Ishima Mgbegha Ú U̱ Eren Er Yesu Nahan Kpa?
Ishima Mgbegha Ú U̱ Eren Er Yesu Nahan Kpa?
“A nenge a ikpelaior kpishi, nahan mhôônom kôr Un a ve sha ci u ve lu er iyôngo i i lu a orkuran i ga yô. Tsô A hii u tesen ve akaa kpishi.”—MARKU 6:34.
1. Hii nan ishimaveren i lu ér ior vea tese anza a doono?
IGBE je tsô ior kpishi ndera tesen anza a doon. Ú laha fan ityôkyaa i i ne ve kwagh a lu nahan ase ga je. Yehova Aôndo ngu a dooshima shi eren a ior sha dooshima, we ior ikyo shi ne iyua mgbeghaa, á mough shi ngu a anza agenegh a doon se kpaa. I gba uumace sha inja i mlu u Aôndo. Sha nahan yô, se fatyô u fan e̱r i hii ve ka i jire mbagenev ke’ ishima u tesen dooshima man ikyo i wan man mhôônom ma zungwen, man e̱r i hii ve ve tange ve lu a anza a icighanegh agenegh kpaa yô, di e̱r mbagenev kpishi ve eren kwagh a imoshima ve nahan. (Genese 1:26; Mbaromanu 2:14, 15) Nahan kpa, alaghga ú kav wer ka hembe heghem mbagenev u tesen anza aerenegh ne a mbagenev.
2. Ka ityom i dedoo i nyi alaghga ior vea lu eren, henen ér ve mba kaven Kristu?
2 Alaghga ú biishi a nomsombaiorov man kasev mba ka ve shi zuan ishigh a mbauangev shi zungwen mbaawanev mhôônom, shin ve né mbaatsanev naagh mgbeghaa la. Shi hen sha kwagh u ior mba mhôônom vem ma zungwen ka ma mgbegha ve u eren tom a uma ve cii ken iyaav mbi i sôron mbaamandev shin mbi i koson ancôgholov heregh la. Hen sha kwagh u ior mba ve ne ayol a ve sha u eren tom ken ayouacii shin iyaav mbi i nengen sha gbayol u ior mba ve gbe angev ashighe ashighe la, shin ior mba ve nôngon kwagh tsung u wasen mba ve lu a ya ga man mbayevese ityav kpaa la. Alaghga ve mbagenev vea hen je ér ve mba kaven Yesu, un u yange ver ikyav i̱ Mbakristu ve̱ dondo la. I nger ke’ Ivangeli ér Kristu sôr mbauangev angev shi a na mba ijen i ker ve mbara kwaghyan kpaa. (Marku 1:34; 8:1-9; Luka 4:40) Aeren a Yesu a sha dooshima man ishima i legh legh man mhôônom ma zungwen la cii tese “mhen u Kristu,” u yange gema di lu kaven Ter na usha la.—1 Mbakorinte 2:16.
3. Aluer ka u se lu a mnenge u vough sha ityom i dedoo i Yesu lu er la yô, gba u se time sha nyi?
3 Nahan cii kpa, ú shi kav e̱r ior kpishi mba dooshima u Yesu man mhôônom nam ma zungwen ma ker ve ke’ ishima nyian la ve hunde ishima a semakwagh u mhen u Kristu kpa? Se fatyô u zuan a mkav sha kwagh ne aluer se time sha Marku ityough 6 vie vie yô. I nger he’ ijiir la ér ior kua a mbauangev va a ve he’ Yesu ér a̱ bee ve angev. Shi ijiir la kaa a vese ér, e̱r Yesu nengen e̱r ijen i ker ior udubu imôngo mba yange ve va un inya la yô, a er ivande a na ve kwaghyan. (Marku 6:35-44, 54-56) U̱ sôron mbauangev angev shi nan mba ijen i ker ve mbara kwaghyan la lu akav a vesen a zungwen ior mhôônom sha dooshima, kpa ka di igbenda i vesen i yange Yesu wase mbagenev cii tsô laa? Man se hii nan ve se kpa se dondo ikyav na i dedoo i dooshima man ikyo i wan man mhôônom ma zungwen, di e̱r un kpa yange dondo ikyav i Yehova nahana?
