Marcos 13:1-37
13 Índo̱ ikhaa xtáa ragájna̱a̱ náa guʼwá rí nduyamajkuíí Dios, mbáa xa̱bi̱i̱ niʼthúu̱n: “Maestro, ¡atayáá, ra̱ʼkhá tháán mitsaanʼ* itsí ga̱jma̱a̱ guʼwá rí nduyamajkuíí Dios!”.+
2 Mú Jesús niʼthúu̱n: “Lá natayáá guʼwá mba̱ʼu̱ rígi̱ ráʼ. Na̱tala gajkhun dí xáguanúu nimbá itsí, xúgíʼ majngudiri̱ga̱a̱”.+
3 Índo̱ ikhaa grígu náa kúbá Olivos ridoo náa gíʼ guʼwá rí nduyamajkuíí Dios, ikhú Pedro, Santiago, Juan ga̱jma̱a̱ Andrés ngu̱ʼwa̱á nirajxi̱i̱:
4 “Aratúxu nguáná gáʼni xúgíʼ rígi̱, ga̱jma̱a̱ ndiéjunʼ tsinaʼ gákujmaa dí inu marigá rígi̱ rá.”+
5 Ikha jngóo Jesús niʼthún: “Guñeumíjna̱ mu nimbáa xáʼni nduwáanʼla.+
6 Numuu rí mbaʼin maguwáʼ ga̱jma̱a̱ majmúún mbiʼyuʼ, ma̱ngaa muthi ‹ikhúún nindxu̱ʼ buʼko̱›, ga̱jma̱a̱ muni̱ nduwiinʼ mbaʼin xa̱bu̱.
7 Ma̱ngaa mudxawíín dí narígá guerra ga̱jma̱a̱ muwáán dí narígá guerra, xámíñálá numuu dí rígi̱ má wíji̱ marigá nákha xóó tsértumuu mbiʼi.+
8 Numuu rí xuajin mba̱ʼu̱ magi̱ʼdu̱u̱n gajmiún i̱ʼwáʼ xuajin mba̱ʼu̱, xa̱bu̱ ñajunʼ magi̱ʼdu̱u̱n gajmiún eʼwíinʼ xa̱bu̱ ñajunʼ,+ maʼxma asndu náá, ma̱ngaa marigá ewiʼ.+ Xúgíʼ rígi̱ nindxu̱u̱ ga̱ʼkhu̱* rí ndiʼkúú egi̱ʼdu̱u̱.+
9 Ga̱jma̱a̱ ikháanʼla guñeumíjna̱. Muxnajxáanʼla náa guʼwá ñajunʼ+ ga̱jma̱a̱ muxnala náa guʼwá rí bi̱ judíos nuxnáá gamajkhu Dios,*+ ma̱ngaa ga̱jma̱a̱ numuʼ magún kudáanʼ náa inún xa̱bu̱ ñajunʼ ga̱jma̱a̱ náa inún reyes. Mu xúʼko̱ xúgíinʼ ikhiin mbuyáá ga̱jma̱a̱ numuʼ.+
10 Ma̱ngaa, ginii ndayóoʼ majuiʼtáraʼa ajngáa rí májánʼ náa xúgíʼ xuajin.+
11 Mú, índo̱ gágún kudáanʼ náa inún xa̱bu̱ ñajunʼ, xáxmiéjuanla dí gútha̱. Gu̱tala rí gáʼkha̱ edxa̱la, numuu dí raʼkháa ikháanʼla gútha̱, espíritu santo* gáʼthí.+
12 Ma̱ngaa ndxájuu má xa̱bu̱ gáxnájxi̱i̱ mu muxiyáa, ga̱jma̱a̱ xabuanii muxnajxi̱i̱n e̱jñu̱ún ga̱jma̱a̱ e̱ji̱n muxnajxi̱i̱n anu̱ún mu makhañún.+
13 Xúgíinʼ xa̱bu̱ mawiñu̱u̱nʼ kuyala ga̱jma̱a̱ numuu mbiʼyuʼ.+ Mú bi̱ gáʼngo̱o̱ asndu índo̱ gártumuu mbiʼi,+ buʼko̱ bi̱ makríya̱a̱ʼ.+
14 Rí xúgi̱, índo̱ gúya̱a̱la rí xkawiʼ rí naʼni gámbáa,+ wíji̱ náa dí rakáʼyoo mawiji̱ (gakrua̱ʼa̱a̱ʼ dí naʼthí gi̱i̱), ikhú bi̱ kúwá náa Judea gagañútuʼún náa kúbá.+
15 Bi̱ jngruámuuʼ náa tsu̱du̱u̱ goʼwóo xágajta̱a̱ mu maguwíi rí kajti náa goʼwóo,
16 bi̱ ni̱jkha̱ xanáá xáta̱nga̱a̱ gáyáaʼ rí niniñuuʼ tsu̱di̱í mu mbayáaʼ xtíñuu.
