Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  2 2016

 ITINEKWAGH I TAMEN | ER NAN VE YESU YANGE YA ICAN SHI KPE?

Yange Kwagh Er Nahan Mimii?

Yange Kwagh Er Nahan Mimii?

Ken inyom i 33 la, i wua Yesu, Ornasareti. Yange i wa un kwagh iyol ér ngu tuur ior ér ve hendan a gomoti. I gbidye un coholoo, shi i mande un sha kon. Yange kpe ku u nyoon tsung. Kpa Aôndo nder un shin ku hide lu uma, ayange 40 nga kar yô, Yesu hide yem sha.

I nger kwagh u kpilighyol u yange er Yesu ne ken ityakerada i Ivangeli i inyiin i ken Ruamabera u Mbakristu u ken Zwa Grika, u ior kpishi ve yer ér Ikyuryan i He la. Akaa la yange er Yesu mimii? Mpin la ka u henen sha mi zulee, shi ka u hange hange kpaa. Aluer akaa ne yange er ga yô, jighjigh u nan u Mbakristu la ka gbilingkwagh shi ishimaverenkeghen i va lun uma gbem sha won ken Paradiso la kpa ka mnyamciem di tsô. (1 Mbakorinte 15:14) Kpa aluer akaa la yange er mimi mimi yô, mlu u uumace una va doo ken hemen tsung, shi we kpa kape u va lu je la. Nahan yô, se kaa ser akaa a i nger ken ityakerada i Ivangeli la ka mimi shin ka kwaghahii?

KWAGH U A TESE ÉR AKAA LA YANGE ER MIMI YÔ

Akaa a i nger ken ityakerada i Ivangeli la nga er ukwaghahir mba ior ve dugh ken ityough vev ve nger la nahan ga, kpa i nger a vough er yange er la, i pase hanma kwagh vighe vighe. U tesen ikyav yô, i ter ajiir kpishi, a nyian kpa se fatyô u zan her yô. Ityakerada ne ôr akaa a ior mba  yange ve lu kpôô kpôô yô, shi mba ken inya mba ngise ve nger akaa a mbayiase la kpa pase ér ior mba shon yange ve lu mimi.Luka 3:1, 2, 23.

Mbangeren akaa mba sha ayange a mbaapostoli kua mba ve lu uma anyom a karen ken ijime er 1900 nahan la ter Yesu ken ityakerada ve. * Gbenda u i pase ken ityakerada i Ivangeli ér yange i wua Yesu la zua sha gbenda u Mbaroma wuan mbaaferev sha ayange la yô. Heela tseegh ga, i pase akaa a yange er la vighe vighe man sha mimi kpaa, je yô, i pon mbamshi mba mbahenen mba Yesu mbagenev je kpaa. (Mateu 26:56; Luka 22:24-26; Yohane 18:10, 11) Akaa ne cii tese wang ér mba ve nger ityakerada i Ivangeli la cii pase kwagh u Yesu vough man sha mimi kpaa.

KWAGH U MNDER U YESU SHIN KU LA YEE?

Er ior kpishi ve lumun a kwagh u i kaa ér Yesu yange lu uma shi kpe la nahan kpa, mbagenev vea ta akpelan sha kwagh u mnder na u shin ku la. Mbaapostoli nav je kpa er ve ungwa ér a nder ngu uma yô, ve na jighjigh sha hiihii la ga. (Luka 24:11) Nahan kpa, ve kua mbahenen mbagenev yange mba nengen a Yesu u i nder un shin ku la sha ashighe kposo kposo yô, ve kera lu a akperan a tan ga. Sha shighe ugen la je yô, Yesu ande hen iorov mba hemban 500, ve nenge a na sha ashe a ve.1 Mbakorinte 15:6.

Mbahenen mba Yesu yange ve cia ga ve pase kwagh u mnder na u shin ku hen ior cii, kua hen mba yange ve wua un la je kpaa, shin er lu u kwagh ne una na mbaihyomov mban vea kôr ve a wua nahan je kpaa. (Aerenakaa 4:1-3, 10, 19, 20; 5:27-32) Mbahenen kpishi yange vea fe dedoo ér i nder Yesu shin ku ga nahan, ma ve pase kwagh na a mcier iyol shio nahan kpa? Ka er Yesu yange nder shin ku mimi la ve, kwaghaôndo u Mbakristu la samber wuee sha ayange a tsuaa la, shi a samber hegen kpaa ye.

Kwagh u ku u Yesu kua mnder na u shin ku u i nger ken ityakerada i Ivangeli la tese sha hanma gbenda cii ér ka kwagh u yange er kpôô kpôô yô. Aluer u ver ishima u ôr akaa a i nger la tsembelee yô, u na jighjigh wer mimi je akaa la yange er. Shi jighjigh u nan wou una seer taver, aluer u kav ityôkyaa i yange na ve akaa shon er la yô. Ngeren u a dondo ne una pase ityôkyaa la.

^ par. 7 Tacitus, u i mar un ken inyom i 55 la yange nger ér “Kristu, u i zough a iti i [Mbakristu] hen a na la, yange ya mtsaha u vihin tsung sha ikyev i gomna wase ugen, Ponti Pilatu, sha ayange a Tiberiu tema tor la.” Shi mbangeren yiase mbagenev mba sha ayange la, er Suetonius kua Oryuda u yilan un ér Josephus la nahan, ve ter Yesu ken ityakerada ve. Shi gomna u Bithynia, Pliny the Yonger, u lu uma anyom a karen ken ijime er 1900 la kpa ter Yesu ken ityakerada na.