ITYOUGH 26
Er Nan Ve Akaabo a Eren shi Ior Ve Lu Yan Icana?
Kwagh u vihin ka una er yô, ior ve pine ér, “Er nan kwagh a er imba ne nahana?” Doo se kpishi er Bibilo i ne mlumun sha mpin la wang nahan!
1. Satan yange va a kwaghbo shin tar nena?
Satan Diabolo yange hendan a Aôndo. Yange Satan soo ér una hemen ior, nahan a mee uumace mba hiihii mbara, ka Adam man Ifa je la, ve kohol un ken ihyembeato na la. Satan yange er kwagh ne sha u tsughun Ifa. (Genese 3:1-5) Yange bume Ifa, nahan Ifa hen ér Yehova ngu yangen un u zuan a kwagh u dedoo. Kwagh u Satan er ne, lu kaan ér aluer uumace mba ungwan imo i Aôndo ga yô, a hemba saan ve iyol. Satan maa er aie u hiihii, a kaa a Ifa ér Ifa una kpe ga. Sha nahan yô, Bibilo kaa ér Satan “ngu oraie shi ka ter u mbaerenaie kpaa.”—Yohane 8:44.
2. Adam man Ifa yange ve er nena?
Yehova yange na Adam man Ifa hanma kwagh cii. A kaa a ve ér vea fatyô u yan hanma kon u ken sule u Eden cii, lu di kon môm tseegh kaa ér ve de ye ga ye. (Genese 2:15-17) Nahan kpa, ve ya kon u i venda ér ve de ye ga la. Ifa ‘zôr atam a u, a ya.’ Shighe kar yô, Adam kpaa va ‘ya’ u. (Genese 3:6) Ve uhar cii ve hemba Aôndo ato. Er yange kwaghmôm yina ken Adam man Ifa ga yô, lu u ma ve er kwagh u vough. Kpa tativ venda u ungwan imo i Aôndo sha apera, nahan ve er isholibo shi ve venda ér Aôndo a de hemen ve ga. Kwagh u ve er ne gema va ve a ican kpishi je.—Genese 3:16-19.
3. Kwagh u Adam man Ifa er ne bende a vese nena?
Adam man Ifa yange mba eren kwaghbo yô, ve hingir ior mba yinan. Nahan mbayev mba ve va mar la cii due a myen ne. Bibilo ôr kwagh u Adam ér: “Er isholibo nyôr shin tar sha or môm, man ku gema va sha ci u isholibo la yô, ku va sha ior cii.”—Mbaroma 5:12.
Se mba yan ican sha ci u atôakyaa kposo kposo. Ashighe agen ka se ya ican sha ci u se er kwagh sha ibyume. Ashighe agen di yô, ka se ya ican sha ci u akaa a mbagen ve er sha inja ga yô. Ashighe agen yô, ka se ya ican sha ci u se mba hen ijiir i ma se lu ga shin shighe u ma se lu her ga yô.—Ôr Orpasenkwagh 9:11.
HEN KWAGH I ZA SHIMI
Hen fa er i hii ve i lu Aôndo a ne akaabo a lu eren ga, shi i lu un a ne ior ve lu yan ican shin tar nyian ga la, man er ka sea yaan ican ve i lu un yô.
4. Or u nan ne se lu yan ican yô
Ior kpishi na jighjigh ér ka Aôndo a lu hemen tar ne ye. Ka mimii? Nenge VIDIO i i lu heen ne.
Ôr Yakobu 1:13 man 1 Yohane 5:19, maa lam nen sha mpin ne:
-
Ka Aôndo a ne ior ve lu yan ican shi akaabo a lu eren yee?
5. Nenge ase akaa a hemen u Satan u ve a mi yô
Ôr Genese 3:1-6, maa lam nen sha mbampin mban:
-
Satan yange er aie ér nyi?—Nenge ivur 4 man 5.
-
Satan yange tese ér Yehova ngu yangen uumace u zuan a kwagh u dedoo nena?
-
Sha kwagh u Satan yange ôr yô, saa Yehova una hemen uumace ve a kpe ve iyol yee?
Ôr Orpasenkwagh 8:9, maa lam nen sha mpin ne:
-
Ka nyi i lu zan hemen hen shighe u Yehova a lu hemen tar ga nee?
-
Adam man Ifa yange ve lu ken Paradiso shi ve lu a myen môm môm ga. Kpa ve ungwa imo i Satan, nahan ve hemba Yehova ato
-
Yange mba hemban Yehova ato kera yô, isholibo man ican kua ku kar tema tor shin tar
-
Yehova una va bee a isholibo kua ican man ku cii. Hen shighe la, uumace vea kera lu a myen môm môm ga, shi vea hide a lu ken Paradiso
6. Ka sea yaan ican nahan i vihi Yehova kpishi
Ka sea yaan ican nahan kwagh a gba Aôndo sha mi je kpa? Nenge ase kwagh u Tor Davidi man apostoli Peteru yange ve nger ne. Ôr Pasalmi 31:7 man 1 Peteru 5:7, maa lam nen sha mpin ne:
-
Er u fe wer Yehova fa ican i se lu yan ne shi kwagh gba un sha mi nahan, ka u nena?
7. Aôndo una va bee a ican i ior ve lu yan ne cii
Ôr Yesaia 65:17 man Mpase 21:3, 4, maa lam nen sha mpin ne:
-
Er se fe ser Yehova una va sôr hanma kwagh u a ne uumace ve lu yan ican yô, kwagh la sur se ishima nena?
U fa kpa?
Shighe u Satan hii eren aie la, yange vihi Yehova iti. Yange kaa ér Yehova ka Orhemen u dedoo ga, shi eren kwagh a mba a hemen ve la sha dooshima ga. Yehova una va been a ican i uumace ve lu yan ne kera yô, una kar a ilyahan sha iti na kera man ica a gba ga tsô una er kwagh ne. Una tese wang ér ka hemen na u hembe doon ye. Kwagh u been a ilyahan sha iti i Yehova kera la, ka ikyaa i hemban sha won cii.—Mateu 6:9, 10.
IOR MBAGENEV KA VE KAA ÉR: “Ka Aôndo a ne ve se lu yan ican ye.”
-
We u nenge nena?
KA NYI U HENE?
Ka Satan Diabolo kua Adam man Ifa jighilii ve ne akaabo a lu eren shin tar ye. Ican i se lu yan ne i vihi Yehova kpishi shi ica a gba ga tsô una bee a i kera.
Mbampin mba umbur kwagh u i hen yô
-
Satan Diabolo yange tsugh Ifa ér nyi?
-
Ihyembeato i Adam man Ifa la, bende a vese cica cii nena?
-
Er nan se fe ser kwagh gba Yehova sha ican i se lu yan laa?
SEER HENEN KWAGH
Nenge er Bibilo i pase kwagh u a lu isholibo yô.
Seer ôron kwagh u Bibilo i ôr sha kwagh u ikyaa i Satan Diabolo yange va a mi ken sule u Eden la.
Er Nan Ve Aôndo A De Ior Ve Lu Yan Icanaa? (Iyoukura, Maaci 1, 2014)
Nenge mbamlumun mba surun se ishima mba i ne sha mpin ugen u a taver kpishi yô.
Nenge kwagh u orgen a hen ken ican i a nenge ior ve yan hen ijiir na yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