17 ¡Phú ngíníi gu̱ʼu̱ bi̱ kuda ewíin e̱ji̱n* ga̱jma̱a̱ bi̱ nuxníxúnʼ e̱ji̱n mbiʼi rúʼko̱!+
18 Gutajkháan má xúʼko̱ mu xárígá rígi̱ índo̱ naʼni gu̱nʼ migúwán.*
19 Numuu rí mbiʼi rúʼko̱ marigá mbá ga̱ʼkhu̱ rí majphú mba̱a̱.*+ Asndu nákhi Dios nigíʼdu̱u̱ niʼni xúgíʼ, asndu xúgi̱, na̱nguá nirígá mbá gaʼkhu xóo rígi̱ ga̱jma̱a̱ ní xátanga̱a̱ marigá.+
20 Á mu raʼkháa Jeobá* gátsijijtu̱u̱n mbiʼi rúʼko̱, nimbáa xákríya̱a̱ʼ, mú ga̱jma̱a̱ numún bi̱ ikhaa niraʼwíin, mbiʼi rúʼko̱ mawiji̱jtu̱u̱n.+
21 Ma̱ngaa á mu mbáa gáʼtala, ‹¡Gu̱ya̱a̱la, Cristo xtáa gi̱i̱!› o ‹¡Gu̱ya̱a̱, xtáa ñuʼú!›, xúnimbala ku̱ya̱a̱.+
22 Numuu rí makuwá bi̱ muthíí rí ni̱ndxu̱ún Cristo ga̱jma̱a̱ profetas bi̱ minduwiinʼ,+ ma̱ngaa muni̱ mbaʼa milagro* ga̱jma̱a̱ i̱ʼwáʼ rí mitsaanʼ mu muni̱ nduwiinʼ xa̱bu̱, ga̱jma̱a̱ asndu maʼndún muninduwiinʼ bi̱ kaxtaʼwíin.
23 Guñeumíjnala.+ Ikha jngóo wapháá e̱tala.
24 Mú mbiʼi rúʼko̱, nda̱wa̱á índo̱ gájngoo majphú mba̱a̱ ga̱ʼkhu̱, a̱jkha̱ʼ makhañúu, gu̱nʼ ni xámbiʼii,+
25 a̱ʼgua̱a̱n bi̱ tri̱gi̱i̱n mekhuíí majngutíguíin ga̱jma̱a̱ xúgíʼ dí rígá mekhuíí maʼba̱a̱n.
26 Ikhú mbu̱ya̱a̱la A̱ʼdióo Xa̱biya̱+ rí na̱ʼkha̱ náa du̱u̱n ga̱jma̱a̱ xúgíʼ tsiaki̱i̱ ndrígóo.+
27 Ikhaa makuʼmiin ángeles ndrígióo, ikhiin mugimbíin bi̱ kaxtaʼwíin náa a̱jkhu̱ níʼkhóo numbaaʼ,* náa nagi̱ʼdu̱u̱ ku̱ba̱ʼ asndu náa nambárigo̱o̱ mekhu.+
28 Gajmañala náa xkri̱da ndrígóo ixi̱ higo. Índo̱ narudíinʼ ñawúunʼ ga̱jma̱a̱ nagu̱u̱ inúu, ikháanʼla ndu̱ya̱a̱ dí inu maʼni̱i̱ ruʼphu.+
29 Xúʼko̱ má mangáanʼ, índo̱ gúya̱a̱ xúgíʼ rígi̱, gu̱ya̱a̱ rí ikhaa* xtáa mijngii náa xkrugua.+
30 Na̱tala gajkhun rí ka̱ʼníí kuwáanʼla índo̱ gárígá xúgíʼ rígi̱.+
31 Mekhu ga̱jma̱a̱ ku̱ba̱ʼ ma̱ndoo mandáti̱ga̱a̱,+ mú ajngóʼ nditháan xándáti̱ga̱a̱.+
32 Mú nimbáa tséʼyoo náá mbiʼi ga̱jma̱a̱ náá hora gáʼni, ní má ángeles bi̱ kúwá mekhuíí, ní má Ada̱, i̱ndó Anu̱ʼ* eʼyoo.+
33 Ikha jngóo xúnuʼla, gakuwáanʼ xawii má xúʼko̱,+ numuu rí tséya̱a̱ nguáná gáʼni.+
34 Nindxu̱u̱ xóo mbáa xa̱bu̱ bi̱ ni̱jkha̱ mitsínguánʼ, índo̱ nigájnuu ni̱jkha̱, niniñúúnʼ ñumbáá mu muñewa̱a̱n goʼwóo+ ga̱jma̱a̱ mámbáa nixnúu ñajunʼ rí maʼni, ga̱jma̱a̱ bi̱ nañewu̱u̱n xkrugua niʼthúu̱n rí mayejngoo má xúʼko̱.+
35 Ikha jngóo gakuwáanʼ xawii má xúʼko̱, numuu rí tséya̱a̱ nguáná gátanga̱a̱ bi̱ goʼwóo,+ á mu wakíʼ o tikhu nduʼun o índo̱ inu majtsi* o miʼcha̱.+
36 Raʼkháa gáʼni rí nda̱a̱ tsu̱ma̱ gáʼkha̱a̱ ga̱jma̱a̱ nunuʼla gáʼyoo.+
37 Rí na̱tala ikháanʼ, mbá xúgíinʼ má ethu̱u̱n. Guyejngoola má xúʼko̱”.+
Mbaʼa nota
^ O “nagui̱i̱”.
^ Nindxu̱u̱ asndu xóo ga̱ʼkhu̱ rí nanújngoo mbáa a̱ʼgu̱ índo̱ nagiʼdaa a̱ʼdióo.
^ O “sinagoga”.
^ O “endi̱i̱n”.
^ O “gu̱nʼ rí nagajtaa idiʼ”.
^ O “mbá gajmá mba̱a̱”.
^ Náa ajngáa griego naʼthí, “tsinaʼ”.
^ Náa ajngáa griego naʼthí, “a̱jkhu̱ niʼkhóo giñánʼ”.
^ Xóo muʼthá, A̱ʼdióo Xa̱biya̱.
^ O “Táteʼ”.
^ Náa ajngáa griego naʼthí, “índo̱ nandxaʼwá mbaxtá”.
