March la er yange un nôngo ér una fa Aôndo man kwagh u a we ishima ér una er sha ci u orumace la kpaa yô. Á kaa wener: “M zua a kwagh u ior udubu imôngo ve zough a mi hanma inyom yô. Mbá ior di er mo man we nahan, sha ci u ve due ken akuraior man nongoior kposo kposo, mbamlu vev kpa mba kposo kposo shi anyom a ve kpa nga kposo kposo. Mimi tsweren ma or ga. Ngu a urugh nyityô or cii.”
5. Ka ibaver i dedoo i nyi í zough a mi ken inyom i tom i 2004 laa?
5 Kwagh u anmgbian A. H. Macmillan ôr la ka mimi, sha ci u hanma inyom yô, mbaasemaleghlegh udubu uderi imôngo mba loho u dedoo u Tartor u Aôndo ne ú mgbegh ve la ka ve tsegha ayol a ve sha ci u Yehova ér vea er ishima na. Ken inyom i tom i 2004 i̱ yange i̱ hii ken uwer u Setemba 2003 zan zan peregh ken uwer u Agusutu 2004 la kpaa ior kpishi na ayol a ve sha u eren Aôndo tom. Ken atô u iwer 12 shon la iorov 262,416 er batisema, nahan ve tese ken igbar ér ve tsegha ayol a ve sha ci u Yehova. I er ve mban batisema ken ityar 235 í Mbashiada mba Yehova ve lu henen Bibilo a iorov 6,085,387 ken uyaav vev hanma sati la. Mba wasen ior mba eren ityom kposo kposo sha Bibilo i henen ne, kua mba ve dugh ken akuraior man nongo man nongoior man ijô kpa kposo kposo la sha u ve va ma mngerem ma umam, ka mimi u Mkaanem ma Aôndo je la.—Mpase 7:9.
6. Kanyi i ne ve ior ve lu fan mimi ken anyom a karen ne seer a seeree?
6 Ka an jighilii nan lu wasen se ve kwagh a lu nahana? Ikyav tese wang ér ka Yehova a lu urugh ior mba i sar ve u fan mimi la sha u ve va civir un ye. (Yohane 6:65; Aerenakaa 13:48) Nahan kpa, anmgbianev mba ve tange ayol a ve ga, mba ve lu keren Tartor ne kpoghuloo la kpa nôngo kwagh tsô. Zum u anmgbian Macmillan lu anyom 79 la, á nger kwagh á kaa wener: “Sha shighe u m hii ungwan ityendezwa i í er ken Bibilo sha kwagh u uumace mba angev mbu kar kwagh a ve shi ku kpa u tem tor sha a ve la je ishimaveren i m lu a mi sha kwagh u Bibilo i̱ er la ngi di her tsô. Hii sha shighe la je, m kange ishima mer me tôv akaa a Bibilo i̱ tese la me fa me seer, sha er me fatyô u wasen mbagenev mba ve lu nôngon ér vea fa kwagh u Yehova, Aôndo Uhembanagee man akaa a a we ishima ér una va er sha ci u uumace la kpaa yô.”
