Lucas 10:1-42
-
Jesús nakuʼmiin bi̱ mbá 70 (1-12)
-
Naʼthún rí maguáʼníí xuajin bi̱ tsétanga̱a̱ a̱jkiu̱ún (13-16)
-
Natangi̱ín bi̱ mbá 70 (17-20)
-
Jesús naʼni mba̱a̱ Anu̱u̱ numuu rí nangajo̱o̱ kaʼñún bi̱ guabiinʼ (21-24)
-
Xkri̱da ndrígóo samaritano bi̱ májáanʼ a̱jkiu̱u̱n (25-37)
-
Jesús na̱jkha̱ gáʼyoo Marta ga̱jma̱a̱ María (38-42)
10 Índo̱ nijngoo xúgíʼ rígi̱, ikhú Jesús* niraʼwíin mbá 70 ga̱jma̱a̱ nikuʼmiin magún ginuu majmi̱i̱n majmi̱i̱n+ náa xúgíʼ xuajin rí ikhaa maʼga.
2 Ikhú niʼthún: “Mba̱a̱ rí nijma̱a̱ náa nijuaʼdu, mú kááʼ nguéjmi̱i̱n bi̱ nuñajunʼ. Ikha jngóo gutakáñíí bi̱ kaʼyoo magu̱u̱ rí nijma̱a̱, mu makungui̱i̱nʼ ñumbáá mugimbóo rí nijma̱a̱.+
3 ¡Gaʼguala! Nakuʼmáanʼla xóo e̱jín múgú náa majñu̱únʼ lobos.*+
4 Índo̱ gúʼgua xúda amala náa najthi mbújkha̱a̱ ni má náa najthi ganitsu, ni má raxtála,*+ ga̱jma̱a̱ xájiala wéñuuʼ índo̱ nurajxi̱i̱ mbáa xa̱bu̱ kamba̱a̱.
5 Asndu xú káʼnii guʼwá rí gáʼguanúla, ginii gu̱tha̱: ‹Garigá rí tsímáá náa guʼwá rígi̱›.+
6 Á mu ikhí xtáa mbáa bi̱ nandoo maxtáa tsímáá, garigá rí tsímáá náa ikhaa. Mú á mu na̱nguá, rí tsímáá gátanga̱a̱ náa ikháanʼla.
7 Ikha jngóo gaguanala náa guʼwá rúʼko̱,+ gu̱phula ga̱jma̱a̱ guwa̱a̱n rí gúxnala,+ numuu rí xa̱bu̱ bi̱ nañajunʼ kaʼyoo mada̱a̱ʼ numuu.+ Ga̱jma̱a̱ xájngruaʼala mámbá guʼwá.
8 Ma̱ngaa asndu náá xuajin má rí gáʼguala náa dí mundriguáanʼla, guphu rí gúxnala,
9 ga̱jma̱a̱ gu̱ni̱ thanún xa̱bu̱ bi̱ naʼniún nandii bi̱ kúwá ikhí ga̱jma̱a̱ guthu̱u̱nla: ‹Xa̱bu̱ Ñajunʼ ndrígóo Dios* na̱ʼkha̱ rajngiyuu náa ikháanʼla›.+
10 Mú asndu xú káʼnii xuajin rí gátaʼala náa rí xúndriguanʼla, gagajnáaʼla náa kamba̱a̱ a̱pha̱ ga̱jma̱a̱ guthu̱u̱n:
11 ‹Mu mbuya̱a̱ dí raʼkhí dí ninila, nuxprígúuxu yujndaʼ náa rajkúxu rí nigu̱u̱ náa xuajñala.+ Mú nanduxu rí mbu̱ya̱a̱la dí Xa̱bu̱ Ñajunʼ ndrígóo Dios na̱ʼkha̱ rajngiyuu›.
12 Na̱tala gajkhun rí mbiʼi rí mixtanda̱ʼa̱a̱ cuenta, xuajin rúʼko̱ mamínuuʼ itháan ki xóo Sodoma.+
13 ¡Corazín, gínáála ikháán! ¡Gínáála ikháán Betsaida! Numuu rí á mu milagro rí niguma náa ikháán niguma náa xuajin Tiro ga̱jma̱a̱ Sidón, ikhiin niʼníí má nigúwúúnʼ xtíin mi̱du̱* ga̱jma̱a̱ nitri̱gi̱i̱n náa idiʼ mu musngajma rí nitanga̱a̱ a̱jkiu̱ún.+
