Marcos 8:1-38
-
Jesús naxníʼtsún mbá 4,000 xa̱bekha (1-9)
-
Ninda̱ʼa̱a̱ maʼni milagro (10-13)
-
Levadura ndrígu̱ún fariseos ma̱ngaa Herodes (14-21)
-
Naʼni thanuu mbáa bi̱ tsékruigo̱o̱ náa Betsaida (22-26)
-
Pedro naʼthí rí Jesús nindxu̱u̱ Cristo (27-30)
-
Jesús naʼthí rí makhañúu (31-33)
-
Rí gíʼmaa maʼni mbáa xa̱bi̱i̱ Jesús (34-38)
8 Mbiʼi má rúʼko̱, mbu̱júu̱ nigimbíin mbaʼin xa̱bu̱. Numuu rí nda̱a̱ kayuuʼ rí mu̱phu̱, ikha jngóo Jesús nindxaʼwún xa̱bi̱i̱ ga̱jma̱a̱ niʼthún:
2 “Nagáwíinʼ a̱jkiu̱nʼ eni̱ xa̱bu̱ bugi̱,+ numuu rí naʼni má ajtsú e̱jkha̱ʼ rí kúwá ga̱jma̱á ni̱ndxu̱ʼ ga̱jma̱a̱ nda̱a̱ rí mu̱phu̱.+
3 Á mu nathu̱u̱n magúun guʼwún ga̱jma̱a̱ ewiʼ, makámíndúún kamba̱a̱. Numuu dí tikhuun naguwáʼ mitsínguánʼ wéñuuʼ”.
4 Ikhú xa̱bi̱i̱ nitháán: “Mitsínguánʼ náa kuwáanʼ, náá gándoo gákhánúu pan mbáa xa̱bu̱ mu maxníʼtsúún xa̱bu̱ bi̱ mbaʼin wéñuuʼ bugi̱ rá.”
5 Ikhú ikhaa nirajxu̱u̱n: “Nguáthá pan kudala rá.” Ikhiin niriʼña̱a̱: “Mbá juwan”.+
6 Ikhú niʼthún xa̱bu̱ rí matrigi̱i̱n mbayííʼ, nda̱wa̱á niguajtuun juwan pan, nixnáa núma̱aʼ Dios, nikuíʼtáa ga̱jma̱a̱ nixnúún xa̱bi̱i̱ mu ikhiin muxpiʼta̱a̱ náa xa̱bu̱.+
7 Ma̱ngaa kudiin nguéjmi̱i̱n e̱gi̱ʼ, ikha jngóo nda̱wa̱á rí niʼtájkháan niʼthún xa̱bi̱i̱ rí magún ruruiʼta̱a̱ náa xa̱bu̱.
8 Xa̱bu̱ nipiʼtsu asndu nigiʼmún ga̱jma̱a̱ nirajxi̱i̱ mbá juwan canasta mba̱ʼu̱ kajtíí xuíʼtóo rí nipídu̱únʼ.+
9 Naʼni mbá 4,000 xa̱bekha bi̱ nipiʼtsu. Nda̱wa̱á Jesús niʼtángawún.
10 Ikhú Jesús nitsimuu náa barco gajmíi̱n xa̱bi̱i̱, ga̱jma̱a̱ nigún náa mbayuuʼ Dalmanuta.+
11 Ikhú niguwáʼ fariseos ga̱jma̱a̱ nigíʼdi̱i̱ nitamijná gajmiún, ikhú nitsudaa rí maʼni mbá milagro ga̱jma̱a̱ mbiʼyuu Dios, mu xúʼko̱ mbuyáá ndiéjunʼ gáʼni.+
12 Ikhú mi̱jnu̱ʼ nitsíná ga̱jma̱a̱ niʼthí: “Náá numuu rí xa̱bu̱ bugi̱ i̱ndó nunda̱ʼa̱ mbuyáá milagro rá.+ Na̱tala gajkhun rí nimbá milagro xúyáá xa̱bu̱ bugi̱”.+
13 Nda̱wa̱á rí niʼthún rígi̱, nitsimuu náa barco ga̱jma̱a̱ nikidaa náa i̱mba̱ ridoo lamáa.*
14 Mú xa̱bi̱i̱ nimbumún gúdégúún pan, kááʼ imbóó kuya̱.+
15 Ikhú Jesús niʼthún: “Guñewumíjnala náa levadura ndrígu̱ún fariseos ma̱ngaa ndrígóo Herodes”.+
16 Ikhú xa̱bi̱i̱ nitamijná numuu rí na̱nguá kuda pan.
17 Numuu rí ndiʼyoo xóo etamijná, ikha jngóo niʼthún: “Náá numuu rí nugiʼdala ga̱jma̱a̱ numuu pan rá. Lá tséya̱a̱ dí xtáá ra̱tala ráʼ. Lá xóó tsékrua̱ʼa̱la ráʼ. Náá numuu rí gújkhúʼ wéñuuʼ a̱jkia̱la rí xóó tsíyoo gákrua̱ʼa̱la rá.