7. Ka ikyav i̱ nyi i̱ tese iember man gbashima u mba ve lu zuan a mfe u mimi u ken Bibilo laa?
7 Mbatomov mba Yehova mba̱ sha ayange ne kpaa mba a gbashima er anmgbian Macmillan nahan. De se tese ikyav sha anmgbian u kwase ugen ken gar u Vienna, ken tar u Austria, mba yer un ér Daniela. Á kaa wener: “Hii shighe u m lu anye la je Aôndo lu huror wam u hemban doon mo ishima cii. Sarem u fan iti na, sha ci u a gba yilan un tsô ér ‘Aôndo’ nahan, i lum er ngu jim jim ga nahan. Kpa m fa iti na ga zan zan, tsô iyange igen yô, Mbashiada mba Yehova va kwaghpasen hen ya wam, m lu anyom 17 hen shighe la. Ve pasem hanma kwagh u m soo u fan sha kwagh u Aôndo cii. Hegen yô, m zua a mimi ve, saan mo iyol tsung je! Saan mo iyol je maa m hii u pasen hanma or kwagh.” Gbashima u Daniela lu a mi ve lu pasen hanma or kwagh, ver a ver ga la na yô, azende a na a ken makeranta maa gba kôron un ihyom. Daniela za hemen kaa wener, er i lu kôron mo ihyom nahan kpa, “m fa di tsô mer kwagh u Bibilo i̱ tsengeôron la ngu kuren a kure sha a mo tsô, sha ci u m fa dedoo mer Yesu kaa wener ior vea kôr mbadondon nav ihyom shi vea tôv ve a ican sha ci u iti na. Kwagh ne na yô, saan mo iyol shi kondom iyol kpaa.” Ica gba ga je tsô maa Daniela tsegha iyol na sha ci u Yehova, i er un batisema. Hii hen shighe la je gba nôngon ér una er tom u mishen. Daniela yange va vôso Helmut, nahan wen man nom na maa ve hii u pasen ior mba ken Afrika man ior mba ken China man Filipino kua ior mba ken India mba ve tem twer ken gar u Vienna la cii kwaghaôndo. Hegen ne, Daniela man nom na Helmut mbá eren tom mishen ken tar ugen ken imbusutariyan i Afrika.
Mba Gbe Uwer Ga
8. Ka gbenda u injaa u nyi mbagenev ve tese ér Aôndo doo ve ishima shi ve sue Tartor na sha mimini?
8 Tom mishen ú ior mba Yehova nyian ve lu eren la ka gbenda môm u tesen ér Aôndo doo ve ishima shi ve sue Tartor na sha mimi. Mba ve nyer tom mishen lumun u yemen ajiir a icaa za eren tom u Tartor er orkusua u Yesu ôr kwagh na ken injakwagh la kpa lu zenden keren utagbede nahan. Kpa mbamishen mban yô, ú ngu wer mba keren loho u dedoo ve ve lu yemen ajiir a icaa ga; kpa, mba yemen sha ajiir la sha u vea za pase ior mba sha ajiir la loho u Tartor, vea tese ve shi vea wase ve ve̱ hingir mbahenen mba Yesu Kristu. (Mateu 28:19, 20) Ken ityar igen yô, ka i gba u vea wa ishima a tôvacan mba ganden ve vanger je kpaa. Nahan kpa, mba zuan a averen mgbeghaa sha ishimawan ve la.
9, 10. Ka akaa a dedoo a nyi mbamishen mba ve lu eren tom mishen ken ityar i caa er tar u Central African Republic nahan ve lu zuan a mini?
9 Se tese ikyav sha tar u Central African Republic er mbamishen ve lu zuan a averen ken tom ve yô. Ken inyom i i kar la, iorov 16,184 va M-umbur u ku u Kristu, iyenge ne hemba i mbapasenkwagh mba ken tar la kwa taankaruhar. Kwagh ugen yô, er agar a vesen man a kiriki a ken tar la kpishi a lu a usu u latriki ga yô, ior mba hembe eren ityom ve ken won shin atine a ikyon ape mule a gbe yô. Kwagh ne na yô, mbamishen mba ken tar la kpa mba henen Bibilo a ior shin atine a ikyon, ape ve tem la. Ka i wanger ken won ape ior ve tem la i doo kpen kpen shi i kundunyol her kpaa, kpa kwagh ugen kpa ngu u ka a er i doo yum yô. Ior mba ken tar la soo kwagh u Bibilo tsung, shi kwaghaôndo ngu a za ve zwa u ôron kpaa. Ashighe kpishi, or ka nana karen sha gbenda nana ta ashe a nenge a pasen ior kwagh maa nan kaha nan za ungwa cii nan mase yemen ye.
10 Sha shighe ugen la, ormishen ugen lu henen Bibilo a orgen hen tembe ya na, tsô gumor ugen u dondo ya her yô kighir mough ken ya na va, va kaa a ormishen la ér un kpa a̱ va ken ya na a va hen Bibilo a na. Saan ormishen la iyol kpishi, nahan á lumun ér una va hen Bibilo a na, gumor la ngu henen Bibilo kpoghuloo hegen. Ashighe kpishi, udasenda mba ken tar la ka vea nenge a Mbashiada sha gbenda yô ve gber ve uwegh ér ve tile, kpa i lu sha ci u ve er ma kwaghbo shin sha u vea ya ve zwa jirigh ga; ka i lu sha u sônon ve a sôn Iyoukura man Awake! u he tsô, shin sha u sughun ve sha kwagh u ve er ken umagazin asev i doo ve yum yô.