Ishima Mgbegha Un u Kuren Ugbayol mba ke’ Jijingi
4. Kwagh u i nger ke’ Marku 6:30-34 la yange er nena?
4 Mhôônom kôr Yesu a mba yange ve lu a na la sha ci u ugbayol vev mba ke’ jijingi la jim jim. Lu ugbayol mbara hemba lun un kwagh u injaa a ugbayol mba iyolough ye. Gbidye ase kwar sha kwagh u i nger ke’ Marku 6:30-34 la. Kwagh u i nger ne yange er he’ kpe Zegemnger u Galilia, zum u iniongo i Paseka i ke’ inyom i 32 S.W. mgbôghom la. Hingir mbaapostoli mbara iyol yáá yáá mimi, man lu sha ityôkyaa i dedoo kpaa. Lu̱ za̱ hìdèn ve ke’ zende u icaa je maa yange ve va kohol Yesu la, lu ve iyol torough torough u ôron un akaa a ve zà e̱r je ka u kera kpelan ga. Nahan kpa, ikpelaior va kohol heregh. Ikpelaior la ngee kpishi je yô, Yesu vea mbaapostoli nav kan shio u yan kwagh shin memen kpaa. Yesu gema kaa a mbaapostoli nav ér: “Va nen, ne tseegh, hen ijiir i or lu ga yô, va mem nen kpeghee.” (Marku 6:31) Alaghga lu ikyua a Kapernahum je yange ve nyôr tso ve per Zegemnger u Galilia ve yem he’ ijiir i huan kweng ye. Kpa ikpelaior gba sha kpe ifi, kúrà ayem za vande nyôron a tso la. Yesu yange una e̱r nena? Yange ishima vihi un a ve sha ci u ve yàngè un mmem yumuu? Mayange je ga!
5. Yange lu Yesu ke’ ishima nena a ikpelaior i i va he’ a na la, man yange gema er nyi?
5 Yesu nengen a ikpelaior i i̱ kuma udubu imôngo, i̱ kúà mbauangev mba torough ve iyol u nengen a na la kpa shami la yô, kwagh la kôr un ke’ ishima. (Mateu 14:14; Marku 6:44) Marku veren ishima sha u ôron kwagh u yange na ve mhôônom kôr Yesu man kwagh u yange gema er la yô, a nger nahan ér: “A nenge a ikpelaior kpishi, nahan mhôônom kôr Un a ve sha ci u ve lu er iyôngo i i lu a orkuran i ga yô. Tsô A hii u tesen ve akaa kpishi.” (Marku 6:34) Lu di ingyeghior tseegh lu kwagh u Yesu lu hemban nengen ga. Kpa lu ior mba ibanave i ke’ jijingi i ker ve kpan la. Ve lu e̱r iyôngo i kwagh a hembe í, i gbe di zenden a zende, a orkuran u naná hemen i naná za a i hen toho u hômon shin naná wa i ikyo shio la nahan. Yesu kpa yange fa je ér mbahemenev mba kwaghaôndo mba banen a mhôônom ma zungwen, mba yange i gba u ma ve lu̱ mbakuran mba̱ wan ikyo la ve de̱ ve gema ve kenger a kenger atsanaior ne dang shi ve gema ijime a ugbayol vev mba ke’ jijingi mbara kuaa je. (Esekiel 34:2-4; Yohane 7:47-49) Kpa Yesu ti yô, a er a ve nahan ga, a er ve akaa a hemban lun a dedoo cii sha a fatyô na. A tese ve kwagh u Tartor u Aôndo.
6, 7. (a) Ka akaa a hiihii a nyi i pase ke’ Ivangeli ér Yesu e̱r sha u kuren ugbayol mba iorovo? (b) Kanyi yange i mgbegha Yesu u pasen kwagh shi tesen ior kwagha?
6 Ver ishima sha gbenda ugen u i ne ibaver i akaa ne sha alô sha alô shi í lian akaa ne sha adondo adondo kpaa yô. Kwa ne di ka Luka a nger ye, un u yange lu ortwer nahan mkpeyol u mbagenev gba un ishima la. A nger ér: “Ikpelaior . . . dondo [Yesu] ijime; A rumun ve, A ôr ve kwagh u tartor u Aôndo; man mba kwagh a gbe u ma i ser ve angev yô, A war ve.” (Luka 9:11; Mbakolose 4:14, ka se se nger i yier ye.) Shin e̱r kwagh ne a lu nahan sha hanma ivande i i er kwagh sha mi ga nahan kpa, heen yô, kwagh u i ne Luka a nger ne hii veren ikyav sha nyi kwagha? Ka sha mtese u Yesu yange a tese ior kwagh la.
