1 Mbakorinte 12:1-31
12 Anmgbianev, m soo mer fa nen kwagh u uiyua mba jijingi dedoo.
2 Ne fa, shighe u ne lu ken tar* la, i mee ne ne gbaa civir ieev mbi mbi lamen ga la tsô.
3 Hegen m soo mer fa nen ner, or môm u nana ôron kwagh sha iwasen i jijingi u Aôndo ve nana kaa ér “Ifyan i kôr Yesu!” je kpa nan ngu ga. Shi or môm nana fatyô u kaan ér “Yesu ka Ter!” ga, saa sha iwasen i icighan jijingi.
4 Uiyua mba kposo kposo, kpa jijingi yô, ngu môm tsô;
5 shi ityom ngi kposo kposo, kpa Ter ngu môm tsô;
6 shi akaaeren nga kposo kposo, kpa ka Aôndo môm a eren a cii ken hanma or ye.
7 Kpa akaa a jijingi a wasen hanma or u eren la nga a due ken igbar, shi Aôndo ka a na ior jijingi shon sha u ve̱ er akaa a lun a iwasen.
8 Gadia orgen ka i na nan jijingi la ér nana̱ lamen* sha kwaghfan, orgen di i na nan jijingi shon môm sha u nana̱ lamen sha mfe,
9 orgen yô, ka i na nan jijingi shon la môm ér a wase nan u lun a jighjigh u nan, orgen di shi i na nan jijingi shon la môm ér nana̱ been ior angev;
10 shi orgen yô, ka i na nan jijingi la ér nana̱ eren ityom i kpilighyol,* orgen ér nana̱ ôron kwaghôron u profeti, orgen di sha u nana̱ kaven aluer ma kwaghôron due ka hen Aôndo shin ka hen a na ga yô; shi ka i na orgen ér nana̱ lamen ijô kposo kposo, orgen di i na nan ér nana̱ pasen ijô.
11 Kpa ityom ne cii ka jijingi la môm a eren i ye, ka a wase hanma or u eren i vough er a soo la.
12 Gadia er iyol i lu i môm kpa i lu a alegh kpishi, shi alegh a lu kpishi kpa i lu iyol la i môm nahan, kape Kristu kpa a lu je la.
13 Gadia ka sha jijingi môm se cii i er se batisema se hingir iyol i môm ye, a lu Mbayuda shin Mbagrika, a lu ikpan shin mba i dugh ve ken kpan kera kpaa, se cii se ngohol ka jijingi môm.
14 Jighilii yô, iyol ngi ilyeegh i môm tseegh ga, kpa ngi a alegh kpishi.
15 Aluer nguhar kaa ér, “Er m lu uwegh ga yô, m ngu ilyeegh ki iyolough ga” kpa, ngula tese ér ku ilyeegh ki iyolough ga ze.
16 Shi aluer tough kaa ér, “Er m lu ishe ga yô, m ngu ilyeegh ki iyolough ga” kpa, ngula tese ér ku ilyeegh ki iyolough ga ze.
17 Luun er iyol jimin cii ka ishe yô, ma se ungwan hana? Man luun er iyol jimin cii ka tough yô, ma se ungwan ihyumakwagh hana?
18 Kpa Aôndo ver hanma ilyeegh ki iyolough sha inja vough er a soo la.
19 Luun er a cii nga kwaghmôm nahan, iyol ma i lu hana?
20 Kpa alegh a iyolough nga kpishi, nahan kpa iyol gema ngi i môm.
21 Ishe ia fatyô u kaan a uwegh ér, “Kwagh gbam a we ga” ze, shin ityough kia fatyô u kaan a angahar ér, “Kwagh gbam a ven ga” ze.
22 Kpa alegh a iyolough a i lu inja er a gba kwagh ga la kpa gba u aa lu keng,
23 shi alegh a iyolough a se hen ser nga a icivir keng ga la, se mba hembe eren a a sha icivir, kape alegh a iyolough a ase a a doo ken igbar ga la kpa se hembe wuhan a iyol sha icivir je la.
24 Kpa alegh a iyolough a ase a a doo kenger la yô, ka i gba u a er a a nahan keng ga. Nahan kpa, Aôndo er iyol sha inja, a na ilyeegh ki ki lu a icivir ga la hemba kin a icivir,
25 sha er iyol i̱ de lu a mpav ker ga, kpa hanma ilyeegh ki̱ wa ki gen ikyo yô.
26 Ilyeegh ki iyolough i môm ka kia yaan ican yô, alegh a iyolough agen la cii a ya ican a ki imôngo; shin ka a̱ na ilyeegh ki iyolough i môm icivir yô, agen la cii a ember a ki imôngo.
27 Nahan ne mba iyol i Kristu, man hanmô wen asange asange nan ngu ilyeegh.
28 Shi Aôndo na ior kposo kposo ken tiônnongo ityom: mba hiihii ka mbaapostoli, mba sha uhar ka uprofeti, mba sha utar ka mbatesen; maa dondo mbaeren ityom i kpilighyol;* maa mba been ior iangev, maa mbaeren ityom i wasen ior, maa mbafan hemen; maa mba lamen ijô kposo kposo.
29 Ka ve cii ve lu mbaapostoli yee? Ka ve cii ve lu uprofeti yee? Ka ve cii ve lu mbatesen yee? Ka ve cii ve eren ityom i kpilighyol* yee?
30 Ka ve cii ve lu a iyua i been ior iangev yee? Ka ve cii ve lamen ijô yee? Ka ve cii ve lu mbapasen ijô* yee?
31 Kpa za nen hemen u keren uiyua mba hemban la sha gbashima tsung. Nahan kpa, me tese ne kwagh u a hembe lun a inja cii yô.
Ngeren mba shin kpe
^ Shin “ne lu a hingir mbanan jighjigh ga.”
^ Shin “pasen loho.”
^ Shin “eren uivande.”
^ Shin “mbaeren uivande.”
^ Shin “ve eren uivande.”
^ Shin “mbagemankwagh.”