14 Na̱tala, mbiʼi rí mixtanda̱ʼa̱a̱ cuenta itháan gakhi̱i̱ gúmíniiʼ ikháanʼ ki xóo Tiro ga̱jma̱a̱ Sidón.
15 Ga̱jma̱a̱ ikháán Capernaúm, lá naku̱ma̱a̱ʼ rí makráʼáán asndu mekhuíí ráʼ. ¡Ikháán markawa̱a̱ʼ asndu náa Iñá wajinʼ!*
16 Bi̱ gáʼdxawanla ikháanʼ naʼdxawunʼ má mangúún,+ bi̱ tsíyoo gáʼyalaʼ ikháanʼ tsíyoo má gáʼyoʼ mangúún. Bi̱ tsíyoo gáʼyoʼ ikhúún tsíyoo má gáʼyoo bi̱ nikungu̱u̱nʼ ma̱ngaa”.+
17 Nadxún nitangiín bi̱ mbá 70 ga̱jma̱a̱ nitháán: “Tátá asndu xa̱bu̱ wéñiiʼ* ninimbu̱ún kuyuxu índo̱ nijmuxu mbiʼyaaʼ”.+
18 Ikhú Jesús niʼthún: “Nda̱yo̱o̱ má rí Gixa̱a̱* naxpátríguíi+ asndu mekhuíí xóo mbáa a̱jkhu̱u̱n.*
19 Gu̱ya̱a̱la, nixnala ñajunʼ rí muxujmbírigi̱i̱n a̱bu̱nʼ ga̱jma̱a̱ xiyúʼ, ma̱ngaa rí maʼngala mu̱ni̱ gajmiála tsiaki̱i̱ ndrígóo xa̱bu̱ sia̱nʼ.+ Ga̱jma̱a̱ nda̱a̱ rí gugiʼníla.
20 Mú xáʼdxala numuu rí xa̱bu̱ wéñiiʼ nunimbu̱ún kuyala. Gaʼdxalá numuu rí mbiʼyala nigumarámáʼ mekhuíí”.+
21 Mbiʼi rúʼko̱ espíritu santo* niʼni rí maʼdxuu wéñuuʼ ga̱jma̱a̱ niʼthí: “Anu̱ʼ,* na̱ni̱ mba̱a̱n náa inún xa̱bu̱, Tátá bi̱ kaʼyoo mekhu ga̱jma̱a̱ ku̱ba̱ʼ, numuu rí nitarkaʼwu rígi̱ náa xa̱bu̱ bi̱ nduyáá ga̱jma̱a̱ bi̱ nakru̱ʼu̱u̱n,+ nitani̱ mbuyáá rígi̱ e̱ji̱n majkhiinʼ. Xúʼko̱, Anu̱ʼ, numuu rí májánʼ nitayáá matani̱ xígi̱ kaʼnii”.+
22 Ma̱ngaa niʼthí: “Anu̱ʼ nixnájxu̱ʼ xúgíʼ dí rígá. Nimbáa tséʼninuwiinʼ Ada̱ i̱ndó Anu̱u̱. Xúʼko̱ má Ada̱ i̱ndó ikhaa eʼninuwiinʼ Anu̱u̱,+ ga̱jma̱a̱ Ada̱ ma̱ndoo maʼsngúún eʼwíinʼ xóo nindxu̱u̱ Anu̱u̱”.+
23 Índo̱ guámbóo niʼthí rígi̱, ikhú nitangayii náa xa̱bi̱i̱ ga̱jma̱a̱ niʼthún ngu̱ʼwa̱á: “Gagi kúwá xa̱bu̱ bi̱ nduyáá rí ikháanʼ kuwáanʼ ruya̱a̱la.+
24 Na̱tala gajkhun rí mbaʼin profetas* ga̱jma̱a̱ reyes nindúún mbuyáá rí ndu̱ya̱a̱la ikháanʼ xúgi̱, mú túyáá,+ nindúún mudxawíín rí ikháanʼ kuwáanʼla rudxawíínla xúgi̱, mú túdxawíín”.
25 Ikhú, mbáa xa̱bu̱ bi̱ najmañuu Xtángoo nitu̱jxu̱u̱ ga̱jma̱a̱ nirajxu̱u̱ mu mbaʼyoo ndiéjunʼ gáʼthí, niʼthúu̱n: “Maestro, ndiéjunʼ gáʼyóoʼ ma̱ni̱ mu maxtáá asndu kámuu rá.”+