7 Kwagh ne gema gba zwa môm a kwagh u i er ke’ Marku 6:34 vaa vaa la. Ivur la tese wang e̱r yange ishima mgbegha Yesu u zungwen ior mhôônom nahan. A tese ior mbara kwagh, shi a nenge sha ugbayol vev mba ke’ jijingi kpaa. Zum u Yesu hii tom ica gba ga la, a kaa ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:43) Nahan cii kpa, aluer se hen ser Yesu yôô loho u Tartor sha ci u ka tom u i we un, shin ka sha mkanan a er tom u pasen kwagh u yange gba u una er la yô se lu nzughul kwagh. Ei, ka mhôônom ma yange ma kôr un a ior sha dooshima la i lu kwagh u vesen u yange mgbegha un u pasen mbagenev loho u dedoo ye. Erdoo u hemban cii u̱ Yesu er a mbauangev man mba azôv e̱r ve ican man mbaatsanev man mba ijen kôr ve la yô, lu u una wase ve ve̱ fa mimi u sha kwagh u Tartor u Aôndo, ve̱ lumun mimi la shi a̱ doo ve ishima kpaa. Mimi la hemba lun kwagh u injaa cii sha e̱r i gbe u Tartor la ua wase u páásé ahon a gban sha hementor u Yehova shi ua va uumace a averen a aa lu gbekeke yô.
8. Yange lu Yesu ke’ ishima nena sha kwagh u kwaghpasen man kwaghtesen ne?
8 Ityôkyaa i vesen i yange i na ve Yesu va shin tar yô, lu u va pasen kwagh u Tartor. Shighe kom u Yesu una kúùsù tom na shin tar yô, a kaa a Pilatu ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye. Hanma or u nan lu or u mimi yô, nan ongo imo Yam.” (Yohane 18:37) Se vande kaan ke’ akaangeren a ahar a hiihii la ser Yesu lu or u lun ishima legh legh—waan ior ikyo shi ngohol ior ave ahar shi nengen ior a icetyo shi naan ior jighjigh kpaa, man u hemban cii je yô, ior doon un ishima. Gba keng u se wuese avegher a mlu na ne aluer mimi je se soo ser se fa mhen u Kristu yô. Shi ka a inja u se kav ser mhen u Kristu fí ìr m-ver u a ver tom na u kwaghpasen man kwaghtesen hiihii a akaa agen cii la keregh.
A Tev Mbagenev Ér Ve̱ Er Shiada
9. Ka unô yange gba u kwaghpasen man kwaghtesen una lu ve kwagh u hiihii keng-e?
9 Ka Yesu tseegh yange gba u una ver kwaghpasen man kwaghtesen hiihii sha u i̱ lu ikyav i tesen dooshima man mhôônom ma zungwen ga. A tev mbadondon un ér ve̱ kav un sha mbaawashima nav kua akaa a a lu un a hiihii la man aeren a na kpaa. U tesen ikyav yô, Yesu tsough mbaapostoli nav mba 12 mbara kera cii yô, lu u vea er nyi kwagha? Marku 3:14, 15 kaa a vese ér: “A ver ve pue kar uhar sha u vea lu a Na imôngo, man shi sha er Una tindin ve sha u za ôron kwaghaôndo, man shi sha u vea lu a tahav mbu dughun ujijingi mba bov yô.” (Ka se se nger i yier ye.) Mase zan ú nenge a ma kwagh u yange gba u mbaapostoli mbara vea vande eren hiihii kpa?
10, 11. (a) Yesu ngur tindin mbaapostoli mbara ityom yô, kanyi yange kaa a ve ér ve̱ ere? (b) Sha kwagh u ityom i yange i tindi mbaapostoli la yô, kanyi yange i hemba veren ishima ér i̱ ere?
