Ior kpishi sha tar mba a kwaghyan ga, shi mba a ijiir i tsan kpaa ga. Mbagenev ishima ka i nyian ve sha kwagh u mlu ve u ken hemen. Aôndo soo ér se wase ambaaior la, nahan aluer se mba wasen ve yô, una lumun se shi una na se iveren.

“Or u nan zungu mbaatsanev mhôônom yô, nan pwar TER kwagh je, nahan Un kpaa Una na nan sha ieren i nan i dedoo la.”—ANZAAKAA 19:17.

Yesu yange ôr injakwagh sha kwagh u orgen u mbaiv num un gbenda, gbidye un kende her yô. (Luka 10:29-37) Or u fan kwagh ugen ngur karen yô, va tile her, wase or u i vihi un iyol kehelee ne. Yange er kwagh ne, shin er lu ken ikyurior igen kposo a or u vihi iyol la nahan kpaa.

Or u fan kwagh ne yange nenge sha avav a or la shi na un akaa tseegh ga, kpa shi sur un ishima, nahan or la zua a mmem ken ican i nyôr ker la.

Ka nyi se hen ken injakwagh nee? Yesu lu tesen ér se̱ wasen mba ve lu ken ican la sha hanma gbenda u se fetyô cii. (Anzaakaa 14:31) Icighan Ruamabera tese ér ica ia gba ga tsô Aôndo una bee a ibanave kua ican cii kera. Kpa alaghga se pine ser, Aôndo una er kwagh ne nena, man a lu hanma shighee? Ngeren u a dondo ne una time sha averen a Aôndo u a gbe se shi se doo un ishima la a ver sha ci wase yô.