Marcos 9:1-50
-
Jesús niʼni i̱mba̱ núthii (1-13)
-
Naʼni thanuu mbáa dxámá bi̱ gíʼdaa giñán xkawi̱i̱ʼ (14-29)
-
“Xúgíʼ ma̱ndoo marigá náa mbáa bi̱ gíʼdoo fe” (23)
-
-
Jesús naʼthí mbu̱júu̱ rí makhañúu (30-32)
-
Xa̱bi̱i̱ nagiʼdu̱u̱n mu mbuyáá tsáa gíʼdoo itháan numuu (33-37)
-
“Bi̱ ragíʼdáanʼlu sia̱nʼ xtáa ga̱jma̱á ni̱ndxu̱lú” (38-41)
-
Rí naʼni majngrádiinʼ (42-48)
-
“Garigá má xúʼko̱ idú náa ikháanʼla” (49, 50)
9 Ma̱ngaa niʼthún: “Na̱tala gajkhun rí tikhuun bi̱ kúwá gi̱i̱ xákháñún, asndu índo̱ gúyáá rí Xa̱bu̱ Ñajunʼ ndrígóo Dios* ni̱ʼkha̱ má ga̱jma̱a̱ tsiaki̱i̱ dí gíʼdoo”.+
2 Majun mbiʼi nda̱wa̱á, Jesús ni̱jkha̱ ga̱jma̱a̱ Pedro, Santiago ga̱jma̱a̱ Juan náa mbá kúbá mitsídánʼ náa nikúwá ndajkuíín. Ikhí Jesús niʼni i̱mba̱ núthii náa inún ikhiin.+
3 Xtíñuu nigíʼdu̱u̱ nixpíbiʼ, niʼni itháan mixídiʼ rí nimbáa náa tsu̱du̱u̱ ku̱ba̱ʼ xáʼngo̱o̱ gáʼjñáan mu ma’ni miʼxá xúʼko̱.
4 Ikhú nikujmaa Elías ga̱jma̱a̱ Moisés, kúwá rutamijná gajmiún Jesús.
5 Ikhú Pedro niʼthúu̱n Jesús: “Maestro* ¡ra̱ʼkhá tháán májánʼ dí kuwáanʼxu gi̱i̱!, mu̱ʼni̱ ajtsú guʼwá xtíin: Mbá maʼni ndrígáaʼ ikháán, mbá maʼni ndrígóo Moisés ga̱jma̱a̱ i̱mba̱ maʼni ndrígóo Elías”.
6 Pedro niʼthí rígi̱ numuu dí na̱nguá ndiʼyoo rí maʼni, numuu rí nimíñúún wéñuuʼ.
7 Ikhú mbá du̱u̱n niruguadu̱wi̱i̱n,* ga̱jma̱a̱ ikhí niwáán mbá aʼwá+ rí niʼthí: “Bugi̱ nindxu̱u̱ A̱ʼdióʼ bi̱ nandoʼ ka̱yo̱o̱.+ Gudxawíínla”.+
8 Ikhú índo̱ niyejxi̱ mbájndi ndiyáá rí ndáwa̱a̱ nimbáa, i̱ndó Jesús wíji̱.
9 Índo̱ kúwá ruguájta̱án náa kúbá, Jesús niʼthún xa̱bi̱i̱ rí xútháán nimbáa rí ndiyáá+ asndu índo̱ A̱ʼdióo Xa̱biya̱ gátujxi̱i̱* náa majñu̱únʼ wajinʼ.+
