Akaa a ken jijingi a u eren ayange ayange la wa u ôron ivur Bibilo i sha iyange la, man mkaanem ma pasen ivur shon, ma ken antakerada u U Timen ken Ruamabera Ayange Ayange la kpa? Aluer u ngu eren nahan ga yô, u fatyô u eren kwagh ne hanma iyange kpa? Ior kpishi ka ve ôr ivur i sha iyange la pepe sha er vea nguren eren akaa a ve a ayange ayange la yô, vea fatyô u gbidyen kwar sha kwagh u ve ôr la yô. (Yos 1:8; Ps 119:97) Kpa u er nan ve u fatyô u hemban zuan a iwasen ken ivur Bibilo i sha iyange laa? Ôr avur a a kase ivur shon la sha er u fa akaa a a lu zan hemen, shighe u kwagh u i er ken ivur shon la er yô. Nôngo hen sha ma kwagh u i er ken Bibilo u a te iwanger sha kwaghwan u i pase ken ivur shon la. Maa dondo kwaghwan shon ken uma wou. Aluer u de Mkaanem ma Aôndo ma hemen we u tsuan akaa a u er la yô, ma a tese u kwagh u u er ken uma yô, shi ma a wase u sha mimi.—Ps 119:105.

Icombor i Betel tar sha won cii ka i time ken antakerada u U Timen ken Ruamabera Ayange Ayange la, sha shighe u kwaghyan u pepe la. Ken anyom a a sember karen ne, i ver mbamcivir mba icombor i Betel ka i er pepe ne kpishi sha Ityôgh ki Televishen ki Mbashiada mba Yehova, hen ijiir i UINIONGO MAN AKAA A VESEN la. Ka hanma shighe nahan u mase nengen mcivir ne môm shin i hemba nahana? Alaghga akaa agen a i tim sha mi la nga sha ci wou jighilii. Ikyav i tesen yô, kwagh u Loti la una fatyô u wasen we shighe u u lu tsuan akaa a u er la nena?

NENGE VIDIO I TAR U̱ DE KERA DOON WE ISHIMA GA LA (1Yh 2:15), MAA NA MLUMUN SHA MBAMPIN MBA VE DONDO NE:

• Ka kwaghwan u Bibilo u nyi Mcivir u Pepe ne yange har sha mini?

• Kwagh u Loti la, ka ikyav i tesen kwaghbo u a lu ken ieren i tar doon se ishima shin akaa a a lu ken u la nena?—Ge 13:12; 14:12; 19:3, 12, 13, 24-26

• Se tese ser Yehova doo se ishima, ka tar shin akaa a a lu ken u la ga nena?