26 Ikhú Jesús niriʼñuu: “Ndiéjunʼ lá eʼthí náa Xtángoo rí natraxnuu rá.”
27 Ikhú ikhaa niriʼñuu: “‹Gaʼndaaʼ xtayáá Jeobá* Dios ndrígáaʼ ga̱jma̱a̱ xúgíʼ a̱jkia̱a̱nʼ, xúgíʼ xóo nindxa̱a̱ʼ,* xúgíʼ tsiaki̱i̱ rí xtaʼdáá, ga̱jma̱a̱ xúgíʼ ku̱ma̱ ndrígáaʼ›+ ma̱ngaa ‹gaʼndaaʼ xtayáá xa̱bu̱ numbaaʼ ga̱jma̱a̱ʼ xó má eyaaʼ xtayaminaʼ ikháán›”.+
28 Ikhú Jesús niʼthúu̱n: “Májánʼ xóo nitriʼña̱a̱, atani̱ má xúʼko̱ rígi̱ mu xúʼko̱ mataxkamaa rí maraxtaa asndu kámuu”.+
29 Mú numuu rí nindoo masngájma rí májánʼ má eʼni,+ ikha jngóo nirajxu̱u̱ Jesús: “Tsáá phú nindxu̱u̱ xa̱bu̱ numbaaʼ ga̱jmu̱ʼ rá.”
30 Ikhú Jesús niriʼñuu: “Mbáa xa̱bu̱ nagajtaa Jerusalén na̱jkha̱ Jericó, ikhú nirugua̱a̱ kuʼwáʼ, ma̱ngaa asndu xtíñuu nirawíi, nixnáá rí asndu nigíʼ muxiyáa.
31 Mbiʼi má rúʼko̱ xtáa ragajtaa mbáa ndxajkun náa kamba̱a̱ rúʼko̱, índo̱ ndiʼyoo xa̱bu̱ níjníí kri̱ga̱ ninújngoo.
32 Xúʼko̱ má índo̱ mbáa levita ni̱jkha̱nú ikhí, níjníí kri̱ga̱ ninújngoo.
33 Mú mbáa samaritano+ xtáa ra̱jkha̱ náa kamba̱a̱ rúʼko̱, índo̱ ndiʼyoo ra̱ʼkhá tháán nigáwíinʼ a̱jkiu̱u̱n kaʼyoo.
34 Ikhú nikuʼmaminaʼ náa kri̱ga̱a̱, ga̱jma̱a̱ nixtájmuu aceite ga̱jma̱a̱ vino náa nigawúunʼ, ma̱ngaa nimbróʼoo xtíin. Nda̱wa̱á nitámaaʼ náa tsu̱du̱u̱ xujkiúu, ni̱jkha̱ kayáa náa guʼwá rí naguájun xa̱bu̱ ga̱jma̱a̱ niña̱wu̱u̱n.
35 I̱mba̱ néjtsu̱u̱ xa̱bu̱ bugi̱ niguwíi a̱jma̱ denario,* nixnúu xa̱bu̱ bi̱ goʼwóo ga̱jma̱a̱ niʼthúu̱n: ‹Atie̱wa̱a̱n, á mu nakiéʼkháanʼ itháan mbújkha̱a̱, maninuma̱a̱ʼ má ikhúún índo̱ gátanga̱án›.
36 Tsáá bi̱ ajtsíin bugi̱ ku̱ma̱a̱ʼ ikháán rí nisngájma rí ninindxu̱u̱ xa̱bu̱ numbaaʼ ga̱jma̱a̱+ bi̱ nini̱ gínáa kuʼwáʼ rá.”
37 Ikhú xa̱bu̱ niriʼñuu: “Ikhaa bi̱ nigáwíinʼ a̱jkiu̱u̱n kaʼyoo”.+ Jesús niʼthúu̱n: “Ayu̱u̱ʼ ga̱jma̱a̱ xúʼko̱ má gátani̱ mangáán”.+
38 Índo̱ kúwá ragún kamba̱a̱, Jesús nito̱ʼo̱o̱ náa mbá xuajin. Ikhí mbáa a̱ʼgu̱ bi̱ mbiʼyuu Marta+ nitsijii náa goʼwóo.
39 Ga̱jma̱a̱ ikhaa gíʼdaa mbáa giʼtio̱o̱ bi̱ mbiʼyuu María, bi̱ nigi̱ʼi̱ náa mijngii rajkhúu Jesús* ga̱jma̱a̱ nixtáa raʼdxuun rí ikhaa niʼthí.
40 Mú Marta xtáa raʼnijngamínáʼ ga̱jma̱a̱ tikhuu ñajunʼ dí rígá. Ikha jngóo nikuʼmaminaʼ ga̱jma̱a̱ niʼthúu̱n: “Tátá, lá tséxmiéjuanʼ rí giʼtioʼ niniñuʼ mbáwun mu ma̱ni̱ míjñuuʼ xúgíʼ ráʼ. Aratháán ma̱ʼkha̱ gámbáyuʼ”.
41 Ikhú Jesús* niriʼñuu: “Marta, Marta, náá numuu rí naxmiéjuanʼ wéñuuʼ,
42 tséyóoʼ má wéñuuʼ, mbájndi má mbóó. Mú María niraʼwíí rí itháan májánʼ+ ga̱jma̱a̱ nimbáa xárígú káyúuʼ”.