10 Ikhiin ninimbu̱ún rí niʼthún,* mú nitamijná kaníkiin ndiéjunʼ nindoo gáʼthí rí matujxi̱i̱ náa majñu̱únʼ wajinʼ.
11 Ikhú nirajxi̱i̱ Jesús: “Náá numuu rí bi̱ nusngáa xtángoo nuthi rí Elías+ gíʼmaa ma̱ʼkha̱ ginii rá.”+
12 Ikhaa niʼthún: “Gajkhun má rí Elías gíʼmaa ma̱ʼkha̱ ginii mu maʼni májáanʼ xúgíʼ.+ Mú, náá numuu dí náa kiʼniraʼmáʼ naʼthí dí A̱ʼdióo Xa̱biya̱ ndayóoʼ maguma gínáa+ ga̱jma̱a̱ xáʼndúún gúyáá xá.+
13 Ikhúún na̱tala rí Elías+ ni̱ʼkha̱ má ga̱jma̱a̱ nini̱i̱ xó má nindúún, xó má kiʼniraʼmáʼ rí magíʼnuu”.+
14 Índo̱ niguánúu náa kúwá eʼwíinʼ xa̱bi̱i̱, ndiyáá rí mbaʼin xa̱bu̱ kúwá ruruguami̱ʼi̱i̱n, ga̱jma̱a̱ tikhuun bi̱ nusngáa xtángoo kúwá rutamíjná gajmiún.+
15 Índo̱ xa̱bu̱ ndiyáá Jesús niʼniún tsiánguá ga̱jma̱a̱ nigáñún nigún gúrajxi̱i̱.
16 Ga̱jma̱a̱ ikhaa nirajxu̱u̱n: “Ndiéjunʼ kuwáanʼ rutamíjná gajmiála xá.”
17 Mbáa xa̱bu̱ bi̱ xtáa náa majñu̱únʼ ikhiin niriʼñuu: “Maestro, ni̱ʼkhá ka̱ya̱a̱ a̱ʼdióʼ numuu rí gíʼdaa giñán xkawi̱i̱ʼ* ga̱jma̱a̱ niʼni rí maguanúu chíjmáa.*+
18 Mámbá rí na’ni gínáa, naʼdati̱ga̱a̱ mbayííʼ ga̱jma̱a̱ dxámá na̱ʼkha̱ xngaʼá rawuunʼ, naʼkuduun iñuuʼ ga̱jma̱a̱ nakáguabaaʼ. Nindu̱ʼu̱u̱n xa̱bia̱a̱ʼ rí muxkriya̱a̱ʼ mú tájmiin”.
19 Ikhú Jesús niʼthún: “¡Xa̱bu̱ raguáʼdáá fe ñajuanla!+ Asndu nguáthá mba̱yu̱u̱ʼ xóó gáxtáá ga̱jma̱á nindxa̱la rá. Asndu nguáthá mba̱yu̱u̱ʼ xóó gáʼngo̱o̱ a̱jkiu̱nʼ gúnila rá. Gaguwa̱ʼ ku̱ya̱a̱la gi̱i̱”.+
20 Ikhú niguwáʼ kuya̱a̱ dxámá. Índo̱ giñán xkawi̱i̱ʼ ndiʼyoo Jesús, nimajngariga̱a̱ mbayííʼ dxámá, nirgájximinaʼ ga̱jma̱a̱ ni̱ʼkha̱ xngaʼá rawuunʼ.
21 Ikhú Jesús nirajxu̱u̱ anu̱u̱* dxámá: “Nguáná nigíʼdu̱u̱ raʼniuu xúgi̱ xá.” Ikhaa niriʼñuu: “Asndu nákha chíʼgíiʼ.*
22 Mbaʼa nuthu giñán xkawi̱i̱ʼ nadama̱ʼa̱a̱n dxámá náa aguʼ o náa iyaʼ mu maxíyáa, mú á mu ikháán maʼnga̱a̱ʼ mataxkriya̱a̱ʼ, agáwiinʼ a̱jkia̱a̱nʼ xtayuxu ga̱jma̱a̱ atambáyuxu”.