11. Mbamishen mba ve tse ken tom mishen shi ve ye atsan kpishi nenge tom ve nena?
11 Mbagenev er tom mishen anyom kar hegen er 40 shin 50 nahan, kpa mba eren ú sha jighjigh her tsô. Ve ver se ikyav sha kwagh u jighjigh u nan mban ishimataver kpaa. Orgen vea kwase na ve er tom mishen anyom hemba hegen 42, ken ityar kposo kposo itiar. Or shon kaa wener: “Se tagher ishigh a akaa a taver kpishi. U tesen ikyav yô, se ya ican a angev mbu ayaikyure anyom 35. Nahan kpa, ma shighe môm tsô se vaa afanyô sha tom mishen u se lu eren ne ga.” Kwase na di kaa wener: “Akaa nga kpishi a nan se msaanyol. Tom u pasen kwagh tseegh kpa ka ú na se msaanyol, shi ican i eren se u hiin Bibilo i henen a ior ga. Ka sea nenge ior mba se henen Bibilo a ve vea vaan mbamkombo shi vea faan hanma or nahan i lu se inja er tsombor tema ngu eren iniongo nahan.”
Ve ‘Nenge Akaa Cii Hingir Ve Msaa’
12. Or nana tese ér kwagh u Tartor gba nan ishima sha mimi nena?
12 Zum u orkusua u ken injakwagh la zua a tagbede u lun ishe kpishi yô, ‘a yem a za tee akaa a a lu a mi la cii, a za yam un.’ (Mateu 13:46) Mba kwagh u Tartor u gbe ve ishima tsung la kpa ka imba gbashima u ve lu a mi je ne, gadia ve de ér akaa a a lu ve a inja tsung la cii a̱ hingir ve msaa. Apostoli Paulu, u á lu a ishimaveren i za lun vea Kristu sha Tartor u sha la kaa wener: “M nenge akaa cii hingir mo msaa sha ci u mfe u fan Kristu Yesu Terem la a hembe ica yum yô. Ka sha ci Na man m de akaa cii a saam ye, m nenge a hingir mo hôngor sha u Kristu Una lu mtsera wam yô.”—Mbafilipi 3:8.
13. Orgen ken tar u Czech Republic tese ér kwagh u Tartor doo un ishima nena?
13 Nyian kpa, gba ior kpishi ishima u geman inja ve sha er vea zua a averen a Tartor yô. U tesen ikyav yô, ken uwer u Oktoba ken inyom i 2003 la, orgen u lun anyom 60, u lu buter-makeranta hen makeranta ugen ken tar u Czech Republic yô zua a takerada u wasen or u henen Bibilo u Mfe u Una Va a Uma u Tsôron La la. Yange er ú cii been yô, ngôôr ga je maa gba keren Mbashiada mba Yehova hen ningir na ér ve va henen Bibilo a na. Á hii Bibilo i̱ henen shi lu zan ikyura ken jijingi kpaa, shi ica i gba ga tsô maa hii u zan mbamkombo. Or ne yange vande wan ishima ér una va kperan tor geri, shi wa ishima wener una tile ishangen i zan iyouidyu i tamen ken tar na kpaa. Tsô á er a mbaawashima nav mban nena? Á dugh ve ken ishima na kera, kpa á gema á tsua u eren tom u pasen kwagh u Tartor. Á kaa wener, “Yange m na mbayevmakeranta av ityakerada i i har sha Bibilo kpishi.” Ken uwer u Julai ken inyom i 2004 la, á tese ikyav i iyoltseghan na sha ci u Yehova, á er batisema sha mkohol u vesen u i zua ken uwer shon la.
14. (a) Loho u dedoo u Tartor ne mgbegha ior umiliôn umiliôn mba eren nyi? (b) Ka mbampin mba kôron ken ishima mba nyi nahan hanma wase nana fatyô u pinen iyol i nana?
