Aver yem sha atineakaa

Mbashiada mba Yehova

Tsua Zwa Tiv

Inja i “Civir Teru man Ngôu” la Ér Nyi?

Inja i “Civir Teru man Ngôu” la Ér Nyi?

Mlumun u Bibilo

Tindi u a kaa ér, “civir teru man ngôu” la ngu sha ajiir kpishi ken Bibilo. (Ekesodu 20:12; Duteronomi 5:16; Mateu 15:4; Mbaefese 6:2, 3) Gba u u civir teru man ngôu sha igbenda i vesen inyiin.

  1. Wuese ve. Aluer u tese iwuese sha hanma kwagh u mbamaren ou ve er a we yô, a tese ér u ngu civir teru man ngôu. U fatyô u tesen iwuese sha u nengen mkor ve la wer ka kwagh u injaa. (Anzaakaa 7:1, 2; 23:26) Bibilo taver we ishima ér we u nenge mbamaren ou wer ka “ihyagh” you, inja na yô, we u taan ave vanger a ve.—Anzaakaa 17:6.

  2. Lumun hemen ve. Aluer u lumun tahav mbu Aôndo a ne teru man ngôu u hemen la yô, a tese ér u ngu civir ve, hemban je yô, shighe u u lu gumor la. Mbakolose 3:20 kaa a agumaior ér: “Ungwan nen imo i mbamaren enev ken akaa cii, gadia ka kwagh u doon Ter je ne.” Yesu je kpa, shighe u lu gumor la ungwan imo i mbamaren nav, a mkighir shio.—Luka 2:51.

  3. Eren kwagh a ve sha icivir. (Levitiku 19:3; Mbaheberu 12:9) Ashighe kpishi kwagh ne ka a wa kwagh u u ôr a ve man er u ôr kwagh shon la cii ker. Sha mimi yô, ashighe agen mbamaren mbagenev ka ve er akaa sha igbenda i a taver u nan ve icivir yô. Nahan cii kpa, mbayev vea fatyô u nan mbamaren vev icivir, sha u palegh u lamen shin eren akaa a ve sha ilyahan. (Anzaakaa 30:17) Bibilo tese ér kwagh u wanye tuhwan ter shin ngô u nan la, ka kwaghbo u vesen.—Mateu 15:4.

  4. Nenge sha ugbayol vev. Shighe u mbamaren ou ve bee iyol kera la alaghga a gba u u sue ve sha akaa a kwagh a gbe ve a mi la kpôô kpôô. U fatyô u nan ve icivir sha u nôngon sha afatyô wou cii wer ve zua a kwagh u kwagh a gbe ve a mi la. (1 Timoteu 5:4, 8) Ikyav i tesen yô, Yesu yange ver or u nana nengen sha ngô na, cii ve mase kpen ye.—Yohane 19:25-27.

Mtsum u a lu sha kwagh u or civir ter u nan man ngô u nan la yô.

Mtsum: Aluer u soo u nan teru man ngôu icivir yô, gba u u de ve vea tesen we kwagh u u er ken ivese you yô.

Mimi: Bibilo tese ér ivese hemba ikyar i or ye vea ior mba hen tsombor u nan la cii. Genese 2:24 kaa ér: “Or ka nan undu ter u nan kua ngô u nan, nan var ken kwase u nan, ve hingir iyôgh i môm.” (Mateu 19:4, 5) Sha mimi yô, mba ve er ivese la vea fatyô u zuan a kwaghwan hen mbamaren vev shin hen wonov vev. (Anzaakaa 23:22) Nahan kpa, nomsoor man kwase mba ve vôso ayol a ve la, vea fatyô u tsuan u veren akighir a a tese er ior mba hen tsombor ve vea wa uwegh ken ivese ve a za kighir la.—Mateu 19:6.

Mtsum: Gba u teru man ngôu vea lu a tahav sha a we a hemba hanma or kua Aôndo kpaa.

Mimi: Er Aôndo a ne mbamaren tahav hen tsombor nahan kpa, uumace cii tahav vev mbu a ikighir, mayange tahav vev hemba mbu Aôndo la ga. Ikyav i tesen yô, zum u atejir u vesen kaa a mbahenen mba Yesu ér ve hemba Aôndo ato la, mbahenen kaa ér: “Ka u sé hemba ungwan imo i Aôndo keng a imo i ior.” (Aerenakaa 5:27-29) Kape mbayev kpa ka ve ungwa imo i mbamaren vev “ken Ter” je la, inja na yô, ka ve ungwa imo i mbamaren vev ken akaa cii a a hendan a atindi a Aôndo la ga yô.—Mbaefese 6:1.

Mtsum: Aluer ka u u civir teru man ngôu yô, gba u u dondo atesen a kwaghaôndo ve la.

Mimi: Bibilo taver se ishima ér se kar akaa a i tese se la, sha er se fa aluer ka mimi yô. (Aerenakaa 17:11; 1 Yohane 4:1) Or u nan er kwagh ne yô, alaghga ken hemen nana va tsua u nan jighjigh a akaa a a kaha a mbamaren mba nan la yô. Bibilo ter kwagh u mbacivir Aôndo sha mimi kpishi mba yange ve dondon kwaghaôndo u uter vev la ga yô, er Aberaham man Rutu kua apostoli Paulu nahan.—Yosua 24:2, 14, 15; Rutu 1:15, 16; Mbagalatia 1:14-16, 22-24.

Mtsum: Aluer ka u u civir teru man ngôu yô, gba u u eren uiniongo mba tyôôv mba civir uter mbatsev.

Mimi: Bibilo kaa ér: “Civir Ter Aôndo wou, ka Un tseegh er Un tom ye.” (Luka 4:8) Or u nan civir uter mbatsev la, kwagh u nan doo Aôndo ishima ga. Kwagh ugen yô, Bibilo tese ér “mbakpenev yô, fa ma kwagh ga.” Ior ka vea civir ve kpa ve fa ga; shi vea fatyô u wasen shin vihin or iyol ga.—Orpasenkwagh 9:5, 10; Yesaia 8:19.