23 Jesús niʼthúu̱n: “Náá numuu narathá dí ‹á mu ikháán maʼnga̱a̱ʼ› rá. Xúgíʼ ma̱ndoo marigá náa mbáa bi̱ gíʼdoo fe”.+
24 Ikhú anu̱u̱ dxámá niʼthí: “¡Gúʼdoo má fe! Mú ¡atambáyuʼ magúʼdoo itháan!”.+
25 Índo̱ Jesús ndiʼyoo rí mbaʼin xa̱bu̱ eguwáʼ ragáñúún náa ikhiin, nixprígúu giñán xkawi̱i̱ʼ. Niʼthúu̱n: “Ikháán giñán xkawi̱i̱ʼ natani̱ rí dxámá bugi̱ xáʼthi ga̱jma̱a̱ xáʼdxawuun, ¡natha̱nʼ rí agajnáaʼ ga̱jma̱a̱ xátangaán mata̱ʼa̱a̱ʼ nákhi náa ikhaa!”.+
26 Nda̱wa̱á rí nindxa̱ʼwá ga̱jma̱a̱ nimajngariga̱a̱ mbayííʼ, ikhú nigájnáa giñán xkawi̱i̱ʼ. Ga̱jma̱a̱ asndu xóo nikháñuu dxámá kri̱ga̱a̱ kaʼnii. Ikha jngóo xa̱bu̱ nithi: “¡Nikháñuu xá!”.
27 Mú Jesús niguajtuun ñawúunʼ dxámá ga̱jma̱a̱ nikujxi̱i̱, ikhú dxámá niwi̱ji̱.
28 Nda̱wa̱á, índo̱ nito̱ʼo̱o̱ gajmíi̱n xa̱bi̱i̱ náa mbá guʼwá. Ikhú nguʼwáá nirajxi̱i̱: “Náá numuu rí ikháanʼ tájmáanʼxu gúxkriya̱a̱ʼ xá.”+
29 Ikhaa niriʼñúún: “I̱ndó ma̱ndoo magajnáa giñán xkawi̱i̱ʼ bugi̱ á mu najuiʼtájkáan”.
30 Ikhú nigájnaán ikhí, ninújngún Galilea, mú ikhaa táʼndoo rí xa̱bu̱ mudxawíín,
31 numuu rí nixtáa raʼsngúún xa̱bi̱i̱. Niʼthún: “A̱ʼdióo Xa̱biya̱ mixnájxi̱i̱ náa ñawúúnʼ xa̱bu̱ ga̱jma̱a̱ muxiyáa.+ Mú maski ajndu muxiyáa índo̱ gáʼni ajtsú mbiʼi matujxi̱i̱”.+
32 Ikhiin na̱nguá nikru̱ʼu̱u̱n rí niʼthí, mú táʼngo̱o̱ a̱jkiu̱ún gúra̱jxi̱i̱.
33 Índo̱ niguánú Capernaúm. Índo̱ xtáa má náa guʼwá gajmíi̱n, ikhú nirajxu̱u̱n: “Náá numuu rí eguwaʼ ragiʼdala kamba̱a̱ rá.”+