18 ‹Maski má kuaʼdáá idala, mú tsíyejxi̱, kuaʼdáá cháʼwanla mú tsédxawíín›. Lá nimbumala
19 nákha nikuíʼtáa mbá witsu pan+ mu mu̱phu̱ mbá 5,000 xa̱bekha ráʼ. Lá narmáʼáan a̱jkia̱la nguáthá canasta pan nipídu̱únʼ ráʼ.” Ikhiin nithi “mbá gu̱wa̱ʼ ijma̱”.+
20 “Ga̱jma̱a̱ nákha nikuíʼtáa mbá juwan pan mu̱phu̱ mbá 4,000 xa̱bekha, nguáthá canasta mba̱ʼu̱ rí nipídu̱únʼ nirajxi̱i̱la rá.” Ikhiin nithi, mbá “juwan”.+
21 Ikhú niʼthún: “Lá xóó tsékrua̱ʼa̱la ráʼ.”
22 Índo̱ niguánú náa Betsaida, ikhí xa̱bu̱ niguwáʼ kuya̱a̱ mbáa xa̱bu̱ bi̱ tsékruigo̱o̱ ga̱jma̱a̱ nitakáñíí rí maʼni thanuu.+
23 Ikhaa niguajtuun ñawúunʼ xa̱bu̱ bi̱ tsékruigo̱o̱ ga̱jma̱a̱ niríya̱a̱ʼ náa rawuunʼ xuajin, nda̱wa̱á rí nindujtóoʼ iduu+ ikhú nixkajma iduu ga̱jma̱a̱ nirajxu̱u̱: “Lá nandoo natiejxi̱ ráʼ.”
24 Ikhú xa̱bu̱ niyejxi̱ ga̱jma̱a̱ niʼthí: “Nda̱ñu̱u̱n xa̱bu̱ nagún, mú xóo ixi̱ kaʼniún”.
25 Jesús nitanga̱a̱ nixkajma iduu mbu̱júu̱, ikhú xa̱bu̱ nindoo niyejxi̱ kaʼwu.
26 Nda̱wa̱á nikuʼmaa maʼga̱a̱ goʼwóo ga̱jma̱a̱ niʼthúu̱n: “Xídxuuʼ náa xuajin”.
27 Nda̱wa̱á Jesús ni̱jkha̱ gajmíi̱n xa̱bi̱i̱ náa xuajin majkhaʼ rí kaʼyoo Cesarea ndrígóo Filipo, índo̱ xtáa ra̱jkha̱ gajmíi̱n náa kamba̱a̱ nirajxu̱u̱n: “Tsáá ñajunʼ ethi xa̱bu̱ eya̱a̱la ikháanʼ rá.”+
28 Ikhiin niriʼña: “Juan bi̱ Nakumíinʼ iyááʼ xa̱bu̱.+ Mú eʼwíinʼ nuthi rí nindxa̱a̱ʼ Elías.+ Ga̱jma̱a̱ eʼwíinʼ nuthi rí nindxa̱a̱ʼ mbáa profeta”.*
29 Ga̱jma̱a̱ ikhaa nirajxu̱u̱n: “Ikháanʼla, tsáá nindxu̱ʼ e̱tala rá.” Pedro niriʼñuu: “Ikháán nindxa̱a̱ʼ Cristo”.+
30 Ikhú Jesús niʼthún rí xútháán nimbáa.+
31 Ga̱jma̱a̱ nigíʼdu̱u̱ niʼthún rí A̱ʼdióo Xa̱biya̱ mbaʼyóoʼ rí mamínuuʼ ga̱jma̱a̱ rí xabuanii xáʼndúún gúyáá, mangiin ndxajkun bi̱ kuya̱ edxu̱u̱ ga̱jma̱a̱ bi̱ nusngáa xtángoo. Ga̱jma̱a̱ rí muxiyáa,+ ma̱ngaa rí índo̱ gáʼni ajtsú mbiʼi magabi̱i̱.*+
32 Niʼthí mbájmbu xóo magíʼnuu: Mú Pedro niríya̱a̱ʼ kaníí ga̱jma̱a̱ nixprígúu.+
33 Ikhaa nitangayii niyejxu̱u̱n xa̱bi̱i̱ ga̱jma̱a̱ nixprígúu Pedro, ikhú niʼthúu̱n: “¡Añejún kidxuʼ, Gixa̱a̱!* Numuu rí natatsaʼwamínáʼ xóo xa̱bu̱ numbaaʼ, raʼkháa xóo endxa̱ʼóo edxu̱u̱ Dios”.+
34 Ikhú niʼthún xa̱bi̱i̱ mangiin eʼwíinʼ xa̱bu̱: “Á mu mbáa nandoo mani̱ndxu̱u̱ xa̱bi̱ʼ, ganiñuuʼ raʼni rí nandoo ikhaa, ganiñaminaʼ rí maguma gínáa* ga̱jma̱a̱ xániñuuʼ ra̱ʼkha̱ kidxuʼ.+
35 Numuu rí asndu tsáá bi̱ gándoo maʼni kríyaminaʼ, makhañúu, mú bi̱ gákháñuu ga̱jma̱a̱ numuʼ ma̱ngaa numuu ajngáa rí májánʼ, makríya̱a̱ʼ.+
36 Dí lá gámbáyúu xa̱bu̱ rí magiʼdoo xúgíʼ dí rígá náa numbaaʼ á mu naʼnimbátigamínáʼ rá.+
37 Ndiéjunʼ lá gándoo gáxná mbáa xa̱bu̱ mu maxtáa rá.+
38 Á mu mbáa gáti̱yu̱u̱ʼ gáni ga̱jma̱a̱ ajngáa rí na̱tha̱ náa majñu̱únʼ xa̱bu̱ ra̱míjíinʼ ga̱jma̱a̱ xa̱bu̱ aʼkhá bugi̱, xúʼko̱ má gáti̱yu̱u̱ʼ A̱ʼdióo Xa̱biya̱ kaʼyoo ma̱ngaa+ índo̱ gáʼkha̱a̱ ga̱jma̱a̱ tsiaki̱i̱ ndrígóo Anu̱u̱* gajmíi̱n ángeles bi̱ guáʼdáá tsiaki̱i̱”.+