14 Ior mbagenev umiliôn imôngo sha tar jimin cii kpa mba ngohol loho u dedoo u Tartor la er or u ken tar u Czech Republic la nahan. Ior mban undu tar u ifer ne, shi ve de aeren a ve a tse la kpaa, shi ve undu akar a ve a tse man akaa a ken tar a ve eren la cii. (Yohane 15:19; Mbaefese 4:22–24; Yakobu 4:4; 1 Yohane 2:15–17) Ve de akaa ne cii saa ve sha ci u nyi? Sha ci u ve nenge ér averen a Tartor u Aôndo ua na ve la hemba nyityô kwagh i tar ne ua na ve cii. Kape we kpa loho u dedoo u Tartor u lu ú zege kwagh laa? Loho u Tartor ne na ishima mgbegha ú ker u den akaa a i gbe hange hange u ú de la, sha er uma wou man aeren a ou kua mbaawashima ou vea zua sha akaa a Yehova a soo ér se eren la kpa? Aluer ú er nahan yô, ú zua a averen a vesen hegen man ken hemen kpaa.
Ayange a Masetyô a Tom Sunda
15. I tsengaôron ér ior mba Aôndo vea er nyi ken ayange a masejime nee?
15 Orpasalmi nger kwagh kaa wener: “Ior Ou vea na nagh sha ayol a ve sha asema a dedoo je sha iyange i ikumutya You.” Ior mba ve ne ayol a ve la kua ‘ikaior i i lu er avure nahan’ la ker man “ikum i vesen” i “kasev mba ve yôôn loho u dedoo” la kpaa. (Pasalmi 68:11;110:3) Mne u ior mba Yehova, nomso man kasev man ikyaior man mbabeenyol ve ne ayol a ve sha u pasen kwagh kpoghuloo ken ayange a masejime ne ngu umen atam nena?
16. Tese ikyav er mbatomov mba Aôndo ve lu nôngon sha u vea wase mbagenev ve hen kwagh u Tartor u Aôndo yô.
16 Anmgbian u kwase ugen ken tar u India u á eren tom u pasen kwagh u Tartor hanma shighe yô, vaa iyol er a er ve a wase mbaakondoato mba ve hembe iorov miliôn uhar ken tar la ve vea fa kwagh u Tartor u Aôndo yô. (Yesaia 35:5) Yange hen sha kwagh ne gbang maa tsua a ishima na wener una nyôr makeranta ugen u henen iliam i sha ave ken gar u Bangalore ken tar u India. Hen ape lu henen makeranta la je, gba pasen mbaakondoato kpishi kwagh u Tartor ua va er sha ci uumace yô, shi lu henen Bibilo a mbaakondoato kpishi kpaa. Usati mba kar kpuaa nahan, mbaakondoato mban kpishi hii u zan mbamkombo ken Iyou i Tartor. Iyange igen yô, anmgbian u kwase ne za ivese igen maa za zua a gumor u kondon ato ugen u mough ken gar u Calcutta ken Tar u India va ivese shon yô. Gumor ne lu a mbampin mba pinen kpishi shi gba un ishima u seer fan kwagh u Yehova kpaa. Nahan kpa, mzeyol ugen gema lu. Gba u gumor ne una hide a yem ken gar u Calcutta una za hii makeranta, man mough ape i er ivese la yem ken gar u Calcutta gba ica er ukilomita 1,600 nahan, shi Orshiada môm u fan iliam i sha ave lu hen gar la ga. Tsô gumor ne sendegh a ter na ér a̱ na un ian una yem a za hen makeranta ken gar u Bangalore ken tar u India sha er una za hemen u henen Bibilo yô. Yange za hemen u henen Bibilo shi lu zan ikyura ken jijingi kpaa, inyom kar yô maa a tsegha iyol na sha ci u Yehova, i er un batisema. Un kpa gba henen Bibilo a mbaakondoato mbagenev, ken ve yô, lu orgen u lu ijende na hii iyev je yô. Afishi a branci a ken tar u India nga wan ago iyol sha u a wase upania ve hen iliam i sha ave sha er vea wase u pasen mbaakondoato kwagh yô.