10 Shighe karen yô, Yesu wase mba 12 mbara sha u ve̱ bee ior angev shi ve̱ dugh ujijingi mbabov kera. (Mateu 10:1; Luka 9:1) Been kera yô, a mough a tindi ve ér ve̱ za he’ “iyôngo i hen ya u Iserael” la. Ve̱ za ve̱ za er nyi? Yesu wa ve kwagh vough vough nahan ér: “Za, za ôr nen kwaghaôndo, kaan nen ner: Tartor u Sha mgbôghom ve. Bee nen mba ve lu dedoo ga la angev; nder nen mbakpenev; wanger nen mbaamandev; dugh ujijingi mba bov.” (Mateu 10:5-8; Luka 9:2) Nahan yô, lu nyi jighilii ve ere? “Tsô ve due, [1] ve ôr ior kwaghaôndo er, ve̱ gema ishima; [2] ve dugh ujijingi mba bov kpishi, man mbalun dedoo ga kpaa, ve shighe ve mkurem ve war ve kpishi.”— Marku 6:12, 13.
11 E̱r i lu hanma kwa cii i vanden ôron kwagh teren kwaghtesen hiihii ga yô, akaa a i er sha adondo adondo la ka u ngeen a ngee kwagh sha gbaa u kwagh u i lu u a vande eren shin akaa a i we ishima la ga zee? (Luka 10:1-9) Kpa se laha nen acin imôngo a i vande ôron kwagh teren kwaghtesen a angev mbu been la ga. Sha gbaa ne yô, hide time sha kwagh u yange za hemen la. Mlu u ikpelaior la yange kôr Yesu ke’ ishima zum u i kuma u una tindi mbaapostoli mba 12 mbara ityom yô. I nger ér: “Yesu zende ken agar a vesen kua ken angarev mba kiriki la cii, lu tesen ken ushinagoge vev, lu ôron Loho u Dedoo u tartor, lu been hanma inja i uange man i mkpeyolga kpaa. Man er A nenge a ikpelaior yô, mhôônom kôr Un a ve tsung, sha ci u i tumbur a ve, ve sambe wuee er iyôngo i i lu a orkuran i ga nahan. Tsô A kaa a mbahenen Nav er: Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.”— Mateu 9:35-38.
12. Uivande mba Yesu man mbaapostoli yange ve e̱r la seer kuren nyi awashima igene?
12 Sha u mhen u Kristu a̱ nyôr a shiishi mbaapostoli mbara ken asema yô, lu u vea gbihi Yesu ga. Ve kav ér u̱ ior doon ve ishima shi mhôônom kôron ve a ior la wa u pasen man u tesen kwagh u Tartor la kpa keregh—gadia ka kwagh u yange gba u una lu semakwagh u ityom ve i dedoo je la. U zuan sha kwagh ne yô, aeren a dedoo a yange e̱r sha u kuren ugbayol mba iyolough, amba e̱r u been mba ve lu uange angev la yange er kwagh hemba u wasen a wase mbaatsanev di tsô la. Di vough e̱r ú fatyô u henen nahan, alaghga a lu m-bee u been ior angev shi nan ve kwaghyan sha ivande i eren la yange urugh mbagenev ye. (Mateu 4:24, 25; 8:16; 9:32, 33; 14:35, 36; Yohane 6:26) Nahan cii kpa, ityom ve la saa sha u wasen ior a akaa a iyolough tseegh ga kpa shi í mgbegha mbanengen u kaven ér Yesu ka Wan u Aôndo shi ka “Profeti” u Mose ngise tsengaôron kwagh na la.—Yohane 6:14; Duteronomi 18:15.
13. Ka tom u nyi kwaghôron u profeti u i nger ke’ Duteronomi 18:18 la yange kaa var var ér “Profeti” la una va ere?
13 Hii nan yange lu a inja u Yesu a̱ lu “Profeti” la? Ka tom u vesen u nyi yange i tsengaôron ér ngula una va yô, una ere? Yange lu u “Profeti” la una za iti sha u eren ivande been ior angev shin nán mba ijen i ker ve mbara kwaghyan sha mhôônôô? Duteronomi 18:18 la tsengaôron ér: “Me ver ve Profeti, Una due ken anmgbianev vev, er we [Mose] nahan; Me na akaaôron Am ken zwa Na, Una ôr ve akaa cii a Me kaa Un yô.” Nahan yô, e̱r mbaapostoli mbara hen u lun ishima legh legh shi tesen i̱ yô, ve mase kaven e̱r i gbe u vea er sha mhen u Kristu ke’ tom ve u kwaghpasen man kwaghtesen la yô. Kwagh la gema lu kwagh u hemban cii u lu u vea er sha ci u ior mbara je la. Sha gbenda la yô, lu u mbauangev man mbaatsanev vea zua a mbamtsera mba been mayange ga, a kera lu mba ka ve saa di sha ayange a orumace nan tse kpuaa tseegh la ga, shin a kera lu di kwaghyan u i ne kwa môm shin kwa har tseegh la kpaa ga.—Yohane 6:26-30.