34 Mú ikhiin nda̱a̱ rí nithi numuu rí náa kamba̱a̱ niguwáʼ ragiʼdu̱u̱n mu mbuyáá tsáa gíʼdoo itháan numuu.
35 Ikhú ikhaa nigi̱ʼi̱ ga̱jma̱a̱ nindxaʼwún bi̱ mbá Gu̱wi̱i̱nʼ ejmi̱i̱n xa̱bi̱i̱ ga̱jma̱a̱ niʼthún: “Á mu mbáa dí ikháanʼ nandoo magiʼdoo numuu, gíʼmaa rí makruíguminaʼ ga̱jma̱a̱ mambáñún xúgíinʼ”.+
36 Ikhú ni̱ʼkha̱ kayáa mbáa ada̱, nitsijii náa taphu̱ún, ikhú nixkrámáʼ náa xpajpoo ga̱jma̱a̱ niʼthún:
37 “Bi̱ nagruiguíi mbáa ada̱ xóo bugi̱ ga̱jma̱a̱ mbiʼyuʼ,+ nagruigúún má mangúún. Ga̱jma̱a̱ bi̱ nagruigúún ikhúún raʼkháa i̱ndó ikhúún egruigúún, nagruiguíi ma bi̱ nikungu̱u̱nʼ ma̱ngaa”.+
38 Juan niʼthúu̱n: “Maestro, ndiya̱a̱xu mbáa xa̱bu̱ naxkawíin giñán xkawi̱i̱nʼ* ga̱jma̱a̱ mbiʼyaaʼ, mú ninimíjna̱xu dí murikháá numuu rí na̱nguá jngruigo̱o̱ ga̱jma̱á ni̱ndxu̱lú”.+
39 Mú Jesús niriʼñuu: “Xúrikháá, numuu dí nimbáa xándoo maʼni milagro ga̱jma̱a̱ mbiʼyuʼ, ga̱jma̱a̱ ikhú má maʼthí dí raʼkhí ga̱jma̱a̱ numuʼ.
40 Numuu rí bi̱ ragíʼdáanʼlu sia̱nʼ xtáa ga̱jma̱á ni̱ndxu̱lú.+
41 Na̱tala gajkhun dí rígá rí mada̱a̱ʼ+ má tsiaki̱i̱ xa̱bu̱ bi̱ gáxnala mbá vaso iyaʼ muwa̱a̱nla, numuu dí ikháanʼ kaʼyala náa Cristo.+
42 Mú asndu tsáa bi̱ gáʼni majngrádaaʼ mbáa bi̱ itháan chíʼgíiʼ bugi̱, bi̱ gíʼdoo fe náa ikhúún, itháan májánʼ gáʼni rí maxtoʼóo mbá itsúu molino* náa aphuu ga̱jma̱a̱ miʼdama̱ʼa̱a̱n náa lamáa.*+
43 Á mu mbóoʼ mbiʼi ñawáanʼ naʼni rí makiéʼkáanʼ, atrujturígú. Itháan májánʼ rí mixndu ñawáanʼ gákhanaaʼ rí maraxtaa ki xóo mbá nájma̱ ñawáanʼ gíʼdama̱ʼa̱a̱n náa Gehena,* náa aguʼ dí tséjuiyuuʼ nditháan.+
44 *
45 Ga̱jma̱a̱ á mu rajkuáaʼ naʼni rí makiéʼkáanʼ, atrujturígú. Itháan májánʼ rí mixndu rajkuáaʼ gákhanaaʼ rí maraxtaa ki xóo mbá nájma̱ rajkuáaʼ gíʼdama̱ʼa̱a̱n náa Gehena.+
46 *
47 Ga̱jma̱a̱ á mu idaaʼ naʼni rí makiéʼkáanʼ, atríyaʼ ga̱jma̱a̱ atadaʼ mitsínguánʼ.+ Itháan májánʼ rí mata̱ʼa̱a̱ʼ náa naʼtáñajunʼ Xa̱bu̱ Ñajunʼ ndrígóo Dios ga̱jma̱a̱ mbóó idaaʼ ki xóo rí mbá nájma̱ idaaʼ miʼdama̱ʼa̱a̱n náa Gehena,+
48 náa ñu̱u̱ tsékháñuu ni má aguʼ tséjuiyu̱u̱ʼ.+
49 Numuu rí xúgíinʼ mbaʼyóoʼ maguma ríníin ga̱jma̱a̱ aguʼ.+
50 Májánʼ wéñuuʼ nindxu̱u̱ idú. Mú, á mu idú nánguá miríná, ní xándoo mata̱nga̱a̱ maʼni̱i̱ miríná.+ Garigá má xúʼko̱ idú náa ikháanʼla+ ga̱jma̱a̱ gakuwáanʼ tsímáá má xúʼko̱”.+
