Mfe u Mimi sha Kwagh u Mlu u ken Hemen
Ka u pine er uma a va lu ken hemen yôô? Bibilo tese ér, akaa a kpilighyol a ica ia kera gba ga tsô se tagher a mi la, aa bende a ior cii sha tar.
Yesu yange pase akaa a aa er ve se ‘fa ser Tartor u Aôndo ngu ikyua ikyua’ yô. (Luka 21:31) Yange tsenga ôron ér, akaa agen a aa er yô, a lu nôngon ityav mbi cieryol wue wue, shi ijen ia gba shi tar ua lu tenger ajiir kposo kposo sha utaha tsung, shi iangev mbi bov mbia due—akaa shon a se lu nengen a mi nyian sha ashe a ase ne.—Luka 21:10-17.
Bibilo shi tese ér a fa “ayange a masejime” a hemen u uumace ne sha gbenda u ior vea lu eren kwagh la, shin jighilii yô, sha aeren a dang a ior vea lu a mi la. U fatyô u ôron 2 Timoteu 3:1-5 nengen er i pase ker la. Aluer u nenge ior a anza a ngan man aeren ne nyian yô, u lumun wer mimi je, kwaghôron u profeti u Bibilo i ôr ne zua sha kwagh u a lu zan hemen hegen ne vough.
Kwagh ne ngu tesen ér nyi? Ngu tesen ér, shighe zurum u Tartor u Aôndo ua kar a mbamzeyol mba vesen sha tar kera, ve mlu u ior una doo tsung yô. (Luka 21:36) Aôndo tôndo zwa ken Bibilo ér, una er akaa a dedoo sha ci u tar man sha ci u ior mba vea lu sha u la. Nenge ase akaa kpuaa a i ter heen ne.
HEMEN U DEDOO
“I na un [Yesu] hemen man icivir man tartor, sha u iniongoior man akuraior man ior mba ken ijô kposo kposo cii ve̱ er un tom. Hemen na ka hemen u tsôron, ua kar kera ga, shi a tim tartor na kera ga.”—DANIEL 7:14, NWT.
Kwagh ne tese ér: U va tema ken mkpeyol sha ikyev i gomoti u hemban, u tar cii, u Aôndo a ver Wan na Tor sha mi la.
OR A GBAAN ANGEV GA
OR A GBAAN ANGEV GA“Or u nan lu ken u cii, nana kaa er: ‘Kwagh nyoon mo, ga.’”—YESAIA 33:24, NWT.
Kwagh ne tese ér: Mayange u gba angev shin u gba iwan ga; u fatyô u lun uma gbem sha won.
BEM A LU HANMA IJIIR CII
“Una er ityav mbia bee sha tar cii.” —PASALAMI 46:9, NWT.
Kwagh ne tese ér: Ior vea kera suen ityav a mbagenev ga, shi ican i ityav ka mbi va a mi la cii, ia kera lu ga.
TAR UA MGBOUGH A IOR MBA FAN KWAGH
“Mbaaferev vea kera lu ga . . . Mbaasemaleghlegh vea ya dyako u tar.”—PASALAMI 37:10, 11, NWT.
Kwagh ne tese ér: Ior mba eren aferakaa vea kera lu ga, a lu ior mba i sar ve tsung u ungwan imo i Aôndo tseegh.
TAR CII UA LU PARADISO
“Vea maa uya, shi vea tema ker, vea kaha ishule i ikyon i wain, shi vea ya atam a i.” —YESAIA 65:21, 22, NWT.
Kwagh ne tese ér: A va gema tar cii ua lu ijiir i doon ashe tsung. Aôndo una er kwagh u ka se eren msen ser i̱ er ishima na “shin tar” la.—Mateu 6:10.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Tartor u Aôndo Ua Er Nyi?
Hen fa kwagh u gomoti u Aôndo una va er sha tar yô.