Mhen u Kristu A̱ Kpar ken A We Nyian
14. U lun a mhen u Kristu la kpa ngu ityough sha kwaghpasen wase nena?
14 Mô wase u naná kaa ér mhen u Kristu yange sáà ken derianyom u hiihii—sha Yesu man mbahenen mba tsuaa mba yange apostoli Paulu nger ôr kwagh ve ér: “Se mba a mhen u Kristu” la tseegh kpa, nan ngu ga. (1 Mbakorinte 2:16) Man gba u se lumun ser ka tom wase ù pasen loho u dedoo shi geman ior hingir mbahenen kpaa. (Mateu 24:14; 28:19, 20) Nahan cii kpa, ka a inja u se gbidye kwar sha mbaawashima asev mba ve ne u se er tom la yô. I̱ de lu inja e̱r i wa se tom yô gba u se e̱r ú kpee ga. Ka mdoo u Aôndo a doo se ishima la a lu ityôkyaa i vesen i i ne ve se kpa se lu uwegh ke’ tom u pasen kwagh ne ye, man aluer ka u se kav Yesu vough yô, gba u mhôônom maa mgbegha se u pasen kwagh shi tesen kwagh kpaa.— Mateu 22:37-39.
15. Hii nan ve mhôônom ma zungwen ma lu vegher u hange hange u tom wase u ke’ igbar la?
15 Sha kpôô yô, ka fe heghem u mhôônom ma kôr se a mbara mba ve ne atesen a ase jighjigh ga la ga, hemban cii je yô, zum u se tagher ishigh a ieren i kwagh-gbam-shami-ga la, shin zum u or gem ijime a vese shin i hendan a vese yô. Nahan cii kpa, aluer ior kera doo se ishima ga shin mhôônom kera kôr se a ve ga yô, ishima ia kera mgbegha se u eren tom u Mbakristu ve eren la ga. Nahan yô, se hii nan ve mhôônom maa kôron se a ioro? Sé nôngon nen tsung u nengen ior sha gbenda u Yesu kpa yange nengen ve, e̱r “iyôngo i i lu a orkuran i ga nahan” la. (Mateu 9:36) Kwagh la pase mlu u ior kpishi nyian ga zee? Mbakuranilev mba ke’ ukwaghaôndo mbaaiev gbihi ve shi pir ve ashe a ke’ jijingi. Sha nahan yô, ve kera fa kwaghwan u dedoo u a lu ke’ Bibilo la ga shi ve kera fa mbamlu mba ke’ Paradiso mba Tartor u Aôndo u sôôn van a mi shin tar wase ne la kpaa ga. Ka ve tagher ishigh a mbamzeyol mba uma mba sha ayange ayange la—anza e̱r ibanave, man ayôôso a he’ tsombor man angev man ku nahan—aa u lun a ishimaverenkeghen i Tartor shio. Kpa se yô, se mba a kwagh u i gbe u ma ve zough a mi la: ka loho u dedoo u waren uma ú sha kwagh u Tartor u Aôndo a tím sha hegen je la!
16. Hii nan i doo u se ôr mbagenev loho u dedoo keng-e?
16 Nahan zum u ú tem ú gbidyi kwar sha ugbayol mba ke’ jijingi mba ior mba ve kase ú la yô, ishima i̱ shí mgbégháń we u moughon nôngon kwagh sha afatyô wou cii sha u ôron ve akaa a Aôndo a we ishima u eren sha dooshima la gaa? Een, tom wase ka tom u sha mhôôn. Zum u kunya u ker se a ior di vough e̱r yange ú kôr Yesu nahan la yô, ikyav ia tese sha ikyenge yase man mlu wase u sha ishi man gbenda u se tesen ior kwagh la kpaa. Akaa ne cii aa na loho wase ua kôr mbara mba “i ver ve sha u ve̱ zua a uma u tsôron” la sha mtema.—Aerenakaa 13:48.
