U gbe tsuan u eren kwagh tsô wer kwagh shon sar u ga. Cii man u tsua kwagh u u soo u eren ken uma wou jim jim yô, ka i gba u u vande fan er u kar ve u er kwagh shon la vindi vindi, shi u kange ishima wer a taver nan kpa u er, shi u fa er u nyôr iceren a gba sha mi ga yô.

Akaa agen or ka nan tsua u eren ken atô ayange shin ukasua kpuaa tseegh, agen di ka i lu u a eren ken atô u iwer kpuaa, agen di yô, ka i lu u a er a, er hii inyom i môm nahan yem hemen. Ka i gba u or a hii tsuan a akaa a nana er ken atô u ayange shin iwer kpuaa la ve, nana mase tsuan a nana er ken atô u hii inyom i môm yem hemen la ye.

Ka wea eren akaa a u tsua u eren la yô, u hemba lun a vangertiôr u eren akaa agen kpaa, shi azende a ou a hemba lun vea we kangenaa, shi i hemba saan we iyol.

Vangertiôr: Aluer u tsua akaa a kiriki shi u er a yô, u lu a vangertiôr wer akaa a vesen je kpa u fatyô u eren. Shi mbamtaver mba ka u tagher a mi ayange ayange la kpa, ka u lu a vangertiôr wer u fatyô u hemban ve, er akaa a u fe dedoo wer ka a doon ga, a mbakwav wou ka ve zaan we iyol ér we u er la nahan.

Azende: Ka i doo ior u lun vea mbagenev mba ve fe kwagh u ve soo u eren, shi ve kegh iyol u eren kwagh shon yô. Shi kwagh ugen u ka a na ior ve ya ijende kangenaa yô, ka u zuan ave eren kwagh u ve cii ve tsough u eren yô.

Msaanyol: Ka wea tsua akaa a u soo u eren la shi wea er a yô, u fa je wer u er kwagh.

“Ka i doom u tsuan akaa a me er yô. Kwagh la na yô, m gbe teman ave ave ga, sha ci u hanma shighe ka m nôngon mer me er kwagh. Ka wea er ma kwagh u u tsua yô, u hide u nenge i kpiligh we iyol, u kaa wer, ‘Uwu, m er kwagh ne mimi fa-o! M er kwagh u m tsough u eren ne ve.’ ”—Mkaanem ma gumor ugen, iti na ér Christopher.

KWAGHWAN U BIBILO: “Or u nan ver ishima sha ahumbe yô, nana lôô ga; man shi or u nan ver ishima sha abeen kpaa nana sunda ga.”—Orpasenkwagh 11:4.

Dondo igbenda i i ter shin heen ne sha u tsuan akaa a u soo u eren la shi eren a.

Fa akaa shon. Nger akaa a u nenge wer u fatyô u eren la, tsua a u nenge wer doo u u hii eren la, man a cirin ker, sha adondo adondo.

Hen er u er akaa shon yô. Hanma kwagh u u tsua wer u soo u eren cii yô, dondo akaawan a i ter shin heen ne:

• Tsua werayange a u soo u eren kwagh shon been la.

• Hen igbenda i u kar ve u er kwagh shon yô.

• Hen sha akaa a aa fatyô u yangen we kwagh shon yô, man er u er ve aa yange u ga la.

Gba mi eren. De keghen wer saa u fa hanma kwagh vindi sha kwagh u u tsua u eren la cii man u hii u eren un ga. Pine iyol you wer, ‘Ka nyi nahan me hii eren sha kwagh u m tsua u eren nee?’ Maa er kwagh shon. Wea er kwagh môm wea bee je u nger.

KWAGHWAN U BIBILO: “Mbamhen mba ortseenshima, ka sha u kwagh ma a ngee yô.”—Anzaakaa 21:5.