17. Ôr kwagh môm u taver we ishima u ú tim sha ibaver i sha inyom i tom i 2004 i̱ i̱ lu sha peeji 23 la ve ú zough a mi yô.
17 I nger ibaver i tom kwaghpasen i̱ sha inyom i tom i 2004, i̱ Mbashiada mba Yehova sha tar cii la sha peeji 23 u magazin ne. Tôô shighe kpe iyol time sha ibaver la, nahan nenge er nyian kpa ior mba Yehova sha tar cii ve ver ishima kpoghuloo u keren “tagbede . . . u lun ishe kpishi” la yô.
“Vande Keren Nen Tartor”
18. Kanyi kwagh Yesu á er kwagh sha mi ken injakwagh i orkasua u keren utagbede la ga, man ityôkyaa ér nyi?
18 Aluer se hide se hen sha injakwagh i Yesu ôr sha kwagh u orkasua u keren utagbede la yô, se nenge ser Yesu ôr se er or la una gema koson iyol na shighe u tee akaa a na kera cica cii la ga. Nahan, mbagenev vea pine ér: ‘Hegen u orkusua ne a kera lu a kobo môm ave ga ne nahan una zuan a kwaghyan man ikyondo man ijiir i tsan han sha wono? Tagbede u dedoo u a yam la una lu un a iwasen nan je?’ Sha mnenge u orumace yô, mbampin mban ka mba gban huren ve kera ga. Kpa, umbur wer Yesu yange kaa a mbahenen nav ér: “Vande keren nen tartor Na man perapera Na, man akaa ne cii á seer ne a ye.” (Mateu 6:31–33) Nahan semakwagh u injakwagh la i tese se yô, ka u se̱ civir Aôndo a ishima i môm shi se̱ eren tom u pasen kwagh u Tartor la sha gbashima kpaa. Kwagh ngu u sé hen sha kwagh ne kpa?
19. Injakwagh i Yesu a er sha kwagh u tagbede u lun ishe kpishi la tese se nyi kwagh i vesene?
19 Aluer sea sember henen kwagh u loho u dedoo u doon tsung la shin sea vanden keren Tartor la kera shi sea pasen mbagenev kwagh u averen a ú anyom imôngo je kpaa, gba hange hange u Tartor la ua hemba lun se tamen kwagh shi se hemba veren ishima sha ú a akaa agen cii. Ashighe ne taver ka mimi, nahan kpa, se mba a atôakaa a vesen a se lu a vangertiôr ser Tartor u se lu keren la ngu jim jim shi ma kwagh môm u a hembe ú ngu ga—di er tagbede u dedoo u orkasua la yange zua a mi la nahan. Akaa a a lu eren shin tar man akaa a Bibilo i tsengeôron a lu kuren la tese wanger wanger ér se mba ken ayange a mkur u tar ne. (Mateu 24:3) Se kpa se tese nen gbashima sha Tartor u Aôndo shi se ember nen sha ian i civirigh i se lu a mi i yôôn loho u dedoo u Tartor ne, er orkasua u keren utagbede la kpa lu keren tagbede u dedoo sha gbashima shi ember zum u a zua a mi la nahan.—Pasalmi 9:1, 2.
Baver We Kpa?
• Kanyi i̱ ne ve mbacivir Aôndo mba mimi ve lu seer a seer ken anyom a karen nee?
• Ka ieren i̱ nyi mbamishen ve lu tesenee?
• Ior gema aeren a ve sha ci u loho u dedoo u Tartor nena?
• Injakwagh i Yesu á er sha kwagh u tagbede u lun ishe kpishi la tese se nyi kwagh i vesene?
[Study Questions]
[Picture on page 18]
“Mimi . . . ngu a urugh nyityô or cii.”—A. H. Macmillan
[Picture on page 19]
Daniela man Helmut pase ior mba lamen ijô igenegh kwagh ken gar u Vienna
[Pictures on pages 20, 21]
Mba ve lu eren tom mishen nyian ne mba zuan a averen er orkasua u keren utagbede la nahan
[Picture on page 21]
“Ior Ou vea na nagh sha ayol a ve sha asema a dedoo”