17. (a) Ka igbenda i nyi í lu i se tese ser mbagenev doo se ishima shi mhôônom ma ker se a ve? (b) Hii nan ve i lu di u eren ityom i dedoo gayô pasen kwagh ke’ igbar ga?
17 Dooshima wase dugh tseer tseer ke’ hanma kwagh u se we ave u eren ke’ uma wase cii kua mhôônom ma zungwen kpaa. Kwagh ne kua mwe u se wan mba i hembe ve iyol ikyo kua mbauangev man atsanaior kpaa—se eren hanma kwagh u se fetyô cii sha u saghen ve tuhwan sha ikyev i ican i i ker ve kpan la. Kwagh ne wa iniôngon i se lu nôngon sha mkaan man sha ieren cii, sha u nôngon been a ijungwen i mbara mba ior vev mba doon ve ishima ve saa ku kera la. (Luka 7:11-15; Yohane 11:33-35) Nahan cii kpa, amba aerenegh a tesen dooshima man ikyo i wan man mhôônom ma zungwen la a de luun semakwagh u ityom yase i dedoo i har sha mi jimin cii, e̱r ior mbagenev mba eren erdoo ve eren nahan la ga. Kpa kwagh u una hemba lun a inja gbem je yô, ka he zum u i lu anza a icighanegh angara nahan man a ne se u̱ nôngon kwagh sha u eren tom u kwaghpasen man kwaghtesen u Mbakristu la. Umbur imo i Yesu yange kaa a mbahemenev mba kwaghaôndo u Mbayuda la. A kaa a ve ér: “Ne mba tsough môm-ken-upue u kunguraku man yiye man ayegh, kpa ne kera wa akaa a a hembe lun a inja ken atindi la iko ga, er: ijirôron man mhôônom man zungwen man jighjigh u nan; er i lu u né eren akaa ngan keng yô, shi ma ne de u eren angara kpaa ga.” (Mateu 23:23) He’ Yesu yô, lu̱ di a lu̱ u tsuan kwagh môm, gbihin ugen la ga—lu di u̱ wasen ior sha ugbayol vev mba iyolough mbara gayô tesen ve akaa a ke’ jijingi a a ne uma la ga. Yesu ti kohol akaa ne cii e̱r. Nahan cii kpa, wanger e̱r tom na u tesen ior kwagh la yange u za gwa kpishi yô, gadia ityom i dedoo i yange er cii lu i van a uma u tsôron.—Yohane 20:16.
18. Mtím u sé timen sha mhen u Kristu la a̱ mgbegha se u eren nyi?
18 Se mba a iwuese kpishi sha e̱r Yehova a pase se mhen u Kristu yô! Ka Ivangeli í ne ve se hingir u fan mbamhen mba or u hemban sha tar cii la ye, kua shi mbamlu nav mba ke’ ishima man aeren a na kua akaa a a ye tor ke’ a na la kpaa. Nahan mase shin ishima yase u ôron kwagh u Bibilo i pase sha kwagh u mlu u Yesu la shi gbidyen kwar sha mi shi eren sha mi kpaa. Umbur wer, aluer mimi je ka u se er akaa er Yesu yô, gba u se nôngo sha afatyô wase cii u vanden fan u henen kwagh ke’ ishima e̱r un nahan shi lun a imba mlu na u ke’ ishima la shi gbidyen kwar sha akaa di vough e̱r un nahan, shin e̱r se lu uumace nahan kpaa. Nahan yô, de se kange nen ishima dông u lun a mhen u Kristu shi eren sha mhen la kpaa. Ma gbenda ugen u lun uma shin eren a ior dedoo shin ú ua wase se man mbagenev u̱ sôsom a Yehova Aôndo wase u a lu a ishima i legh legh, un u Yesu a bee un gédéé la kpa ngú ga.—2 Mbakorinte 1:3; Mbaheberu 1:3.
Ú Gema Ú Kaa Wer Nyi?
• Ka mkav u nyi Bibilo i ne sha mnenge u Yesu yange a shi nengen sha gbayol u ior la?
• Yesu ngur tesen mbadondon un mbara gbenda u vea kar yô, a kùmè acin sha nyi kwagha?
• Se hii nan ve se tese sha ityom yase ser se mba a “mhen u Kristu”?
[Study Questions]
[Picture on page 17]
Ka erdoo u hemban cii u nyi Mbakristu vea fatyô u eren sha ci u mbageneve?